Jeremias 31 - Biblia Dc en Mixe de Quetzaltepec

Ma ja Israel ja'ayëty wyimpijtnëtën nyaaxjoty kyajpnjoty

¹ Jëtu'un yë Wintsën y'ënä'äny: Ya'atë jëmëjt ëjts Tios'ataanp ma tëkokyë yë Israel ja'ayëtyën ets yë'ëjëty jëtu'unës nyajnaxa'antë tääjës yë nnaax nkajpnën.

² Jëtu'un yë Wintsën y'ënä'äny: Ëjts oyës ojts yë njot nwinma'any nyajkëxë'ëky jam të'ëts'itjotm mëët ja naax kajpn mëti'ipë kyukäktën ja o'kën. Ma ënety ja Israel kajpn t'ixta'ayën ja po'kxtakn,

³ jam jëkäm ma Israel ja'ayëty yajpaatën, jamës ojts nnäynyikëxë'ëkyë. Jëtu'un xy'ënëmaayës: ëjts xëmës mijts ntsoky njawë; paatykyëjxm tyampaat jëtu'unpë jot winma'any nyajnikëxë'ëkyës.

⁴ Tëë jatëkok nyaj'oyës ja mnaax mkajpn. Ets mminëty jatëkok akujk jotkujk mëët ja xuxn, ak ets äjtspë pujtpë.

⁵ Ets xykyojëty xymya'kxëty jatëkok ja m'tsatym ma Samaria kyopk jotmën, ja mëti'ipë tsatym kyojtëpën jotkujk, nëjkxëp tukxoonta'aktë.

⁶ Jä'ä ko pyatäämpy ja xëëw jëmëjt jëna'a ja këwent'ajtpë y'ëna'ana'antën jam ma Efraín yë it naaxwiinyëtë tnitänën: Mintë ets jam nja'amëty Sión, ja'am n'ëwtajtëm ja Wintsën mëti'ipë Tios'ajtpën.

⁷ Jëtu'un yë Wintsën y'ënä'äny: Ëwtë akujk jotkujk, tukxoonta'aktë yë Jacob yë nyaax kyajpn mëti'ipë tu'uk je'eyë kajpn'ajtpën ets mëj'äämpyë y'ityën ma wiinkëtypë naax kajpnën. Mëk ëwtë ets mëjjaw kënu'kxyjyawëtë yë Wintsën, wä'än ja'ay tmëtowtë ets m'ëna'antëty: Tëë yë Wintsën tyajtso'oky yë nyaax kyajpn, niwäänëpë ënety të jyaakwë'ëmtën ma Israel ja'ayëtyën.

⁸ Nyajwinpitäämpyës jatëkok, ma yajpaatën tsumy matsy jam kajpntum anëkëjxmtsow, nyajtu'ukmujkta'ajäämpyës oy ënety jam muum jëkäm yajpaatë ma naaxwiinyëtë jyëjpkëxyën. Ko ënety wyimpitë, nëjkxëp pyaminëtë ja'ay mëti'ipë wiintsën, tekymya'atën, näjyëtu'un to'oxytyëjkëty mëti'ipë ënety u'unkpaataanpën, mëti'ipë tëë y'u'unkpaatën; yajxon yë ja'ay nëjkx nimay myintë.

⁹ Tam mëti'ipë minaanpën kajpxtakp, tam mëti'ipë minaanpën jëëpy yaxp. Jamës nyajnëjkxa'antë ma nëë ka'ap y'ëmaayëtyën ets Joytyuuyës nyajye'eya'antë këtiipë y'anäp y'atä'pxëtëty, jä'ä ko ëjts yë Israel kajpn xytyeety'ajtp ets Efraín yë'ëjës nkä'äxkopk'ajtyp.

¹⁰ Naax kajpnëty, mëtoow'itë yë Wintsën yë y'aaw y'ayuk ets näjyëtu'un xynyikajpx xynyimëtya'aktëty ma wiinkëtypë kajpnën mëti'ipë jëkäm yajpatëpën: Yë Wintsën yë'ë ojts t'awojpwä'kxy yë Israel kajpn, je'eyëp ko nän yë'ë jatëkok yajtu'ukmukäämpy ets tkëwent'ata'any jëtu'un tä tu'uk yë kupixyny këwent'ajtpë tkëwent'atyën yë jyëyujk.

¹¹ Yë Wintsën tëë tyajtso'oky yë Jacob yë nyaax kyajpn, tëë tyajpëtsëmy jam ma ja mëkpë ja naax kajpnën.

¹² Minantëp yaa ma Sión kajpnën ets y'ëwa'antë akujk jotkujk, yë'ë tyukxoonta'akantëp ko ënety ja Wintsën të myo'ojëtë ja tsajpmok, ja tsatym nyëë tëëpë nyimaanaxyën, ja olivë on, ja kupixyny ets tsajpkaa. Jëtu'un nyaxa'antë tä tu'uk kam tu'ujën mëti'ipë xëmë yajnëëkuwoopën, këtiipë myëjaawkëxtëty.

