Jeremias 32 - Biblia Dc en Mixe de Quetzaltepec

Ma ja Jeremías nyaaxjuyën

¹ Ojts yë Wintsën tmëkäjpxy yë Jeremías ma ënety majk jëmëjt y'apetyën ma tyëkën yajkutujkpë yë Sedequías jam Judá; yë Nabucodonosor mëmajkmokx tëkëëk jëmëjt ënety yajkutuky.

² Jä'ä xëëw jä'ä jëmëjt tëë ënety yë Nabucodonosor yë tsyiptuunpëtëjk tyajnatuktë yë Jerusalén kajpn, yë Jeremías käjpxynyajxpë tsumy ënety y'ity jam ma këmoontëjk ja nyitëja'awën.

³ Yë Sedequías yajkutujkpë yë'ë ojts nyi'ënä'ämëty ets yajtsum yajmatsëty, jä'ä ko y'ënä'äny: Jëtu'un yë Wintsën tnikäjpxy: Ëjts nyajkutukäämpy ets ya'atë naax kajpn jam kya'ajëty ma Nabucodonosor kyë'ëjotmën mëti'ipë jam Babilonyë yajkutujkpën,

⁴ ets Sedequías yajkutujkpë ka'ap nëjkx myäyë tkukä'äkëty yë caldeo ja'ay, nëjkxëp yë Babilonyë yajkutujkpë myätsyë ets kwanë nëjkx twinkuwa'akë.

⁵ Yë Nabucodonosor jam yë Sedequías tyajnëjkxa'any Babilonyë, jeky jam tyaj'ita'any koonëmës jatëkok nwinpitëty. Oy miits jënu'un xyjyanipëtë'ëktëty yë Caldeo ja'ayëty, ka'ap myajmëta'aka'anëtë. Ëjts Wintsën, ëjts ënaanp.

⁶ Ets y'ënäny yë Jeremías: Ojtsës yë Wintsën xymyëkäjpxy etsës xy'ënëmaay:

⁷ Ëk'ix, tää yë m'uty Hanamel mnimina'anyë, yë mjämy Salum yë myaank ets mtuk'ëwaanëja'anyë ko naax tu'uk tyookäämpy ets jeexyë mijts xyjyuy mëti'ipë jam Anatot myëët'ajtypyën. Mijts mpaatëp xyjyuyëty jä'ä ko mijts winkon mtimyëku'uk'ajtyp.

⁸ Jëtu'un tä ënety yë Wintsën të xy'ënëëmënës, ojts ja n'utyës Hanamel jyänty myiny, jamës xynyimiiny maas ënety jam tsumy n'ityën, jam tëjk'ëkë'ëm ma ja tsiptuunpë y'itën ets xy'ënëmaayës ko naax tu'uk tyookäämpy etsës ëjts njuyëty, ja naax jam Anatot yajpaaty ma ja itjot naaxjotmën mëti'ipë yë Benjamín ja'ayëty nyitënaaytyëpën, tääpë naax kam xypyatpës ëjts njuyëty jä'ä ko winkonës ntimmyëku'uk'aty. Koos nja'akyujkëy ko Wintsën jëtu'un të tyajnikutukë,

⁹ ojtsës ja naax njuy mëti'ipë ijty jyä'ä'ajtypyën ja n'utyës Hanamel. Jä'äjës ojts nkujuuyë majkmokx mäjtsk, aakyë'ë poop pujxn meeny.

¹⁰ Jëtu'unënës ojts nkäjpxy'atë ets tu'uk yë noky nyajpëtë'ëktëtyës yajxon oytyuny, tsa'ay pëky ets mëët ja ijxpë nija'apë.

