Jeremias 35 - Biblia Dc en Mixe de Quetzaltepec

Ma Jeremías yajpaatyën mëët yë Recab ja'ayëty

¹ Ma ënety yajkutukyën yë Joaquim, yë Josías yë myaank mëti'ipë Judá ënä'ämpën, jääjës ojts yë Wintsën xymyëkäjpxy etsës xy'ënëmaay:

² Nëjkx jam ma Recab ja'ayëtyën ets xy'ënëëmëty wä'än tmintë ma tsajptëjkën, jap tëkoty xykyuwowëty ets xymyo'ojëty yë tsatym nyëë mëti'ipë tëë nyimaanaxyën.

³ E ëjts Jeremías, ojtsës ninëjkxy yë Jaazanías yë myaank yë nmëxëëwës mëti'ipë näjyëtu'un xyëëwajtypyën Jeremías ets Habasinías yë y'okmaank ets myëkä'äxtëjk ets y'u'unk y'ëna'k ets tu'kë'ëyë ja'ayëty mëti'ipë Recab ja'ay'ajtëpën,

⁴ ets ojts nwoownëjkxtës jam ma tsajptëjkën, jap tëkoty nkuwo'owëtyës yë Hanán y'u'unk y'ëna'këty, yë Igdalías yë myaank mëti'ipë ijty Dios y'ëwtajtypyën. Yë ya'atë tëkot akojmuky mëët yë tyëkot ma kopktëjkëty y'itën mëti'ipë ma tsajptëjkën tuuntëpën, jam yajpaaty ma Maaseías kopkën, yë Salum yë myaank mëti'ipë ijty këwent'ajtpën ma tsajptëjk yajnitëkën.

⁵ Täätsës yë Recab ja'ayëty të nmo'otë nëëtu'ts ets a'ukën ma t'atämëtëty yë tsatym nyëë mëti'ipë tëë nyimaanaxyën, etsës të n'ënëëmëtë: Tyaa mtsatsym nyëëjëty, uuktë.

⁶ Tää y'ëtsoowtë: Ëëtsëty ka'apës yë tsatym nyëë n'uuktë mëti'ipë tëë nyimaanaxyën, jä'ä ko yë Jonadab, yë Recab yë myaank, mëti'ipës nteety'ajt n'ap'ajtëpën ojts t'akajpxtuky, ko ëëtsëty nijëna'ajës mëpaat nka'uuktë yë tsatym nyëë mëti'ipë tëë nyimaanaxyën.

⁷ Ojts näjyëtu'un t'akajpxtuky ko ka'apës mëpaat njëën ntëjk nkojtë ets ka'apës mëpaat ni'iptë nkojtë ëkë npäntë nkojtë oynatii ujts ijxtëm yë tsatsymyën. Jëtu'un ojts xy'ënëëmëtës ko je'eyë mëpaat ëëts nnänyikämëtë, jëtu'unts jeky njuuky'atëtyës yaa naaxwiiny maas njëtitën tä jaaypyaat jaaypyo'kxyën.

⁸ Ëëtsëty yë'ë nmëmëtoowtëpës ets ntuuntëpës mëti'ipë ojts yë n'ap n'okëtyës Jonadab xytyuk'ënä'ämtën, paaty ka'ap nijëna'a n'uuktës yë tsatym nyëë mëti'ipë tëë nyimaanaxyën, ëëtsëty ets nto'oxytyëjkëtyës ets n'u'unk n'ëna'këtyës ka'apës tääpë tsatym nyëë n'uuktë,

⁹ yë'ëpaat yë njëën ntëjkëtyës ka'apës nkojtë ets ka'apës niyu'u nitunëtë yë tsatsymkyam ëkë wiinkëtypë aay ujts.

¹⁰ Yë'ës ntuktsëna'ayëtëp wit tëjk ets yë'ëjës npatuuntëp tu'kë'ëyë ja ënä'ämën mëti'ipë yë n'ap n'okëtyës Jonadab ojts ni'ënä'ämën.

