Jeremias 36 - Biblia Dc en Mixe de Quetzaltepec

Ma ja Baruc tkäjpxyën ja noky axaatsy jap tsajptëkoty

¹ Ma ënety taxk jëmëjt y'apetyën ma Joaquim tyëkën yajkutujkpë, yë Josías yë myaank mëti'ipë jam Judá ënä'ämpën, jää ojts yë Wintsën tmëkäjpxy yë Jeremías ets t'ënëmaay:

² Ix tu'uk yë noky apity ma xykyëxjaaytya'ajëtyën tëkokyë mëti'ipë të ntuk'ëwaanën mëëtpë yë Israel ja'ayëty, Judá ja'ayëty ets wiinkëtypë naax kajpn, wa'ats xykyëxjaaytya'ajëty maju'unëm nikajpxtsoonyënës ets tyampaat.

³ Wä'änxyëp yë Judá ja'ayëty tyaj'oyëtëty yë jyot wyinma'anyëty; ko nijawëtëty tëkokyë yë ëyo'on jotmay mëti'ipës ntuknikäxantëpën ets jyëkyäpëp npokymyä'kxtëtyës.

⁴ Ënet yë Jeremías tuknipëjky yë Baruc, yë Nerías yë myaank ets tnajtskajpxëy jëtu'un tä ënety ja Wintsën të y'ënë'ëmxëtyën. Yë Baruc wa'ats tkëxjaaytyääy.

⁵ Ënet yë Jeremías tuknipëjky yë Baruc ets t'ënëmaay: Ëk'ix, ëjts ka'apës njëkyepy nnëjkxëty ma tsajptëjkën, jä'ä ko tsipjotyës nyajpaaty.

⁶ Paaty mijts ntuknipëky ko jatëkok tpaatëty ja nyixëëw ma ja'ay y'ayuu'atën, tääts mnëjkxëty ma tsajptëjkën ets jap xykyajpxëty tëkokyë mëti'ipës të nnaskajpxën ets të xykyëxja'ayën jëtu'un tmëtoowtëty yë ja'ayëty ja Wintsën ja y'aaw y'ayuk, yë Judá ja'ayëty mëti'ipë të tsyoontën ma kyajpnëtyën ets të myintën ma tsajptëjkën,

⁷ wä'änxyëp tmëpëjktsowtëty yë Wintsën ets tyaj'oyëtëty yë jyot wyinma'any ets tyu'unënëty kyajpxënëty, jä'ä ko yë Wintsën tëë tukjoot'anpëky ya'atë naax kajpn.

⁸ Yë Baruc jëtu'un tuuntaay tä ënety ja Jeremías käjpxynyajxpë të tyuknipëkyën, ojts jam nyijkxy ma ja tsajptëjkën ets tkajpxtaay ja noky axaatsy ma ënety të tkëxja'ayën ja Wintsën ja y'aaw y'ayuk.

⁹ Ma taxtujk po'o y'apetyën, ma ja mëmëkoxk jëmëjtpën ma yajkutukyën yë Joaquim, yë Josías yë myaank mëti'ipë jam Judá ënä'ämpën, ojts tu'uk ënä'ämën tpëjkta'aktë ets ja Jerusalén ja'ayëty, Judá ja'ayëtyën y'ayuu'atëty mëti'ipë jam Jerusalén të myintën.

¹⁰ Ënet ja Baruc jam tsajptëjk'ëkë'ëm wya'ak'a'awëy, ma ja tëjkëtyaknën mëti'ipë tyijtëpën Jempyë Tëjk Aaw ma ja Guemarías ja tyëjkën, yë Safán yë myaank mëti'ipë jääpyën, ojts tkajpxta'ay tu'kë'ëyë ja Wintsën ja y'aaw y'ayuk mëti'ipë jap miinpën këxja'ay ma ja noky axaatsyën.