¹¹ Mäjtsk ojts npapëkyës ja naax ninoky, tu'uk mëti'ipë tsa'ayën ets jap myiinta'ay ja aaw ayuk wi'ixjaty ënety të yajnimëtyä'äkyën ets tu'uk ka'apë tsyä'äyëtyën,

¹² ets nmooyës ja Baruc, yë Nerías yë myaank, yë Maaseías yë y'ok'u'unk jam n'utyës Hanamel wyintum ets näjyëtu'un ma ja mëti'ipë y'ijxtë nyija'awëtën ja noky wi'ix ënety të kyojyën ets wi'ix të yajwinkäätsën ma tëkokyë ja jutiiyë ja'ayëtyën mëti'ipë jam tëjk'ëkë'ëm po'kxtëpën.

¹³ Aaktam ënety yajpaatë koos t'ënëmaay ja Baruc:

¹⁴ Yë Wintsën mëti'ipë maaytyääyëpën winë, yë Israel ja'ayëty yë Tyiosëty, jëtu'un y'ënä'äny: Mäjtsk xyjyä'ä'atëty ya'atë noky, tu'uk mëti'ipë tsa'ayën ets tu'uk ka'apë tsyä'äyëtyën ets jap xy'apëkëty tu'tsjoty ma ka'ap wi'ix jyatëtyën ets jap y'itëty pëjkë'ëky jeky.

¹⁵ Jä'ä ko yë Wintsën mëti'ipë maaytyääyëpën winë, mëti'ipë yë Israel ja'ayëty Tyios'ajtëpën, jëtu'un y'ënä'äny: Ma ya'atë naax kamtëjkën nëjkxëp jatëkok yaa naax kam yajjuy yajkëpety ets nëjkx yë jëën tëjk yajkojy yajmä'kxy ets nëjkxëp yaa jatëkok ja tsatsymkyam yajpëjktä'äky.

Tsajpkäjpxy mëti'ipë Jeremías jyä'ä'ajtypyën

¹⁶ Koos yë Baruc ntukë'ëtëjkëy ja naax ninoky mëti'ipës ënety të njuyën, ënät ojts yë Wintsën nmëkäjpxyës ets n'ënëmaayës:

¹⁷ Mijts Wintsën, mëët ja mëk'ajtën ets ja kuttujkën të xyajkojy ja tsajp ets naaxwiinyëtë, ka'ap nitii tsip xyjyawë.

¹⁸ Kanaak najtskä'äxë mijts ja mtsojkën mja'awën xyaj'ity, je'eyëp ko mtëytyuunpy ja ja'ay mëti'ipë tyeety tyaak pyojkpyën. Dios mëjpë ets mëti'ipë maaytyääyëpën winë, jä'ä mijts mxëëwajtyp Wintsën mëti'ipë maaytyääyëpën winë.

¹⁹ Mëj këjää winë xynyimay xynyitajë ets ko tii xytyuny mëët yë mëk'ajtën ets kuttujkën. Mijts wa'ats xynyija'awëtyä'äy tiijaty yë ja'ay tyuuntëp ets jënu'un winë xymyo'oy xykyexyën.

²⁰ Ojts jap Egiptë yë mmëjajtën mkutujkën xyaj'ixyë, tyampaat je'eyëm xyaj'ixyë ma Israel kajpnën ets ma nitëkokyë ja'ayëtyën, jëtu'un'äämpy yë mxëëw mëj yajëkyepy oymyaajëty.

²¹ Mijts ojts yë Israel kajpn xyajpëtsëmy jap Egiptë mëët yë mëk'ajtën kuttujkën ets xyaj'ijxë yë mmëjajtën wi'ix kawi'ixëty, wa'ats yë ja'ay xy'atsë'këtyääy.

²² Ets xymyooy yë Israel ja'ayëty ya'atë it naaxwiinyëtë ma tsi'tsknëë ets uuxpa'ak pyëyi'ikyën tä nëëjën, timjëtu'un tä ojts xytyukwinwanën yë y'ap y'okëty.