¹¹ E ko yë Nabucodonosor, Babilonyë yajkutujkpë ojts tukja'ty ya'atë naax kajpn, ënätës ojts nmintë yaa Jerusalén yë'ëjës nkukäktëp ja tsiptuunpëtëjk ja Caldeo ja'ayëty ets Siria ja'ayëty; paatykyëjxm ëëts yaajëty Jerusalén.

¹² Ënet ja Wintsën ojts tmëkäjpxy ja Jeremías ets t'ënëmaay:

¹³ Ëjts Wintsën mëti'ipë maaytyääyëpën winë ets mëti'ipë yë Israel ja'ayëty Tyios'ajtëpën, tyam ntuknipëky ets xy'ënëëmëty yë Judá ja'ayëty ets Jerusalén ja'ayëty: Wä'än tjatë ets tni''ijxtu'utë ja n'ënä'ämënës. Ëjts Wintsën, ëjts ënaanp.

¹⁴ Yë Jonadab yë y'u'unk y'ok, yë Recab yë myaank, yë'ë pyatuuntëp ja ënä'ämën mëti'ipë ënaanpën ko ka'ap mëpaat yë tsatym nyëë t'uuktë mëti'ipë tëë nyimaanaxyën, jä'ä ko jëtu'un ja y'aptëjk ojts tni'ënä'ämë. Ëjts nän tëë miitsëty yë ënä'ämën njamo'otë kanaak ok, je'eyëp ko ka'ap të xypyatuntë.

¹⁵ Kanaak ok të njatuknikäxtë yë nkäjpxynyajxpës ets të mja'ënë'ëmxëtë: Ixmatstë m'ëxëëktu'un m'ëxëëk kajpxënëty. Këtii wiink tios xypyanëjkxtëkëtë ets këtii yë'ë wyintsë'kën xymyo'otë. Jëtu'un jeky mjuuky'atëty ma ja it naaxwiinyëtën mëti'ipës nmooytyën ja m'ap m'okëty. E miitsëty ka'ap të xyjyä'äkyukëtë ja n'aaw n'ayukës ets ka'apës të xymyëmëtowtë.

¹⁶ Yë Jonadab yë y'u'unk y'ok, mëti'ipë yë Recab y'u'unk'ajty y'ok'ajtypyën, tyuuntëp jëtu'un winë ijxtëm ojts tyajwë'ëmyën ja ënä'ämën; e yë Israel ja'ayëty ka'apës të xymyëmëtowtë.

¹⁷ Paaty ëjts maas nWintsën'atyën, mëti'ipë maaytyääyëpën winë, jëtu'unës n'ëna'any: Nkäxäämpyës ja ëyo'on jotmay ma Judá ja'ayëtyën ets ma Jerusalén ja'ayëtyën tëkokyë mëti'ipës të nikäjpxyën. Jä'ä ko miitsëty tëë njamëkajpxtë ka'apës të xy'ëtsowtë; tëë njayaxtsowtë miitsëty ka'apës të xynyimintë.

¹⁸ Ojts näjyëtu'un yë Jeremías t'ënëëmë yë Recab ja'ayëty: Yë Wintsën mëti'ipë maaytyääyëpën winë, mëti'ipë yë Israel ja'ayëty Tyios'ajtëpën, jëtu'un y'ënä'äny: Miitsëty mëët ko yë'ë xypyatuntë ja ënä'ämën mëti'ipë ja m'ap m'ok Jonadab ojts mtukmëwë'ëmëtën.

¹⁹ Ëjts Wintsën mëti'ipë maaytyääyëpën winë, mëti'ipë yë Israel ja'ayëty Tyios'ajtëpën, tyam n'ënëëmëtë ko ka'ap tyëkoy'ata'any yë Jonadab yë y'u'unk y'ok mëti'ipë ëjts xëmë xymyëtuntëpën.