Jeremias 33 - Biblia Dc en Mixe de Quetzaltepec

Ma yajnikäjpxyën ko y'oyëja'any jatëkok ja juukyajtën

¹ Tsumy matsy ënety y'ity ja Jeremías jam ma ja kyëwent'ajtpëtëjk y'itën, jam ma ja kutujkëntëjkën, ko ojts ja Wintsën jatëkok myëkäjpxyë ets y'ënëmaayë:

² Ëjts, mëti'ipë Wintsën'ajtpën, mëti'ipë yajkojën yë naaxwiinyëtë, mëti'ipë y'oytyuunën ets pyëjktakën ma tyam yajpaatyën, jëtu'un n'ënëëmë:

³ Ëjts mëkajpxk ets n'ëtsowëty ets ntuk'ixëty mëjwiinpë këjääpë ja winma'any mëti'ipë yu'utsy'ijtpën, mëti'ipë ka'ap xynyijawën.

^4-5 Ëjts Wintsën, mëti'ipë yë Israel ja'ayëty Tios'ajtëpën, nmëëtës ja aaw ayuk maas nikajpxa'anyën wi'ix ja Jerusalén kajpn ets Judá yajkutujkpëtëjk jyata'antën. Ko tjanitsoontëty ja caldeo ja'ay mëti'ipë jam kajpnpë'am të nyäpyëjkta'akëtën ets tëë twinwëëtëtë ja potsy ets ja naax kajpn tnitëkëja'antë, je'eyë nëkoo tnitsoona'antë ets yaj'ookëtëty. Ëjts mëj këjääjës nmëëtëty ja tsip äkë ma yë'ëjëtyën, tëëjës ja njot nwinma'any njëpëky ma kyajpnëtyën jä'ä ko je'eyë ja nëë poky të tuntë.

⁶ E nyajtso'okäänpyës jatëkok, nmo'ojäämpyës ja oy'ajt mëk'ajtën ets xoontä'äky jyuuky'atëty.

⁷ Nyajtëkatsäämpyës yë Judá ja'ayëty ets Israel ja'ayëty yë jyuuky'ajtënëty etsës jatëkok nyaj'oyëja'any tä ijty tëëyëpën.

⁸ Nma'kxta'ajäämpyës tëkokyë yë pyokyëty mëti'ipë të tuuntëkoytyën maas ëjtsën; nimä'kxta'ajäämpyës tëkokyë y'ëxëëk winma'any ets ko të xykyäjpxy kumëtoownaxtës.

⁹ Yë Jerusalén kajpn nëjkxëpës mëj këjää ntukxoontä'äky, nëjkxëp jam yaj'ixy ja nmëj'ajt n'oyajtënës ets nijawëtëty tu'kë'ëyë ja naax kajpn. Nëjkxëp tsyë'ëkëtë ko ënety tnijawëtë wi'ix ja Jerusalén kajpn tpaatyën ja näypyutëkë maas ëjtsën ets wi'ix të jyotkujkta'aktën.

¹⁰ Jëtu'un yë Wintsën y'ënä'äny: Miitsëty jëtu'un m'ëna'antë ko ya'atë itjot aanë'ëk tëëtsë'ëk yajpatnë, ko ka'ap pën ja'aynyë ets ka'ap tii jëyujknë; ko yë Jerusalén kajpn ets Judá kajpn tukwa'ats të y'awinpity, ko ka'ap jap tii ja'aynyë ets ka'ap jap tii jëyujknë. E yajmëtowaanp jatëkok

¹¹ ja ëy xoontä'äky ets xuxën wojpën. Nëjkxëp ja pëjkpë ukpë yajwinxoonta'aktë ets ja ja'ay tyaka'antë ja wintsë'kën, tyajnaxa'antë ja kukajpxën.

¹² Yë Wintsën mëti'ipë maaytyääyëpën winë jëtu'un y'ënä'äny: Ma ya'atë kajpnën, ma tyam aanë'ëk tëëtsë'ëk yajpaatyën, ma ka'ap yë ja'ayën ets ka'ap yë jëyujkën, yonaanp jiitsaanp jatëkok yë mëëy ets aay ujts, nëjkxëp yë ja'ayëty jatëkok tyaj'ok tyajwëtstë yë kyupixynyëty.

¹³ Ma ja kajpnëtyën mëti'ipë ets joyjyotm yajpatëpën, ma Négueb ets Benjamín y'itjotmën, jampaat ma Jerusalén ets Judá nyaaxjotmën, yonaanp jam jatëkok yë mëëy ets aay ujts mëti'ipë jyë'kxtëpën yë kupixyny, nëjkxëp jatëkok yë ja'ayëty jam tmëtyowtë yë kyupixynyëty mëti'ipë kyëwent'ajtëpën. Ëjts Wintsën, ëjts ënaanp.