²³ E ko jyajtë jam ma ja it naaxwiinyëtën mëti'ipë ënety të xymyo'oyën ets tpëjktaaytyë ja nyaax kyamëty, ka'ap ojts m'ëk mëmëtoowënëtë ets ka'ap ojts jëtu'un t'ëktuunëtë tä ënety të m'ënë'ëmxëtyën, nimëti'ipë tkatuuntë mëti'ipë mjatuk'ënëmaayën. Paaty xytyuknikejxy ja ëyo'on jotmay mëti'ipë tyam tuunëpen jajtëpën.

²⁴ E yë Caldeo ja'ayëty tëë twinwë'tëtya'atë ja kajpnpa'a ets tnitëkëja'antë, yë tsip, yuu xëëw ets pa'am ëyo'on, yë'ë ënät mëk tëytyunëp ets mëtsip myëta'aktëty. Wintsën, tää xy'ixy ko jëtu'un tyunyë jyätyë tä të m'ënanyën.

²⁵ E mijts Wintsën, ni'ikyës të xytyuk'ëne'emy etsës njuyëty tääpë naax ma ja'ay t'ixtëtyën ets nijawëtëtyën, wa'ats xynyijawë ko yë Caldeo ja'ayëty yë'ë ëëts xymyëmëta'akantëp.

²⁶ Ënet ja Wintsën t'ëtsooy ja Jeremías:

²⁷ Ëjts jëtu'un Wintsënajtp, mëti'ipë Tyios'ajtëpën tëkokyë juukpyë. Nitii kyatsiptä'äky mëët ëjts.

²⁸ Paaty n'ënëëmë: Ëjts nyajkutukäämpyës ets ya'atë naax kajpn yë Nabucodonosor myëmëta'akëtëty, mëti'ipë jam Babilonyë yajkutujkpën ets ma Caldeo ja'ayëtyën.

²⁹ Yë Caldeo ja'ayëty mëti'ipë jam nyitëkëjantëpën yë Jerusalén kajpn, ko ënät tnitëkëtëty, tääts tjëënmo'oja'antë ets tnino'kta'aja'antë, näjyëtu'un ja jëën tëjk ma ijty jam tëjkëjxm tmo'otën yë Baal yë wyintsë'kën, ma tukwinjoktën ja poom ets tsatym nyëë tëëpë nyimaanaxyën, mëti'ipës ojts xytyuk'yajjoot'anpëktën.

³⁰ Tyimtso'ontäky yë Israel kajpn ets Judá kajpn yi'iyë tyuuntëp ka'apës n'oy'ixyën; yë Israel kajpn xëmë yë'ë xytyuk'yajjoot'anpëktës ko t'ëwtatë awinax mëti'ipë yë'ë kë'ëm yajkojtëpën. Ëjts Wintsën, ëjts ënaanp.

³¹ Maju'unëm ya'atë naax kajpn tsyo'ontä'äkyën, xëmë je'eyë xyajjoot'anpëkyës ets jëtu'un tyampaat. Paaty n'ëna'anyës koos nyajkutëkoyä'äny

³² tëë tyajma'atë ja njot nwinma'anyës ko yi'iyë tyuuntëp kyajpxtëp ëxëëkpë tëkatsypë, yë Israel ja'ayëty ets Judá ja'ayëty, yajkutujkpëtëjk, kopktëjkëty, teetytyëjkëty, käjpxynyajxpëtëjkëty ets tu'kë'ëyë Judá ja'ayëty ets Jerusalén ja'ayëty.

³³ Jyëxkës të xytyuk'akëyëtë, ka'ap yë wyiin jyëjp të tyaktë. Ëjts xëmës të njamo'otë oypyë aaw ayuk ets jeexyë jyuukyajtën tyaj'oyëtë, yë'ëjëty ka'ap nijënu'un tmëjpëjkta'aktë ets ka'ap tsojkën'atë jyuukyajtën tyaj'oyëtëty.

³⁴ Ni'ikyë të tjaamtään të tnaaxtääntë yë ntsajptëjkës mëti'ipës ojts ëjts nyajtuknikojën, ko jap të tpëjktaknëtë ja awinax.

