Jeremias 6 - Biblia Dc en Mixe de Quetzaltepec

Ma ja mëtsip tyajnatukyën ja Jerusalén kajpn

¹ Miitsëty Benjamín ja'ayëty, ixta'atë yë tsoktakn, käkpëtsëmtë jam Jerusalén. Tukxu'uxtë ja mxuxnëty jam Tecoa, tëëyë'ëktë tu'uk wit jam Bet-haquérem, jä'ä ko tam anëkëjxmtsow myiny wyinkony ja ëyo'on jotmay.

² Ja oypyë tsujpë ja Jerusalén kajpn, kutëkoyaanp yë'ë.

³ Jam nyëjkxa'antën yë kupixyny këwent'ajtpë ets tsajppax këwent'ajtpë mëët yë jyëyujkëty; jämyë na'ita'antë ets këëkjä'ä tyaj'ok tyajwëtstë.

⁴ Tääts yë myëtsip y'ëna'antë: Nänyipëjktaakëtë ets nnipëtë'kmëty. Mintë, tsojk mëët ntsiptu'unëmë; kujkxyëëw ntukja'ajtmëty. Nëkoopë y'ëtë'ëtstë, tsu'ujënyëp yë'ënë, tëë tii tkatuntë.

⁵ Nikë oy koots nitëjkëmëty ets njijtä'ämyëty yë pyotsyëty mëti'ipë nyaax kyajpn nyapots'ajtypyën.

⁶ Yë Wintsën mëti'ipë maaytyääyëpën winë, jëtu'un yë ënä'ämën të tyäky: Puxtë kepy ets xywyinwëëtëtëty tääpë mëjpotsy mëti'ipë Jerusalén kajpn nyapots'ajtypyën ets xynyitëkëtëty.

⁷ Jam Jerusalén jëtu'un jam ëxëëkpë yajpaaty tä muum nëë myuutyën. Tsip jam tuunëp, ëxëëk ja'ay jam nyätyunyë; näyajtsëtyujt näyajwintëkooyëp ja'ay je'eyë ets aak pëjk aak ijxëtëp.

⁸ Yaj'oyë mjot mwinma'any mijts Jerusalén, pën ka'ap, ëjts tim jëwa'akaanpës ma mijtsën; aanë'ëk tëëtsë'ëk nyaj'awinpita'anyës, ni pën jam nkayajtsëënëja'anyës ma mkajpnën.

Ma yajnikäjpxyën ja tëytyu'unën

⁹ Yë Wintsën mëti'ipë maaytyääyëpën winë, jëtu'un y'ënä'äny: Yaj'ixta'ajantëp ja Israel ja'ayëty mëti'ipë ënety jaakwë'ëmtëpën juuky, jëtu'un yaj'ixta'aja'antë tä ja'ay t'ixta'ayën yë tsatsymtsya'am ko muum wyi'imy, nitu'uk tka'ëxmatsy kyamjoty.

¹⁰ Ënätës n'ëtsooy: ¿Pën jëtää y'ëkmëtowäämpy jëtu'unpë aaw ayuk koos nimëtya'akëty ets koos pën jëtu'un nja'ënëëmëty? Jëtu'un yajpaatë atsi'tstuky yowë tyatskëty. Ka'ap myëtowtë, ka'ap oy tmëtowtë yë m'aaw m'ayuk, je'eyë tnëxi'ik tukxi'iktë.

¹¹ Wintsën, ëjts nän joot'anpëjknëpës ko je'eyë xëmë m'äjkënë mtooyënë; ëjts ka'apës jëtu'un nmëmëta'akëty. Jëtu'un yë Wintsën xy'ënëmaayës: Jam yë m'äkë këxpëk ma ëna'ktëjkëtyën tu'ujotypë yajpaatën, mëti'ipë nimay jëtijtëpën ets ëxëëk y'ëtë'ëtstë y'ëna'antën. Tääts nëjkx tsumy matsy tyajnëjkxtë ja ye'etyëjktëjk mëët ja tyo'oxytyëjktëjkëty ets näjyëtu'un ja mëjja'aytyëjkëty.

¹² Jyëën tyëjkëty, kyam tyu'ujëty ets y'u'unk tyo'oxytyëjkëty, wiink ja'ay nëjkx tjä'ä'ajta'ay. Jä'ä ko tëëjës ntuknipëjktaakë koos ntëytyuna'any ya'atë ja'ayëty mëti'ipë tsënaaytyëpën ma ya'atë kajpnën. Ëjts Wintsën, ëjts ënaanp.

¹³ Wä'än tmëj tmutskëty yi'iyë myëmaay myëtajtëp wi'ix wit meeny tpaatëtyën mëët ja ëxëëkpë ja tu'unën kajpxën; yë käjpxynyajxpë ets teetytyëjkëty aakyë'ë yajtukwin'ë'ëntëp wit meeny.

¹⁴ Oyës ja nnaax nkajpn nitsëtyut kutsëtyut yajpaatëty, yë'ëjëty ka'ap tii tmay tajtë; je'eyë xëmë y'ëna'antë ko oy yajpaatë ets ëxëëk jyatë kyëpätë.

¹⁵ Tsëtyuunëtëp jeexyë ko yi'iyë tyuuntëp ka'apës nme'kxyën. E ka'ap tsyëtyuntë, jëtu'un yaj'ixy ka'ap yowë nijawëtë tii tsëtyu'unën'ajtp. Paatykyëjxm koos ënety ntëytyuntë, je'eyë y'anäpëja'antë ets kyëtawa'antë jëtu'un tä jyatën yë wiink ja'ayëty. Ëjts, mëti'ipë Wintsën'ajtpën, ëjts ënaanp.

