Jeremias 37 - Biblia Dc en Mixe de Quetzaltepec

Ma ja Sedequías tunyën ja waantso'ow pëjktso'owën Jeremías wyintuuy

¹ Yë Nabucodonosor, mëti'ipë jam Babilonyë ënä'ämpën, yë'ë ojts jam Judá yë Sedequías tpëjktä'äky yajkutujkpë, yë Josías yë myaank, jëtu'un tä jeexyë yë'ë Jeconías yajkutukyën, yë Joaquim yë myaank.

² Yë Sedequías ets tyuunpëtëjkëty ets mayjyä'äyëty, ka'ap ojts tmëjpëjkta'aktë ja aaw ayuk mëti'ipë yë Wintsën jatuknikäjxëtën mëët yë Jeremías käjpxynyajxpë.

³ Ojts yë Sedequías tkexy yë Jucal, yë Selemías yë myaank ets ja teety Sofonías, yë Maaseías yë myaank ets nëjkx t'ixtë ja Jeremías ets t'ënëëmëtëty: Kukajpxtaktëkës ma Wintsënën mëti'ipës nTios'ajtëpën.

⁴ Ka'anëm ënety yë Jeremías yajtsumnyëm, jaaknëjkxpnëm ënety muum ma naax kajpnën.

⁵ Ko ojts jap Egiptë tsyoontë ja tsiptuunpëtëjkëty mëti'ipë yë faraón jyä'äy'äjtypyën. Yë Caldeo ja'ayëty ojts tnijawëtë mëti'ipë ojts ja Jerusalén kajpn tnitëkëtën, poj'am jam tsyo'ontaaytyë.

⁶ Ënet ja Wintsën ojts t'ëne'emy ja Jeremías ets t'ënëëmëty

⁷ ja ja'ayëty mëti'ipë të nyiminyëtën: Ënëëmëtë yë Judá yajkutujkpë mëti'ipë të mkäxëtën etsës winë xyajtëwtëty, ko ja yajkutujkpë mëti'ipë jap Egiptë ënä'ämpën tëë ja tsyiptuunpëtëjk wyimpijta'atë mëti'ipë të y'ëna'antën ko mputëkëja'anyë.

⁸ Ja Caldeo ja'ayëty nyitëkëjantëp ja Jerusalén kajpn ets tjëënmo'oja'antë ets tyajtooytyëkoya'antë.

⁹ Ëjts mëti'ipë Wintsën'ajtpën, ëjts ënaanp: Këtii nëkoo mjot mwinma'any xyaj'ëna'antë ko yë Caldeo ja'ayëty tu'ukyë të nyëjkxtë, jä'ä ko ka'ap jyëtu'unëty.

¹⁰ Oy jeexyë miitsëty mjatimmyëtaktëpë ets jeexyë Caldeo ja'ayëty may xyjyayaj'o'ktëpë, ja mëti'ipë wë'ëmtëpën juuky, mëti'ipë je'eyë tsëtyujtëpën jam tsipjotm, yë'ë pëtë'ëkantëp ets ëxëëk mtuna'anëtë ets tjëënmo'oja'antë ja naax kajpn.

Ma ja Jeremías yajtsumyën

¹¹ Paaty yë Caldeo ja'ayëty ojts tsyoontë yaa ma Jerusalén kajpnën, jä'ä ko tnija'awëtyë ko tää myintë yë Egiptë yajkutujkpë tsyiptuunpëtëjk.

¹² Ënet ja Jeremías tsyo'ony jam kajpntum ets ojts nyijkxy ma ja Benjamín ja'ayëty y'itjotëtyën, paaty ojts jam nyijkxy jä'ä ko naax ënety kyijpxwa'kxantëp ja ja'ayëty, e yë Jeremías tam ijty näjyëtu'un yë nyaax.

¹³ Ko jam jyä'äjty ma ja kajpn yajnitëkën, tu'uk ja'ay, Irías xyëëwajtyp, yë Selemías yë myaank ets Hananías yë y'ok'u'unk mëti'ipë ja tëjkëtyakn kyëwent'ajtypyën, yë'ë ojts tmajtswë'ëmy ja Jeremías ets t'ënëmaay: Mijts yë'ë mpukajpxëp yë Caldeo ja'ayëty, ¿këtiijë?.

¹⁴ Tääts ja Jeremías y'ëtsooy: Ëjts ka'apës pën mpukajpxë, wi'ixës ko caldeo ja'ay mpukajpxëty. E ja Irías ka'ap ojts tmëtoowkukë tä ja Jeremías jya'ëna'anyën, ënät ojts tsumy ets tyajnëjkxy ma ja kutuunktëjkëtyën.

¹⁵ Tääts tnipëtë'ktë ja Jeremías, ojts twoptë ets tsuumtë jam ma Jonatán yë tyëjkën, mëti'ipë jääpyën, ja tyëjk pujxntëjk ijty wyä'äny.

¹⁶ Jap ma ja Jeremías yajtsuumyën, jap ja tëjk kyojyëty naaxpa'tkë'p, jap jeky y'ijty.

¹⁷ Yë Sedequías yajkutujkpë ojts tni'ënä'ämë ets Jeremías yajmënëjkxëty jam ma kutujkëntëjkën. Ko jam jyä'äjty ma ja yajkutujkpën, ënät ame'tsyë yajtëëwë: ¿Jam tii ayuk xymyëëtëtyë mëti'ipë Wintsën të mmo'oyënë? Ets ja Jeremías y'ëtsooy: Tyapës ayuk nmëëtëty ets jëtu'unës yë Wintsën të xy'ënëëmë: Mijts jam myajkë'ëyaka'any ma Babilonyë yajkutujkpën.

¹⁸ Ojts yë Jeremías näjyëtu'un tyajtëy ja yajkutujkpë: ¿Maa të nmëtëkoy ets maas të nmëtëkoy ja wintsëntëjk mëti'ipë naaxjoty kajpnjoty tuuntëpën etsës xyajpujxntëjktëkëtëty?

¹⁹ ¿Maa ënät tyam yajpaatë ja käjpxynyajxpëtëjkëty mëti'ipë ojts y'ëna'antën ko ka'ap yë Babilonyë yajkutujkpë tnitëkëja'any ya'atë kajpn?

²⁰ Mëtoow'it mijts yajkutujkpë ets këtii xy'ëwa'atsëty etsës jatëkok jam nyajmënëjkxëty ma Jonatán yë tyëjkën, mëti'ipë jääpyën, këtiipës jam n'ëk'o'knëty.

²¹ Ënet ja Sedequías yajkutujkpë ojts tni'ënä'ämë ets ja Jeremías jam tsumy y'itëty ma ja këwent'ajtpë y'itën ets tmo'otëty ja kyääky winjëpom, mëti'ipë tso'onpën ma yajtijyën Tu'u Jot Ma Ja Tsajpkääky Kyojyën. Jäpaat jyëtu'un'ajty mapaat jyaak jam'ajtyën ja kääky uuky jam Jerusalén. Yë Jeremías jam ojts y'ity tsumy matsy ma ja këwent'ajtpë y'itën.