Jeremias 41 - Biblia Dc en Mixe de Quetzaltepec

Ma Guedalías ja'ay yaj'ookyën

¹ Ma mëwëxtujk po'o y'apetyën, yë Ismael, yë Netanías yë myaank, yë Elisamá y'ok'u'unk, yë yajkutujkpë y'u'unk y'ok; mëti'ipë ënety yë yajkutujkpë të tsiptuunpë wintsën'atyën, ojts jam nyijkxy Mispá ets tmëëtmëtya'aka'any yë Guedalías. Majk ojts yë jyä'äy pyanëjkxyë. E jam Mispá, kaaytyëp ënety jam,

² ko yë Ismael wyä'ätsë'ky ajotkumonë mëët nimajk ja jyä'äy ets tyaj'o'ktë ja Guedalías mëti'ipë jam Judá yajkutujkpën; Babilonyë yajkutujkpë ënety jam të pyëjktä'äkyë ets jam y'ënä'ämëty.

³ Ismael ojts tyaj'o'kta'ay ja jutiiyë ja'ayëty ets ja Caldeo ja'ayëty mëti'ipë ënety tsiptuunpëja'ay'ajtëpën mëti'ipë mëët tu'ukyë nyäyaj'itëtën yë Guedalías jam Mispá.

⁴ Komjëpom ma ënety të y'ookyën ja Guedalías, ka'anëm ënety pën tnijawë tii të tyuny të jyätyën,

⁵ ënät jyajtë nimajkta'px yë ja'ay. Jam tsyoontë Siquem, Siló ets Samaria. Tëë je'eyë nyäy'awaayjyäjpta'ajëtë, këëts këëts ja wyit mëti'ipë myëmiintëpën ets tëë ja jyot nyini'kx tyajtsëtyujta'atë. Tam tmëmintë yë aaypyajk ujtspajk ets poom mëti'ipë tyukwintsë'ëkëjantëpën ja Wintsën.

⁶ Ënet yë Ismael tsyo'ony jam Mispá jëëpy yaxp ets tjëjpye'eyi'iky. Tim je'eyë mëët nyäpyaatëtë, tä t'ënëmaay: Min ixtë yë Guedalías, yë Ahicam yë myaank.

⁷ Je'eyë ko tam ënety tyimja'ajnëtë kajpn itkujky ko yë Ismael ets jyä'äy tyaj'o'ktaaytyë ja ja'ayëty, ja o'kpë jap tkujëpijpytyääytyë nëëjutjoty

⁸ E jamts nimajk ja ja'ay y'ijtë mëti'ipë y'ënëmaaytyën ja Ismael: Këtiijës xyaj'ooktëty; ëëtsëty tamës yu'utsy nmëët'atë jam ujtsjotm tsajpmok, cebadë, olivë on ets uuxpa'ak. Ënet yë Ismael ka'ap tjantyyaj'o'ky tääpë ja'ayëty.

⁹ Ja nëëjut ma ja Ismael t'ajëpijpëtyääyën ja o'kpë, jä'ä mëti'ipë ja yajkutujkpë Asá yaj'o'oyëyën ko nyäkyuwanë ma pyatityën ja yajkutujkpë Paasá mëti'ipë jam ënä'ämpën Israel.

¹⁰ Ojts yë Ismael tmajtsmujkta'ay ja to'oxy'ëna'k mëti'ipë yajkutujkpë nyëëx'ajtypyën ets ja ja'ayëty mëti'ipë jam yajpatëpën Mispá, mëti'ipë ja Nebuzaradán, tsiptuunpë wintsën të tmo'oyën yë Guedalías ets yë'ë mëët y'itëty. Ojts yë Ismael tmajtsmujkta'ay ja ja'ay ets tsyo'ony. Jam ënety të tuknipëjktaakë jyata'any ma ja Amón nyaaxjotmën.

¹¹ Ko tnija'awëtyë yë Johanán, yë Caréah myaank ets tsiptuunpë wintsëntëjk ko tëë yë Ismael yaja'ay'ooky,

¹² ënät tyajtu'ukmujktaaytyë jyä'äyëty ets ojts tninëjkxtë. Jam tpatë winkon ma ja Gabaón nëë apojtsë'ëkyën.

¹³ Ko t'ijxtë ja ja'ayëty mëti'ipë ënety ja Ismael tsumy matsy yajnëjkxypyën, ko yë'ë jam miintëp yë Johanán mëët yë tsyiptuunpëtëjk, jotkujk ojts nyäyjyawëtë,

¹⁴ ënät wyimpijtaaytyë ets ojts tpuwa'akëtë ja Johanán.

¹⁵ E yë Ismael mëët nituktujk yë jyä'äy ojts tkukä'äktë yë Johanán ets ojts nyëjkxtë jam Amón.

Ma kyä'äktën ets nyëjkxtë jap Egiptë

¹⁶ E yë Johanán mëët yë tsyiptuunpë wintsëntëjkëty, yë'ë ojts tmënëjkxtë ja tsiptuunpëtëjk, ja to'oxytyëjkëty, ja pi'k ëna'këty ets ja wintsëntëjkëty mëti'ipë ja Ismael ënety tsumy matsy të tyajtsoonyën jam Mispá ko tyaj'o'ky ja Guedalías; ya'atë ja'ayëty yë'ë ojts yë Johanán kyë'ëtëkëty ets twoowtso'ony jam Gabaón.

¹⁷ Jam tsyo'ontë ets jyajtë Guerut-quimam, winkon ma mëët yë Belén nyäpyäätyë, jam ojts wäänë pyo'kxtë. Jap ënety të tnipëjktaakëtë jya'ta'antë Egiptë;

¹⁸ yë'ë kyukäktëp ja Caldeo ja'ayëty jä'ä ko tëë ënety yë Ismael tyaj'ooky yë Guedalías, mëti'ipë ja Babilonyë yajkutujkpë të tpëjktä'äkyën y'ënä'ämëty ma ja naax kajpnën.