³⁵ Tëë jam näjyëtu'un yë Baal wyintsë'këntyakn tkojëtë ma Ben-hinom Joyjyotën. Jamts yë y'u'unk y'ëna'k të tyaktë kë'ëy xo'oxy ye'etyëjkpë to'oxytyëjkpë ets të tukwintsë'ëkëtë ja Moloc ets jëtu'un tyajpokytyuntë ja Judá ja'ayëty; tëë tuntë ja mëti'ipës ënety ka'ap të ni'ënä'ämën ets mëti'ipës ënety ka'ap të nmay të ntajyën.

Ma yaj'akäjpxyën ko ja juukyajtën y'oyëjä'äny

³⁶ Ëjts, mëti'ipë Wintsën'ajtpën, mëti'ipë yë Israel ja'ayëty Tyios'ajtëpën, jëtu'unës ya'atë naax kajpn nikäjpxy mëti'ipë ja Babilonyë yajkutujkpë nyiwa'akäämpyën mëët ko jyää'ata'any ja jëën tsip, yuu xëëw ets pa'am ëyo'on:

³⁷ Nyajtu'ukmukäämpyës yë jyä'äy mëti'ipë xii yaa muum yajpatëpën wiink naax wiink kajpn, maas nnajtswojpëtyën koos ojts ntukjoot'anpëktë ets jatëkok nyajwinpita'antës ma nyaax kyajpnëtyën ets jam jotkujk jyuuky'atëty.

³⁸ Nëjkxëp yë'ë nkajpniwa'anyës etsës nëjkx xyTyios'atë.

³⁹ Ëjts kë'ëm nyajkutukäämpy ets yi'iyë tmëmay tmëtajtëty wi'ixës xyajmëjnaxtëtyën ets oy jyuuky'atëty, näjyëtu'un yë y'u'unk y'okëty.

⁴⁰ Ntunäämpyës yë käjpxytyu'unën mëët yë'ëjëty mëti'ipë xëmë itëpën: tyamës n'ënëëmëja'antë ko xëmës oy nyajjuuky'atanëtë ets nyajkutukäämpyës ets ëjts xëmë xyjyot'atëty ets xytyukxoonta'aktëtyës ets ka'ap nëjkx xy'ëkpuwa'ktutnëtës.

⁴¹ Ëjts oyës nëjkx nnäjyawëty ko ënety oy jyuuky'atë, winë aaw winëjot nëjkx yaa nyajtsëënëtës ma ya'atë naax kajpnën.

⁴² Ënet ja Wintsën jyaak'ënany: Jëtu'un tääjës mëj këjää yë ëyo'on jotmay të nkexyën ma ya'atë kajpnën, näjyëtu'unës yë oypyë ntuknikäxa'antë mëti'ipës të ntukwinwanëtën.

⁴³ Ets ma ya'atë naax kajpnën mëti'ipë të xynyikäjpxyën ko aanë'ëk tëëtsë'ëk wyë'ëma'any, ko kyëjxta'aja'antë yë ja'ayëty ets jëyujkëty ets ko yë Caldeo ja'ayëty myëmëta'aka'anëtë; nëjkxëp jatëkok yajjuy yajkëpety ja naax kam yaa.

⁴⁴ Nëjkxëp yajjuy yajkëpety yë naax kam ets nëjkx yajxon yë nyinoky yaj'oytyuny tsa'ay pëky mëët ja mëti'ipë ijxp nija'apën. Ya'atë jam jëtu'un tyuna'any jyata'anyë ma Benjamín y'itjotmën, ma Jerusalén pya'a nyuxën ets Judá nyaax kyajpnën, jëtu'un mëti'ipë tunjoty kopkjotyën ets jëtu'un mëti'ipë joyjyotyën; näjyëtu'un mëti'ipë jam Négueb yajpatpën, jä'ä ko ëjts nyajkutukäämpyës ets nëjkx tëkatsy jyuuky'ajnëtë. Ëjts Wintsën, ëjts ënaanp.