¹¹ Yë Micaías, yë Guemarías yë myaank, yë Safán y'ok'u'unk, wa'ats tmëtoowtaay ja Wintsën ja y'aaw y'ayuk mëti'ipë ja Baruc kyäjpxypën mëti'ipë jap miinpën këxja'ay ma ja noky axaatsyën,

¹² ënät ojts nyijkxy ma ja kutujkëntëjkën ma yajpaatën ja jääpyëtëjkëty. Tap ënety tu'kmukyë yajpaatë ja wintsëntëjkëty: yë Elisamá mëti'ipë jääpyën, Delaías, yë Semaías yë myaank; yë Elnatán, yë Acbor yë myaank; yë Guemarías, yë Safán yë myaank; yë Sedequías, yë Hananías yë myaank ets wiinkëtypë.

¹³ Ënet tyukmëmëtyakëtë yë Micaías ja aaw ayuk mëti'ipë ënety të tmëtoyën tkäjpxy ja Baruc ma ja naax kajpnën.

¹⁴ Ënet ja wintsëntëjkëty tkäjxtë ja Jehudí, yë Netanías yë myaank, yë Selemías yë y'ok'u'unk ets yë'ë y'u'unk y'ok yë Cusi ets t'ënëmaaytyë ja Baruc wä'än tmëjämy ja noky axaatsy mëti'ipë ënety ja naax kajpn të tukwinkajpxën. Ënet ja Baruc ojts tmënëjkxy ja noky axaatsy ma ënety jam yajpaatën.

¹⁵ Ets y'ënëmaayëtë: U'unyë xii ënyääypyäjn ets ëktukwinkukajpxëtyëkës ja noky axaatsy. Ja Baruc ojts ja noky tjanty kyäjpxy.

¹⁶ Ko jëtu'un tmëtoowtë, xim yam ja tsë'ëkë tyuktëjkëyëtë ets nyäy'ënanëtë: Kopkpëky yë yajkutujkpë yajtukmëtowa'any tu'kë'ëyë ya'atë aaw ayuk.

¹⁷ Ënet t'ënëmaaytyë ja Baruc: Tukmëmëtyaktëkës wi'ixën të mwinma'anypyatnë ets të xyjyä'äy ya'atë aaw ayuk.

¹⁸ Ënet ja Baruc y'ëtsooy: Yë Jeremías të xynyajtskajpxës ets të nkëxjaaytyä'äyës nokykyijxy ma ya'atë noky axaatsyën.

¹⁹ Ënet t'ënëmaaytyë ja Baruc: Mijts ets mëët yë Jeremías nëjkx ixtë ma mnäyu'utsëtë ets ni pën mëpaat tkanijawë ma myajpaatën.

Ma ja Joaquim yajkutujkpë tnino'okyën ja noky axaatsy

²⁰ Ja wintsëntëjkëty jap ja noky axaatsy t'ëxmajtstë ma ja Elisamá ja tyëjkën, mëti'ipë jääpyën ets ojts tninëjkxtë ja yajkutujkpë ma ja kutujktaknën ets tukmëmëtyaktë mëti'ipë ënety të tmëtowtën.

²¹ Tä ja yajkutujkpë tuknikejxy ja Jehudí ets ja noky axaatsy tmëminëty mëti'ipë ënety të tyajwë'ëmtën ma ja Elisamá ja tyëjkën, mëti'ipë jääpyën. Ko tmëmiiny, tääts ojts tukwinkukajpxë ja yajkutujkpë ets ja wintsëntëjkëty mëti'ipë jam napikëyëpën.

²² Jä'ä xëëw nëkoo ënety y'ëktëtyky'ajnë, paaty ja yajkutujkpë ënety të twinkonë ja jyëën jap tyëkoty ets jap xyämy.

²³ Ko ja Jehudí tkajpxta'ay ja noky tëkëëk taxk waats, tääts ja yajkutujkpë tuktsukë ja noky ets tjëënkupëky. Aakjëtu'un tuuntaay koonëm tno'ktaay.