¹³ Akujk jotkujk nëjkx ja to'oxy'ëna'k y'ätstë, näjyëtu'un ja yä'äy'ëna'këty ets ja mëjja'aytyëjkëty. Ëjts nyajjotkujkëjantëp: xikën ëwë'kën nyaj'awinpita'anyës yë jyi'iyënëty yaxënëty, mëj këjää nëjkx nyajjotkujkta'aktës, këtiinëm ko të y'ëyowtë.

¹⁴ Ëjts nyajkutukäämpy ets ja teetytyëjkëty jotkujk kyäytyëty y'uuktëty ets ja nnaax nkajpnës tukxoonta'aktëty mëti'ipës nmooytyëpën. Ëjts Wintsën, ëjts ënaanp.

¹⁵ Jëtu'un yë Wintsën y'ënä'äny: Jam tu'uk mëto'owën të tsyoony Ramá, ja'ay jam jëëpy yaxp mon tuk. Yë Raquel jam nyiyäxyp yë y'u'unk y'ëna'k ets ka'ap të tsoky pën yaj'ëmonëtëty, jä'ä ko tëë ja y'u'unk y'ëna'k y'o'kta'ay.

¹⁶ E ja Wintsën jëtu'un y'ënë'ëmxëty: Raquel, këtii nëkoo mjë'ëy myä'äxy; këtii nëkoo mwiinnëë xytyemy xyjye'etsy, mijts tëë m'ëyo'onpaaty, mpatäämpy jatëkok ja jotkujk'ajtën: yë m'u'unk m'ëna'k tsoonantëp jam ma ja mëtsip ja nyaax kyajpnën. Ëjts Wintsën, ëjts ënaanp.

¹⁷ Miimp ja xëëw jëmëjt ma jatëkok mjotkujkta'akëtyën: yë m'u'unk m'ëna'k winpitantëp jatëkok ma nyaax kyajpnëtyën. Ëjts Wintsën, ëjts ënaanp.

¹⁸ Tëës yë Efraín yë y'u'unk y'ok nmëtoowë wi'ix jyi'iy yä'äxyën: Ëjts jëtu'unës ijty nyajpaaty tä tu'uk tsajpkaa yä'äyën mëti'ipë inën, e mijtsës të xyajyujytyä'äky; yajwinpijtkës jatëkok ma mijtsën, jä'ä ko mijts tu'ukyë mWintsën'ajtp mëti'ipës nTios'ajtypyën.

¹⁹ Ojts tëkok n'ëxmatsy nmajtstu'uty, mëkës jatëkok njawë; kë'ëmës të nmëmay të nmëtajy ko nmëët'ajtypyës ja poky, paaty mëk nnäkyätykyoxyës mëët ja tsëtyu'un, koos nja'amyetsy wi'ixës ojts ntuuntëkoyën koos n'ëna'k'ajty.

²⁰ Yë Efraín yë nyaax kyajpn u'unk maayënës ntsoky njawë; yë'ëjës tu'uk n'u'unk'ajtyp nmaay'ajtyp mëti'ipës mëk ntsojkpyën. Oyës muum ntuk'ojy yë tyëko'oyën, ëjts ka'apës nja'atyëkoy; jëëpy yaxpës njawë n'aaw njot ets npa'ëyoopyës jatëkok. Ëjts Wintsën, ëjts ënaanp.

²¹ Mijts Israel, akääts yë në'ë tu'u mëët yë jaam mëti'ipë yajtuk'ixëpën, ënätyë xypyaatëty ko ënety jää jatëkok mnaxa'any; m'ijxwë'ëmëp ma mnaxyën. Wimpit jatëkok mijts Israel kajpn, niwinpit yë mjëën mtëjk.

²² ¿Je'eyë mnaxa'any mtëkëja'any tä tu'uk to'oxy ëna'kën mëti'ipë tëë yë tyaak tyeety t'ëxmajtsnën? Ëjts mëti'ipë Wintsën'ajtpën, tëëjës npëjktä'äky tu'uk yë winma'any jempyë: Ko yë to'oxytyëjk yë'ë y'amëtowëp yë ye'etyëjk ijxtëm jeexyë yë ye'etyëjk yë'ë t'amëtoyën yë tyo'oxytyëjk.

Ma Israel kajpn jyotkujktä'äkyën

²³ Yë Wintsën mëti'ipë maaytyääyëpën winë, yë Israel ja'ay yë Tyiosëty, yë'ë ënaanp: Ko ënety nyajtëkajtsës yë Judá ja'ay yë jyuuky'ajtënëty ets ko ënety jam jatëkok yajpaatë ma nyaax kyajpnëtyën, jëtu'un nëjkx y'ëna'antë: Yë Wintsën kyënu'kxëp ya'atë tun kopk wa'atspë ma jyää'atyën mëtëypyë nipaye'eyën.

