Jeremias 42 - Biblia Dc en Mixe de Quetzaltepec

Ja aaw ayuk mëti'ipë Johanán yajtuknikäjxën

¹ Ënet myujktaaytyë ja tsiptuunpë wintsëntëjkëty, yë Johanán, yë Caréah myaank, yë Azarías, yë Hosaías yë myaank ets ni'ëmukë yë ja'ayëty mëjpë mutskpë,

² ets tnimiintë ja Jeremías käjpxynyajxpë ets t'ënëmaaytyë: Mëyajtën ëëts n'amëtowantëp ma mijtsën, niwaantso'ow nipëjktso'owëtëkës ma mWintsën Tiosën, këtii m'ëna'anëty ko ka'ap, maas niwäänë të nwë'ëmtën. Nimay ijty ëëtsëty tëëyëp, tyam niwäänë njaakyajpaatës, jëtu'un tä xy'ixyën.

³ Mënu'kxta'ak yë mWintsën Dios ets xytyukni''ixëtëtyës mëti'ipë tu'u mëpaat npanëjkxtës ets tiis mëpaat ntuntën.

⁴ Tä ja Jeremías y'ëtsoowëtë: Oy'atëp. Tyamës yë mWintsën nmënu'kxta'akëty mëti'ipë mTiosajtëpën mëët miitskyëjxmëty, jëtu'un tääjës xypyëjktsowtën, ok ënät ntuk'ëwaanëtëty wi'ix y'ëtsoyën, ni tu'ukës ja ayuk nkayajninaxa'any.

⁵ Ënet t'ëtsoowtë ja Jeremías: Yë mWintsën Dios yë'ë y'ixëp nyijawëp ko ënety ëëtsëty tii oy nkatuntës ijxtëm yë'ë xytyuk'ënä'ämtënës.

⁶ Oy ëëts n'oyjyawë nka'oyjyawëtëty wi'ix y'ëtsoyën, yë nWintsën'ajtëm Dios, yë'ëjës nmëmëtowantëp mëti'ipë yaj'awa'kpën ets oy tsuj njuuky'atëtyës.

Ma ja Wintsën t'ëtsoowinpityën mëti'ipë ja Jeremías të t'amëtoyën.

⁷ Kom majk xëëw ja Wintsën ojts t'ëtsoowinpity ja Jeremías,

⁸ ets Jeremías ojts tyaxtsoy yë Johanán, yë Caréah myaank ets ja tsiptuunpë wintsëntëjkëty mëti'ipë ënety mëët tu'ukyë nyäyaj'itëtën ets nitëkokyë ja kunaax kukajpnëty, mëjpë mutskpë,

⁹ ets t'ënëmaay: Yë Wintsën, mëti'ipë yë Israel ja'ay Tyios'ajtëpën, mëti'ipës ojts xy'amëtowtën ets ntuk'ëwaanëtëtyës ja m'amay mjotmayëty, jëtu'un të y'ëtsoy:

¹⁰ Pën miitsëty mwë'ëma'antë yaa tsënääpyë ma ya'atë it naaxwiinyëtën, tyam mputëkëtëty ets jotkujk mjuuky'atëty; ka'ap nyajkutëkoytyëty, ni'ikyë nëjkx nkojtë nma'kxtë tä aay ujts yajkojyën ets ka'apë nijëna'a yajwijxë'ëkyën, jä'ä ko nmëkja'apës ko miitsëty ja ëyo'on të ntuknikäxtë.

¹¹ Këtii xytsyë'ëkëtëty yë Babilonyë yajkutujkpë, mëkpë xytsyë'ëkëtën. Këtii nijënu'un xytyimtsë'ëkëtëty, jä'ä ko ëjts yajpaataanpës mëët miitsëty ets nyajtso'oka'antë, nyaj'ëwaatsëpëtsëmantëp ma kyë'ë y'aawën. Ëjts Wintsën, ëjts ënaanp.

