Jeremias 5 - Biblia Dc en Mixe de Quetzaltepec

Ja Jerusalén ja'ayëty ja nyëë pyokyëty

¹ Jëtu'un yë Wintsën y'ënä'äny: Nëjkx tukjëtijtëtya'atë yë Jerusalén kajpn ets xy'ixtëty pën jam muum ja'ay mëti'ipë mëtëy tii pyaye'epyën ets mëti'ipë oyjyot wyinma'anyën. Pën mpatëp, ëjts npokymyä'kxëpës yë Jerusalén kajpn.

² Tää ja'ay mëti'ipë tii nyikäjpxypën yë'ë tyukkajpxpejtyp yë Dios yë jyuukyajtën, je'eyëp ko antaktëp.

³ Wintsën, mijts yë'ë m'ixtääpy ja'ay mëti'ipë oyjyot wyinma'anyën. Ojts xyjyatëytyuny, yë'ëjëty ka'ap ojts tjawëtë; taj xit xyjyatuuny, kä'äpyëm tjajtë. Kujuun je'eyë nyäpyëjktakëtë këtiinëm yë tsaa, ka'ap tniwinpijtë ja oypyë ja në'ë tu'u.

⁴ Ënätës ojts nmay ntajy: Yi'iyë ëyoopëja'aytyëjk winë tyuuntëp nitsuu nipoj, jä'ä ko ka'ap tnijawëtë mëti'ipë Wintsën tsyojkën'ajtypyën ets mëti'ipë Wintsën nyi'ënä'ämëpën.

⁵ Yë'ëjës nmëmëtya'akäämpy yë ja'ayëty mëti'ipë mëj'äämpy ijtëpën naaxjoty kajpnjoty. Yë'ëjëty wa'ats tnijawëtë tii yë Wintsën tsyojkpyën ets tii nyi'ënä'ämëpën. E ni'ëmukë ënety të tkäjpxykyumëtoownaxtë ja Dios, ka'ap të tkupëktë ets tmëmëtowtëty.

⁶ Paatykyëjxm nyipëtsëma'anëtë kaa jam yukjotm ets yaj'ooka'anëtë, jam të'ëts'itjotm pa'uk jam nipëtsëmanëtëp ets tyuktsu'utsëja'anëtë, jam kyajpn winkon kuuyxyëpëjy nëjkx pyapo'o pyaputëtë ets y'atsu'uts tyuktsu'utsëtëty, mëët jä'äkyëjxm ko të pyokytyuntë ets kanaak yë jyiiky myëku'uk të tkë'ëyaktë.

⁷ Jëtu'un yë Wintsën y'ënä'äny: ¿Wi'ix n'ëknimä'kxëty mëët ijxtëm të mtimy'ëti'ityën? Yë m'u'unk m'ëna'k tëëjës xy'ëxmajtstaaynyëtë ets ko tii nikajpxtë yë'ë tyukajpxpäjnëtëp yë xyëëw ka'apë tiosëtyën. Ojtsës nyajkaytyë mëjwiin këjää, e yë'ëjëty ka'apës të xy'ëkwinkutsë'kënëtë, wiinktsow të nyëjkxnëtë, jëtu'un tä tu'uk yë to'oxytyëjkën mëti'ipë wiink ye'etyëjk pyanëjkxypyën.

⁸ Jëtu'un tä këwaaytyeety y'ayä'äxyën, jëtu'un të nyäpyëjktakënëtë ko t'ijxëtë myëku'uk tyo'oxytyëjk.

⁹ ¿Ets ënät pën y'ënaanpëty ko ka'apës ntëytyuna'anyë? ¿Ets ënät n'ënaanpëtyës ko ka'ap ntukëpätëtyës ja nyëë pyokyë?

¹⁰ Wä'än yë myëtsip tëkëtë ets wä'än naxmëtäänëtë yë tsatymyon oy tkatimyajkutëkoytyëty. Wä'än tnëtëjta'atë yë xye'enty, jä'ä ko ka'ap y'ëjtsëty n'ëkjä'ä'ajnë.

¹¹ Tëë yë Israel ets Judá xykyë'ëyäkyës maas yë nmëtsipën. Ëjts Wintsën, ëjts ënaanp.

¹² Yë Israel ja'ayëty ets Judá ja'ayëty jëkäm jëxkë'ëm ja Wintsën të tpëjkta'aktë; jëtu'un të y'ëna'antë: Dios ka'ap tii tuny. Ka'ap tii xyjyajtmëty, ka'ap tsip ets yuu y'ita'any.

^13-14 Yë käjpxynyajxpëtëjkëty ko myëtya'aktë jëtu'un tä jeexyë pyojyën, ka'ap Wyintsënëty yajkajpxëtë. E oy ko jyëtu'unëty, ëjts tëëjës xymyëkäjpxy yë Wintsën mëti'ipë maaytyääyëpën winë etsës të xy'ënëëmë: Mëët ko jëtu'un të y'ëna'antë, ya'atë nëjkx jyatëtë kyëpätëtë: Ëjts të ntuknipëjktaakë ets m'aaw m'ayuk jëënyä'änkën pyëtsëmëty m'aawjoty ets naax kajpn jëtu'un y'awinpitëty ja'axyën ets poj'am jyëënmatsëtëty.

¹⁵ Jëtu'un yë Wintsën y'ënä'äny: Israel, ntuknikäxäämpy tu'uk yë kajpn mëkpë, jekykyajpn ets jëkämpë tsyoonyën, mëti'ipë wiink ayuk kyajpxtëpën, mëti'ipë mijts ka'ap xytyukjatyën.

¹⁶ Aak tsip'ixy yë'ëjëty ets jotmëkëty; ko tsyiptuntë tim yaj'o'ktëp ënätyë.

