Jeremias 7 - Biblia Dc en Mixe de Quetzaltepec

Ma ja Jeremías yaj'ijxpëkyën jap tsajptëkoty

¹ Ënet yë Wintsën ojts tmëkäjpxy yë Jeremías ets t'ënëmaay:

² Nëjkx jam mwa'ak'oyë ma tsajptëjk yajnitëkën ets xytyuknijawëty ya'atë aaw ayuk yë ja'ayëty: Miitsëty Judá ja'ayëty ni'ëmukë, ninu'un mtëkëtën ma ya'atë tëjk'aawën ets xy'ëwtata'antë ja Wintsën, mëtoow'itë ya'atë aaw ayuk

³ mëti'ipë të tkäjpxyën yë Wintsën, mëti'ipë maaytyääyëpën winë, yë Israel ja'ay Tyiosëty: Yaj'oyëtë yë mjuukyajtën ets mtu'unënëty jëtu'un nyajjuuky'atëty ma ya'atë naax kajpnën.

⁴ Këtii xymyëpëktë mëti'ipë mwin'ë'ënëtëpën ko y'ëna'antë: Tyaa ja Wintsën ja tsyajptëjk, tyaa ja Wintsën ja tsyajptëjk.

⁵ Pën miitsëty myaj'o'oyëtëp yë mjuukyajtënëty ets mjot mwinma'anyëty ets mëtëy winë xytyuntë xykyajpxtë ma mjëëky mmëku'ukëtyën,

⁶ ets ka'ap xyaj'ëyowtë mëët yë tuunk yë jëpyokxy jyä'äy, yë ku'ooky u'unk, ku'ookytyo'oxy ets ka'ap xyaj'ooktë ja'ay ka'apë tii poky tunyën ma ya'atë it naaxwiinyëtën ets ka'ap xy'ëwtatë wiink tios mëti'ipë nëjkx ok ëxëëk xykyujatëtën,

⁷ ëjts nyajkutukäämpyës ets yaa mjuuky'atëty, ma ja it naaxwiinyëtën mëti'ipës ja m'ap m'ok ntukumaayën.

⁸ Miitsëty yë'ë mmëpëjktëp ja aaw ayuk ka'apë myëtëyëtyën, mëti'ipë ka'ap tyunyën.

⁹ Mmä'tstëp, myajja'ay'o'ktëp, mmëët'ajtëp wiink ye'etyëjk wiink to'oxytyëjk, ka'ap tii mëtëy xynyikajpxtë; mwintsë'këtyëp ja Baal ets wiink tios m'ëwtajtëp mëti'ipë ka'ap xy'ixy'atën,

¹⁰ ok mmintë ma ya'atë tsajptëjkën, mëti'ipë ëjts të nyajtuknikojën. Jëtu'un mmaytyë mtajtë ko ka'ap yaa tii mjatëtëty; m'ënantëp ko jyëkyejpy je'eyëm ëxëëk m'ëtë'ëtstëty m'ëna'antëty.

¹¹ ¿Jëtu'un xyjyëjp'ixtë ko ya'atë ntsajptëjkës ma ëjts nyaj'ëwtatyën, mä'tsëntëjk yë'ëjë? Ëjts wa'atsës nijawë tiijaty mtuuntëpën. Ëjts Wintsën, ëjts ënaanp.

¹² Nëjkxtë jam Siló, maas yë ntsajptëjkën mëti'ipës ëka'any nwin'ijxën ets jam ntsëënëja'anyës, ixtë wi'ixës ntuunyën mëët ko ja Israel ja'ayëty ojts xymyëtëkoytyës.

¹³ Kanaak'ok n'ënëmaaytyës ets jeexyë tyaj'oyëtë wyinma'any, miitsëty ka'ap të xymyëmëtowtës ets ka'ap të xy'ëtsowtës. Ëjts Wintsën, ëjts ënaanp.

¹⁴ Paatykyëjxm, näjyëtu'un tä ntuunyën ja Siloé tsajptëjk, jëtu'unës ntuna'any ya'atë tsajptëjk mëti'ipës të nyajtuknipëjktaakën, miits ojts njamo'otë ets m'ap m'okëty, mëti'ipë miitsëty mtuk'ijxpäjtëpën.

¹⁵ Jëkämës nnajtswopëja'antë, jëtu'un tääjës ntuunyën yë mmëkä'äxtëjk yë Efraín yë y'u'unk y'ok.

Ja Israel ja'ay käjpxy kumëtoownajxpë

¹⁶ Mijts, Jeremías, këtii xykyukajpxta'akëty ya'atë naax kajpn, këtiis xymyënu'kxta'akëty mëët ya'atë naax kajpn. Këtii nëkoo mnäjyotmaytyunyë jä'ä ko ka'apës nmëtoow'ita'any wi'ix m'ëna'anyën.

¹⁷ ¿Ti këtii xy'ixyë wi'ix y'ëtë'ëtstën y'ëna'antën ma Judá kajpnën ets ma Jerusalén kajpnënë?

¹⁸ Yë y'u'unk y'ëna'k, yë'ë ja'axy myëmiintëp; yë u'unkteety yë'ë jëën yajmëjjëtyëp; e yë to'oxytyëjkëty yë'ë jëtsykyojxtëp ets ja tsajpkääky tyaj'oyëtë ets tukwintsë'ëkëja'antë ja tios mëti'ipë tyijtëpën Ja wintaj mëti'ipë yajkutujkpën jam Tsajpjotm.

