Jeremias 47 - Biblia Dc en Mixe de Quetzaltepec

Ma yaj'akäjpxyën wi'ix ja filistejë ja'ayëty jyata'an kyëpäta'antën

¹ Ojts yë Wintsën tukmëmëtyä'äky yë Jeremías käjpxynyajxpë wi'ix jyata'antën ja filistejë ja'ayëty ma ka'anëm ja faraón ënety tnitëkënëm ja Gaza kajpn.

² Ëjts Wintsën, jëtu'unës n'ëna'any: Jam anëkëjxmtsow tsyoona'any jëtu'un tä komnëë kyupëjyën, tä nëëkap jyënäkyën ets tyajnikoompety ja naax kajpn ets tëkokyë mëti'ipë jap ijtëp tsënaaytyëpën. Tääts ja ja'ayëty jyë'ëja'an ya'axa'antë mëët ja pëjkën ato'onën mëti'ipë jap tsënaaytyëpën.

³ Ko tmëtoowpaatëty ja kwaay pëkajx pëkajxnë myintë, ko ja pujxnwintëkäämpë kyujy jyëmämëty ets ja ye'eypyäjn jyänty ëna'anmëty. Ja teety taak jëtu'unyë nëjkx ja y'u'unk y'ëna'k tnipëyë'ktuta'atë, jä'ä ko ka'ap nëjkx t'ëkmëët'ajnëtë ja mëk'ajtën wi'ix ni'ëmukë kyä'äktëtyën.

⁴ Nyixëëw ënety jëtu'un të tpaaty ets filistejë ja'ayëty kyutëkoytyëty; ja Tirë ja'ayëty, Sidónja'ayëty nëjkxëp yajpëjkëtë ja jyä'äy mëti'ipë ënety mëët të tkäjpxy'atën ko nyäpyutëkëja'anëtë.

⁵ Yë Gaza ja'ayëty je'eyë nëjkx nyäkyukä'ptaayënëtë, yë Ascalón ja'ayëty uum wyë'ëma'antë. Miitsëty Anaquim ja'ayëty ¿wi'ix ko nëkoo mjot mnini'kx xyajtsëtyutë?

⁶ ¿Jëna'a jyëjpkëxanë ya'atë ëyo'on jotmay ma ja tëypyujxn yaja'ay'ookyën? Wä'än tyajpëjkë'ëky tääpë tëypyujxn, wä'än tu'k'ityë twë'ëmy.

⁷ ¿E wi'ix tu'k'ityë wyë'ëmëty pën yë Wintsën të y'ëne'emyë? Yë'ë të tyuknipëkyë ets tyuuntëkoyëty jam ma Ascalón kajpnën ets jampaat ma mejypya'ajën.