¹⁷ Nëjkxëp tjë'kxta'atë mëti'ipë të xynyiyu'u të xynyitunën, nëjkxëp tkaaytya'atë yë mtsajpkääky, yë'ëpaat yë m'u'unk m'ëna'k ye'etyëjkpë to'oxytyëjkpë nëjkx tsu'utstë. Ja mkupixyny ets ja mjëyujk mtsajpkaa wa'ats tsu'tsta'aja'antë, yë mtsatym kyam ets mxe'enky kyam wa'ats tyajpëtë'kta'aja'antë. Mëët yë tyi'pxnëty kyu'umënëty tyajkutëkoya'antë yë mnaax mkajpn mëti'ipë ënety mtijpyën ko tya'tspëkyëty ets kyëwent'atyëty.

¹⁸ Jëtu'un yë Wintsën y'ënä'äny: Jä'ä xëëw jä'ä jëmëjt ka'ap nyajkutëkooytya'aja'anyës.

¹⁹ Ko ënety pën tyajtëy: ¿Wi'ix ko yë Wintsën jëtu'un të xytyu'unëmë? tääts xy'ëtsowtëty: Jä'ä ko yë Wintsën të n'ëxmajtsëmë ets ko yë wiink tios të mpanëjkxtëjkëmë mëti'ipë wiink naax wiink kajpn y'ëwtajtëpën, paaty ja wiink ja'ay të nmëtu'unëmë.

Ma ja Israel yajtukmëkäjpxyën këtiipë y'ëktuuntëkooynyëty

²⁰ Ënëëmëtë ja Israel ja'ayëty maajaty yajpaatën ets ënëëmëtë yë Judá ja'ayëty:

²¹ Kajpn, ja ka'apë jyä'äkyukën ets ka'apë wyinma'anyën, mëti'ipë jyamëët'ajtypyën wyiin ets ka'ap y'ixy, mëti'ipë jyamëët'ajtypyën yë tyatsk ets ka'ap myëtoy.

²² Ëjts mëti'ipë Wintsën'ajtpën, jëtu'unës n'ëna'any: ¿Jä'ä jëtää ko ka'apës xytsyë'ëkëtë? ¿Jä'ä jëtää ko ka'ap tsyëtyuytyë maas ëjtsënë? Ëjts të njapëjktä'äky mapaat yë mëjmejy nyaxëtyën, mapaat ka'ap nëkooyë muum nyasjä'ätsëtyën. Jëtu'un yë në'o'pky pyëti'iky ets jya'ëëtsy jyakomy, e ka'ap tninaxy mapaat të yaj'ënëëmën jya'tëty.

²³ Yajxon yë mjot mwinma'anyëty jyuun'ajnëtë ets je'eyë mkäjpxykyumëtoownaxtë: tëëjës xy'ëxmatstë ets tu'ukyë të mnëjkxnëtë.

²⁴ Miitsëty ka'ap ojts xymyëmay xymyëtajtë ets ka'ap ojts m'ëna'antë: Tsojk Wintsën nwinkutsë'këm mëti'ipë nTios'ajtëmën, mëti'ipë xymyo'oyëmën yë nëë tuu ets mëti'ipë nyija'apën jëna'a tyajwintëwa'any ja npëjktä'äky'ajtëmë.

²⁵ E ja poky mëti'ipë të xytyuntën, jä'ä të tyajtëkajtsta'ay winë ets ka'ap xytyukxoonta'aktëty mëti'ipë mjapat mja'ijxtëpën.

²⁶ Jä'ä ko tam ja ja'ay yajpaaty maas yë nnaax nkajpnën mëti'ipë je'eyë y'ijxyp tyuunpyën jëna'a ja myëku'uk t'ëk'ëxëëktuny, jëtu'un nyäpyëjktä'äkyë tä jeexyë muum tii joon tkuti'pxa'anyën, xii yaa muum o'ktakn tpëjktä'äky ets jap kyuka'anaxëty mëti'ipë y'ëxëëk'ijxypyën.

²⁷ Ujts yë jyëën tyëjk tsoky mëët mëti'ipë mye'tsypyën, jëtu'un tä muum ja'ay tyaj'utsyën yë kyäty mëët yë joon mëti'ipë myäjtsypyën. Jëtu'un'äämpy të nyäyyajkumeenytyä'äkyë ets të nyäyaj'awinpityë jotmëk,

²⁸ je'eyë ni'kx të y'awinpijnë ko jyi'kxy janaam jatsojk. Ka'ap yajnijawë naak ok të tyuuntëkoy të kyajpxtëkoy: Ko ja ku'ooky u'unk yajnipaye'eyä'äny, ka'ap tnipaye'eytyë mëtëy, mëti'ipë ja ëyoopëja'aytyëjk ja paatë'ajtëtëp, ka'ap tmëmay tmëtajy ets ka'ap tputëkë.

²⁹ ¿Ets ënät ka'ap tkumëtowtëty mëët ijxtëm y'ëtë'ëtstënë? ¿Ets ënät ka'ap ntëytyuntëtyës ijxtëm jyä'äy'atënë? Ëjts Wintsën, ëjts ënaanp.

³⁰ Mëj jotmay ets kutsë'ëkë mëti'ipë tuunëp jajtëpën ma ya'atë naax kajpnën.

³¹ Mëti'ipë käjpxynyajxpëtëjk jyanikajpxtëpën ka'ap myëtëyëty; yë teetytyëjkëty jëtu'un ja naax kajpn t'ënä'ämtë tä yë'ë kë'ëm wyinma'anypyaatën ets ja nnaax nkajpnës y'oy'ijxyp ja jëtu'unpë. E yë'ëts ënät, ¿tii miitsëty mtuunta'aktëp ko ënety ja jëtu'unpë kyixy nyäxy?