²⁴ Yë yajkutujkpë ets ja wintsëntëjkëty mëti'ipë myëtoowtën wi'ix ja noky axaatsy jyä'äyëtyën, nijënu'un kyatsë'këtyë ets nitii tkamëkja'awëtyë.

²⁵ Yë Elnatán, yë Delaías ets Guemarías ojts mëktä'äky tja'ënëëmëtë ja yajkutujkpë ets këtii tno'okëty ja noky axaatsy, e yë'ë ka'ap nyi''ijxë'këtë,

²⁶ ni'ikyë ojts tni'ënä'ämë ets ja Jeremías ets ja jyääpyë Baruc yajmatstëty. Ets tuknipëjky ja Jerahmeel, yë'ë yajkutujkpëtëjk jyä'äy ets ja Seraías, yë Azriel yë myaank ets ja Selemías, yë Adbeel yë myaank. Je'eyëp ko yë Jeremías ets Baruc ojts yë Wintsën yu'utsëtë, ka'ap yajpatë.

²⁷ Tëë ënety yë yajkutujkpë tnino'oky ja noky axaatsypë ma myinyën ja aaw ayuk mëti'ipë ja Jeremías të tnajtskajpxën mëti'ipë ja Baruc jyääyën, ko jatëkok yë Wintsën ojts tmëkäjpxy yë Jeremías ets t'ënëmaay:

²⁸ Ix wiinkpë noky ets jatëkok xyjya'ajëty ja aaw ayuk mëti'ipë ijty jap miinpën këxja'ay ma ja mëjëyëjpën, mëti'ipë nyino'kën ja Joaquim jampë Judá yajkutukyën.

²⁹ Ets xy'ënëëmëty: Jëtu'un yë Wintsën y'ënä'äny: Mijts ojts xynyino'oky ja noky axaatsy ets ojts yë Jeremías xytyuk'ojy ko tjaay mëti'ipë ja Babilonyë yajkutujkpë tyunäämpyën, ko myina'any ma ja naax kajpnën ets tyajkutëkoyä'äny ets nitu'uk ja ja'ay juuky tkayajwë'ëma'any ets jëyujkpaat tyajkëjxtaja'any.

³⁰ E ka'ap wyi'ixëty, ëjts, mëti'ipë Wintsën'ajtpën, tyam mijts n'ënëëmë, Joaquim, mëti'ipë ënä'ämp yajkutujkpën ma Judá kajpnën, mijts ka'ap nëjkx yë m'u'unk m'ëna'k ets m'u'unk m'ok xymyëët'aty mëti'ipë jam ja'tëpën ma David yë kyutujktaknën. Ko ënety m'ooky, yë mjot mnini'kx jëtu'unyë nëjkx wyin'aankëtä'äky xëëny ets jëtu'unyë nëjkx tyipjuuny koots,

³¹ e mijts mëët yë mwintsëntëjk ntukumëtowantëp wi'ix të m'ëtë'ëtstën. Nyajminäämpyës yë ëyo'on jotmay ma miitsëtyën tëkokyë mëti'ipës të nikäjpxyën ma Jerusalén ja'ayëtyën ets ma Judá ja'ayëtyën, mëët ko ka'ap të mkäjpxyjyä'äkyukëtë.

³² Ënet ja Jeremías t'ijxy tu'uk yë noky ets tmooy ja Baruc, mëti'ipë yajjääpyën ets ja Baruc jatëkok tjaaytyääy wi'ix ja Jeremías y'ënä'änyën, yë'ë ja aaw ayuk mëti'ipë ënety jap të t'ëkjääpyën ma ja mëjëyëjpën mëti'ipë Joaquim yajkutujkpë nyino'kën. Ojts yë Jeremías tjaakyajkëxja'ayë wiinkpë aaw ayuk jëtu'unpë kyäjpxyën.