¹⁴ Jëtu'un yë Wintsën y'ënä'äny: Pyatäämpy yë xëëw po'o maas nyajkëta'aka'anyën ja kënu'kxën jëtu'un ijxtëmës ojts ntukwinwanëtën yë Israel ja'ayëty ets Judá ja'ayëty.

¹⁵ Ko ënety tpaaty ja xëëw po'o, ëjts nyajkutukäämpyës ets jam tu'uk ja'ay pyëtsëmëty ma David y'u'unk y'okën mëti'ipë nëjkx mëtëy winë tnipaye'eyën ets nëjkx oy winë tuny ma naax kajpnën.

¹⁶ Jä'ä xëëw ëwaatsëtuuy nëjkx Judá yajpaaty ets Jerusalén jotkujk nëjkx y'ity. Jëtu'un nëjkx tijtë: Yë Wintsën yë'ë xyajmëtakëm.

¹⁷ Ëjts, mëti'ipë Wintsën'ajtpën, jëtu'unës n'ëna'any: Nijëna'a kyatëkoy'ata'any yë David yë y'u'unk y'ok mëti'ipë nëjkx y'ëne'emy yajkutukyën ma Israel yë kyutujktaknën,

¹⁸ nän ka'ap tyëkoy'ata'any yë teetytyëjkëty ets Leví ja'ayëty mëti'ipë winjëpom yaktëpën ja wintsë'kën no'okpyë xämpyë, yë aaypyajk ujtspajk mëti'ipës yajtukwintsë'këpën, ëpëky wiinkëtypë wintsë'kën mëti'ipës xymyooytyëpën.

¹⁹ Ojts ja Wintsën tmëkäjpxy yë Jeremías ets t'ënëmaay:

²⁰ Ëjts, mëti'ipë Wintsën'ajtpën, jëtu'unës n'ëna'any: Tsip ets y'atëkoyëty ja käjpxytyu'unën mëti'ipës të ntunyën mëët ja xëënyajtën ets ja kootsajtën, jëtu'un ijxtëm yaj'ëwxityën jëna'a xyiinyë ets jëna'a kyootsën.

²¹ Timjëtu'un yaj'ëwxity jëna'a tyunyë jyätyë ja käjpxytyu'unën mëti'ipës ntuunën mëët ja ntuunpës David. Ka'ap tjëkyepy wiink ja'ay jam y'ënä'ämëty ma ja David ja kyutujktaknën ets wiink ja'ay tyeety'atëty ets y'itëty Leví ja'ay mëti'ipës xymyëtuuntëpën.

²² Yë ntuunpës David yë y'u'unk y'ok ets Leví y'u'unk y'ok mëti'ipës xypyukë'ë xypyuwijtsëpën, yajxonës nyajnimayëja'antë tä mëtsa'a yaj'ixyën jam tsajpjotm ets tä yë nëë ajinën mejypyë'aaypyë kyëxë'ëkyën, mëti'ipë ni pën kyamayëtëty tmëtsyowëty.

²³ Ojts yë Wintsën tmëkäjpxy yë Jeremías ets t'ënëmaay:

²⁴ ¿Tëë xymyëtoy ko ja'ay y'ëna'antë ko ëjts tëëjës n'ëxmajtsnë ja nimäjtskpë ja kutujktakn mëti'ipës ojts nwin'ixyënë? Paatykyëjxm t'ëxëëk'ijxnëtë ja nnaax nkajpnës ets ka'ap t'ëk'mëj'ijxnëtë ko nyaax kyajpnëty.

²⁵ Ëjts mëti'ipë Wintsën'ajtpën, jëtu'unës n'ëna'any: Ëjts të ntuny ja käjpxytyu'unën mëët ja xëënyajtën ets ja kootsajtën, ëjts näjyëtu'un të mpëjktä'äky ja ënä'ämën ets ja tsajp ets ja naaxwiinyëtë yajpaatëty ma jam y'itën,

²⁶ nijëna'ajës nka'ixtija'any yë Jacob ets ntuunpës David yë y'u'unk y'ok, ka'apës nijëna'a ntu'u'ëtuka'any yë Abraham, Isaac ets Jacob y'u'unk y'ok ets yajkutuktëty. Jä'ä ko npa'ëyoowtëpës paaty jatëkok nyajjotkujkëja'antës.