¹² Ëjts miitsëty npa'ëyowantëp ets ntuktëkëjäämpyës tääpë yajkutujkpë ets mpa'ëyowëtëty ets t'ëwa'atsëty ja mnë'ë mtu'ujëty ets mwinpitëty jatëkok ma mnaax nkajpnëtyën.

¹³ E pën miitsëty kajts mwë'ëma'antë ma ya'atë naax kajpnën ets ka'ap xymyëmëtowtë ja Wintsën mëti'ipë mTiosajtëpën,

¹⁴ ets m'ëna'antë: Ni'ik'oy koos nnëjkxtëty jap tsënääpyë Egiptë ma ka'ap jyap'atyën yë tsip käjpxy, ma ka'ap nijëna'a yajmëtoyën wi'ix ja'ay xuxn tukxu'uxyën mëti'ipë tsip nyikäjpxypën ets ma ka'ap pën yuu'ookyën,

¹⁵ miitsëty Judá ja'ayëty ninu'un të wyë'ëmtën yaa, mëtoow'itë wi'ix yë Wintsën y'ënä'änyën mëti'ipë maaytyääyëpën winë, mëti'ipë yë Israel ja'ayëty Tyios'ajtëpën: Pën miitsëty jëtu'un m'ëna'antë ko jap mnëjkxa'antë Egiptë tsënääpyë,

¹⁶ ja tsip käjpxy ets ja yuu xëëw mëti'ipë ënety mtsë'këtyëpën, nëjkxëp jap mpaja'tëtë ets je'eyëm nëjkx m'ooktë.

¹⁷ Tu'kë'ëyë mëti'ipë ënantëpën ko jap Egiptë nyëjkxa'antë tsënääpyë, jëën tsip, yuu xëëw ets pa'am ëyo'on nëjkx yaj'ookëtë. Ni pën juuky kyawë'ëma'any, ni pën nëjkx tkakuke'eky ja ëyo'on jotmay mëti'ipë ntuknikäxantëpën.

¹⁸ Ja Wintsën mëti'ipë maaytyääyëpën winë, mëti'ipë Israel ja'ay Tyios'ajtëpën, yë'ë ënaanp: Timjëtu'un ijxtëm ojts yë Jerusalén ja'ayëty xyajjoot'anpëktënës, timjëtu'un miitsëty xyajjoot'anpëka'antës ko mnëjkxtëty jap Egiptë. Ijxpäjtën nëjkx mwë'ëmtë ko ënety të myajpoktë; atsë'ëk ajawë mjata'antë ets nijëna'a nëjkx mka'ëkwinpijnëtë ma ya'atë it naaxwiinyëtën.

¹⁹ Miitsëty nijënu'un mjaakwë'ëmtën yaa Judá, jëtu'un yë Wintsën m'ënë'ëmxëtë ko këtii mnëjkxtëty jap Egiptë. Yajxon tim nijawëtë ets tyam myajtuk'ëwaanëtë.

²⁰ Miitsëty mëj këjää mtëkoytyë, miitsëty ojts kë'ëm m'ëna'antë koos yë Wintsën nmëkajpxëty mëti'ipë mTiosajtëpën, kë'ëm të xy'ëk'ënëëmëtës: Mënu'kxta'ak yë Wintsën mëti'ipës nTios'ajtëpën mëët ëëtskyëjxmëty ets ënät xytyuknijawëtëtyës wi'ix y'ëtsoyën ets jëtu'un winë ntuntëtyës.

²¹ E yë'ëjës të nnikäjpxy mëti'ipë ja Wintsën të t'ëtsoowinpityën, mëti'ipë miitsëty mTiosajtëpën, e miitsëty ka'ap xymyëmëtowa'antë.

²² Tyam myaj'ënëëmëtë, ko ja'akyukëtë yajxon: yë jëën tsip, yuu xëëw ets ja pa'am ëyo'on, yë'ë myaj'ookan myajtëkoyanëtëp ma ja naax kajpnën ma m'ëna'antën mnëjkxa'antën tsënääpyë.