¹⁹ E kajts y'ëjtsëty y'ëxëëktuntë, kë'ëm nyäy'ëxëëktunëtë ets kë'ëm tmëxuuk tmëjoktëty. Ëjts Wintsën, ëjts ënaanp.

²⁰ Paaty ëjts maas nWintsën'atyën, tyamës n'ëna'any ko nyajkëta'akäämpyës yë ntsip n'äkë ma ya'atë kajpnën; ma ya'atë ja'ayëtyën, ma aayjëyujk ujtsjëyujkën, ma aay kepyën aay ujtsën ets ma pëjktä'äkyën. Jëtu'unës yë ntsip n'äkë nyajnaxa'any tä patoyë jëënën mëti'ipë ka'ap pën myäyëtëty tyajpi'itsëty.

²¹ Yë Wintsën mëti'ipë maaytyääyëpën winë, mëti'ipë yë Israel ja'ay Tyios'ajtëpën, jëtu'un yë nyaax kyajpn t'ënëëmë: Yaktë mwintsë'kënëty no'okpyë xämpyë ets oymyëti'ipë wintsë'kënëty, kaytyë tsu'utstë.

²² Koos nyajpëtsëëmtë yë m'ap m'okëty jap Egiptë, ka'apës ojts ntuk'ëne'emy ets wintsë'kën tyaktëty no'okpyë xämpyë ets wiinkëtypë wintsë'kën ëpëky.

²³ Mëti'ipës tëy ojts ntuk'ënä'ämtën, yë'ë etsës xymyëmëtowtëty; jëtu'unës ëjts nTyios'atëty ma yë'ëjëtyën ets yë'ë kyajpn'atëty maas ëjtsën. Ets n'ënëmaaytyës oy winë tuntëty tkajpxtëty jëtu'un tääjës të ntuk'ënä'ämtën, tääts oy winë wyimpëtsë'ëm jyëjpëtsë'ëmxëtëty.

²⁴ E yë'ëjëty ka'ap xymyëmëtoowtës ets ni xykyamëjpëjktaktës, ni'ikyë ojts winë tuntë tkajpxtë ijxtëm ja jyot wyinma'anyëtyën. Ijxtëm jeexyë ëjts xynyimiintën, ni'ikyës ojts xymyëjëkämkä'äktës.

²⁵ Maju'unëm yë m'ap m'ok tsyoontën jap Egiptë ets tyampaat, xëmës të njakexy yë ntuunpëtëjk mëti'ipë käjpxynyajxtëpën.

²⁶ E miitsëty ka'apës xymyëmëtowtë ets ka'apës nijënu'un xytyimmëjpëjkta'aktë, ni'ikyë wiinkjaty m'ëtëtsta'aktë këtiinëm ja m'ap m'okëty.

²⁷ Mijts Jeremías, tukmëmëtyakta'a ya'atë aaw ayuk; oy mkamëjpëjkta'akëtëty, winya'ax winjokmës oy pën mka'ëtsoowinpitëtëty.

²⁸ Ënëëmë: Ya'atë jëtu'un naax'ajtp kajpn'ajtp mëti'ipë ka'ap tmëmëtoyën ja Wyintsën Dios ets ka'ap tsoky tii yajtuk'ënëëmëty. Ka'ap tii mëtëy t'ëknimëtyaknë.

Ma ja wiink tios t'ëwtatën ja ja'ayëty jam Jerusalén

²⁹ Miitsëty Jerusalén ja'ayëty, nëkä'pta'atë yë mkuwaayëty ets xy'ixpotstëty. Ëw tu'uk yë ëy mon tukpë jam tunkëjxm të'ëts'itjotm, jä'ä ko yë Wintsën tëë tukjoot'anpëky yë mja'ay, tëë tnike'eky ets tëë t'ëxmatsy.

³⁰ Jëtu'un yë Wintsën y'ënä'äny: Yë Judá ja'ayëty yë'ë të tuntë mëti'ipës ka'ap n'oyjyawën: jap y'ëxëëk awinax të tpëjktaknëtë ma tsajptëjkën mëti'ipës ëjts të nyajtuknikojën ets të tukyaj'ëxëëkëtë.

³¹ Ma ja Ben-hinom joyjotmën, jam të tkojtë yë Tofet wyintsë'këntyakn ets jam nino'oka'antë ja y'u'unk y'ëna'këty ye'etyëjkpë to'oxytyëjkpë, mëti'ipës ka'ap nijëna'a ojts ni'ënä'ämën ets ka'apës ojts nijënu'un ntimmyäy ntimtyäjy jëtu'un y'ëtë'ëtstëty.

³² Paaty ëjts maas nWintsën'atyën jëtu'unës n'ëna'any, ko minaanp ja xëëw po'o ma ya'atë itjot ka'ap y'ëk'yajtijnëty Tofet ets Ben-hinom joyjyot, jä'ä yajtijëty O'kën Joyjyot. Ets jam Tofet jam nëjkx nyaaxtëkëtë ja ja'ayëty ka'apë t'ëkjëkyäjpnën muum nyaaxtëkëtëty.

³³ Yë may o'kpë yë'ë nëjkx tsyu'tsta'ajëtë lut majkwejkxy, kaa, ka'ap pën y'ita'any pën tääpë jëyujk y'ëtsë'ëkëpën.

³⁴ Nyaj'atëkoyäämpyës yë ëëpë yaxpë ets äjtsën pujtën ma Judá kajpnën ets ma Jerusalén kajpnën, yë pëjkpë ukpë ka'ap nëjkx pën wyin'etsyë; tu'kë'ëyë naax kajpn aanë'ëk tëëtsë'ëk nëjkx y'awinpijta'ay.