Jeremias 45 - Biblia Dc en Mixe de Quetzaltepec

Ja aaw ayuk mëti'ipë yajtuknikäjxën ja Baruc

¹ Ma ënety taxk jëmëjt y'apetyën ma yajkutukyën ja Joaquim, Josías yë myaank mëti'ipë ënä'ämpën jam Judá, yë Baruc, yë Nerías yë myaank yë'ë ënety jam kyëxjääpy tëkokyë mëti'ipë yë Jeremías nyikäjpxypën. Ënet ja Jeremías t'ënëmaay ja Baruc:

^2-3 Mijts Baruc, jëtu'un m'ëna'any: Mon tukës nyajpaaty mëët ja pëjkën ato'onën mëti'ipës yë Wintsën të xymyo'oyën. Tëës n'ënu'kxënë mëët ja jë'ëyën yaxën, nijënu'unës nkajotkujk'aty.

⁴ E mijts jëtu'un xy'ënëëmëty, ko jëtu'un yë Wintsën y'ënä'äny: Ëjts nyajkutëkooyäämpyës mëti'ipës të nkojyën, nwijxë'ëkäämpyës mëti'ipës të npenyën; wa'atsës winë nyajkutëkoyä'äny yaa naaxwiiny.

⁵ ¿M'amëtowäämpy mëti'ipë mëpaat mëjwiin këjää xytyukjotkujk'atyënë? Pën jëtu'un, këtii nëkoo xy'amëtowëty, jä'ä ko ëjts ëyo'on jotmayës je'eyë nkäxäämpy ma naaxwiinyëtë ja'ayën. E mijts ka'ap wi'ix yë mjuukyajtën jyata'any, oy maa mnëjkxëty. Ëjts mëti'ipë Wintsën'ajtpën, ëjts ënaanp.