Ja Israel käjpxy kumëtoownajxpë

¹⁶ Jëtu'un ja Wintsën ja nyaax kyajpn t'ënëmaay: Nëjkxtë jam muum mtänëtë në'ëjoty tu'ujoty ets xy'ixtëty ma patu'ujën; xyajnitëwëtëty mëti'ipë oyën, yë'ëts panëjkxtë ets mpo'kxtëty. E yë'ëjëty tyaa ojts y'ëna'antë: Ka'ap, ka'apës mpanëjkxa'antë.

¹⁷ Yë Wintsën ojts yë këwent'ajtpë tpëjktä'äky ets t'ënëmaay yë naax kajpn: Mëtowtëp ko ja pujxnxuxn yajtukxu'uxëty mëti'ipë nyikäjpxypën ko kutsë'ëkëpë myiny kyëtä'äky. E ja naax kajpn je'eyë y'ëtsooy: Tii tääpë, ka'ap yam yë'ë yajmëtowa'any.

¹⁸ Paaty ja Wintsën y'ënä'äny: Miitsëty naax kajpnëty, nijawëtë yajxon wi'ix yë nnaax nkajpnës jyata'anyën.

¹⁹ Mijts naaxwiinyëtë, mëtoow'it yajxon: Ëyo'on jotmay ya'atë naax kajpn ntuk'ixäämpyës mëët ko ka'ap ja n'aaw n'ayukës të tmëjpëjkta'aktë; ni'ikyë të t'ixtijtë ja n'ënä'ämën ntëyajtënës.

²⁰ ¿Tiijës ko xytyuknimintë yë poom mëti'ipë jam Sabá të xymyëtsoontën ets aay ujts mëti'ipë pa'akxu'kpën, mëti'ipë tso'onpën wiink kajpn? Ëjts ka'apës yë'ëjëty n'oyjyawë ja wintsë'kën no'okpyë xämpyë ets wiinkëtypë wintsë'kën.

²¹ Paaty yë Wintsën y'ënä'äny: Ëjts jëtu'unës ya'atë naax kajpn nyajjata'any tä ja'ay kyëtäyën ko y'anäpë. Teety taak, u'unk ëna'k, mëj jëën mëtëjk ets jëëky mëku'uk, tu'knax y'ooka'antë ko ënety yajnimintë anëkëjxmtsow.

Ja anëkëjxmtsowpë ja mëtsip tsyoontën ets nitëkëtë ja naax kajpn

²² Jëtu'un yë Wintsën y'ënä'äny: Tam anëkëjxmtsow tu'uk yë naax kajpn mëkpë ets tsip'ixypyë tuknipëjktaakë ets min tnitëkëja'any ya'atë naax kajpn.

²³ Yë'ëjëty tam oyëtypë pujxn tmëët'atë mëti'ipë myëtsiptuuntëpën; tääpë ja'ayëty ëxëëk ja'ay yë'ëjëty ets ni pën tkapa'ëyowtë. Ko y'aya'axtë, jëtu'un yajmëtoy tä mëjmejy y'iitsy kyomyën, kwaaykyijxy muum nyëjkxtë. Jëjp'ixy jam y'ijnëtë ets tnitëkëja'antë ja Sión kajpn.

²⁴ Jam Jerusalén jëtu'un ja'ay y'ëna'antë: Tëës xypyaatë ja ayuk ets të ntsë'ëkëtëkëtës, tëëjës ntimjyawëtë nmëjaawkëxtë; je'eyë ëëts nmoonëtë ntujknëtë, jëtu'unës näjyawëtë mpëkëtë tä tu'uk to'oxytyëjkën mëti'ipë u'unk maay yajminäämpyën naaxwiinyëtë.

²⁵ Këtii mnëjkxtëty kamjotm, këtii myajpaatëty tu'ujoty. Yë mëtsip jëjp'ijxp jam muum tyim'ity; kutsë'ëkë yajpaaty oymyaajëty.

²⁶ Yë nkajpnës yë nyëëx, pëjkta'ak ja mwit mëti'ipë kuump u'kxpën ets kyëxë'ëkëty ko jë'ë ya'ax myajpaaty; ja'amyäts naaxyäts, mon tuk yajpaat tä jeexyë pën të y'ookyën; jä'ä ko ja mëtsip mëti'ipë xynyimina'anëmën, tää ja tyimwinkony.

²⁷ Ënätës yë Wintsën xy'ënëmaay: Mijts ntuknipëjkyp ets xywyinma'any'ixëty yë nnaax nkajpnës. Ijxta'a ets xynyijawëty wi'ix tii tuny tkäjpxyën.

²⁸ Wintsën, tääpë ja'ayëty aak je'eyë kyäjpxykyumëtoownaxtë; je'eyë y'ëxëëkpi'tskajpxtë ets aak ëxëëk jyot wyinma'any tmëët'atë; jëtu'un yajpaatë tä tsuxkpujxn ets juunpujxnën.

²⁹ Ko yë jëënpixn tyajmëjë yë jëën, poj'am yaj'ixy yë yu'unk pujxn jyiiytyä'äky. Tääpë jëtu'unpë pujxn oy jënu'un nyajwin'ë'tsmëty, yë ëxëëkja'aytyëjk ka'ap kyutëkoytyë.

³⁰ Jä'ä yajtijanëtë poop pujxn mëti'ipë tëë mya'ta'ayën, jä'ä ko mijts Wintsën tëë xy'ixpëky xy'ixtuny.