²⁴ Yë Judá ja'ayëty ets mëti'ipë ja kajpn jam yajpatëpën, yë naaxtuunpë ja'ayëty ets kupixyny këwent'ajtpëty, jam nëjkx tsyëënëtë ets jam nëjkx yë nyaax kyajpn tyajnaaxkëta'aktë.

²⁵ Ku'uxyës nyajkaya'an nyaj'uuka'antë mëti'ipë ënety të y'ënu'kxëtën ets të myëjaawkëxtën.

²⁶ Ënätës të nwijy ets koos të n'ijxwä'kxy, oyës të nnäjyawëty të nwinkuma'ay.

²⁷ Jëtu'un yë Wintsën y'ënä'äny: Pyatäämpy ja xëëw jëmëjt ma myäyëja'antë yë ja'ay ets aayjëyujk ujtsjëyujk ma Israel kajpnën ets ma Judá kajpnën.

²⁸ Jëtu'un tääjës ojts poj'am nwijxë'ëky nnujkë'ëkyën ja ëxëëkpë ets nkujijtnajxyës mëti'ipës ka'ap n'oy'ixyën, xit ko'ow ntuunyës ets nyajkutëkooytyääyës ja ka'apë myëtëyëtyën, jëtu'unës näjyëtu'un jëjp'ixy nyajpaata'any ets jyää'atëty ja kojën mä'kxën. Ëjts Wintsën, ëjts ënaanp.

²⁹ Jä'ä xëëw ka'ap nëjkx pën y'ëk'ënanë: Yë'ëkyëjxm ko yë teety taak të tjë'kxtë tsatym xunpë paaty yë u'unk ëna'k tyëtsxëmimëtë.

³⁰ Jä'ä ko jä'ä xëëw, pën ënety ja tsatym xun jyi'kxypyën, yë'ë nëjkx tyëtsxëmimyë. Nijä'äjaty nëjkx ja ja'ay ja nyëë pyoky tkumëtoy.

³¹ Jëtu'un yë Wintsën y'ënä'äny: Pyätyp ja xëëw maas ntuna'anyën jempyë käjpxytyu'unën mëët yë Israel ja'ayëty ets Judá ja'ayëty.

³² Tyaapë käjpxytyu'unën ka'ap jyëtu'un'ata'any tä ja mëti'ipës ntuunën mëët ja y'ap y'okëty, koos nmajtstë kyë'ëkëjxy etsës nyajpëtsëëmtë jap Egiptë; jä'ä ko yë'ëjëty ka'ap ojts tpatuntë ja käjpxytyu'unën oy ënety ëjts Wintsën xyatijtë. Ëjts Wintsën, ëjts ënaanp.

³³ Jä'ä xëëw nëjkx ntunyës ya'atë käjpxytyu'unën mëët yë Israel kajpn: Jap jyootjoty wyinma'anyjoty npëjkta'aka'anyës ja n'ënä'ämënës ntëyajtënës ets jëtu'un jap tmëët'atëty këxja'aypyën. Ëjts nëjkx xyTyios'atë ets yë'ë nëjkx nkajpn'atës. Ëjts Wintsën, ëjts ënaanp.

³⁴ Ka'ap nëjkx y'ëkkopkpëky'ajnë yajtuk'ijxpëktëty wi'ixës mëpaat xy'ixy'atën ets tu'kjëëky tu'kmëku'uk, tu'kjëëky, tuk kä'äx, mëj mutsk nëjkx ja ja'ay xy'ixy'ajnëtës. Nëjkxëpës npokymyä'kxtë oy ënety wi'ix të y'ëtë'ëtstë y'ëna'antë ets ka'apës nëjkx ja nyëë pyoky n'ëkja'amyäjtsënëtë. Ëjts Wintsën, ëjts ënaanp.

³⁵ Yë Wintsën mëti'ipë pyëjktakën yë xëëw ets xëëny kyutë'kxëty; yë po'o ets mëtsa'a ets koots kyutë'kxtëty; mëti'ipë yajyu'kxypyën yë mëjmejy, mëti'ipë yajmu'upy yajni'typyën yë nëë'o'pyky, mëti'ipë xyëëwajtypyën Wintsën mëti'ipë maaytyääyëpën winë, jëtu'un y'ënä'äny:

³⁶ Ko ënety jëna'a ka'ap t'ëkpatuunëtë ya'atë ënä'ämën mëti'ipës nyajwë'ëmpyën, jä'ä xëëw ka'ap nëjkx yë Israel kajpn n'ëkajpniwanës. Ëjts Wintsën, ëjts ënaanp.

³⁷ Jä'ä xëëw ma ënety yajkijpxy yajtsa'atyën yë tsajp ets yaj'ixy yë naaxwiinyëtë mapaat jyëjpkëxyën, jä'ä xëëw nëjkxëpës yë Israel ja'ayëty n'ixtijnëtë mëët ko ënety ëxëëkjaty winë të tuntë. Ëjts Wintsën, ëjts ënaanp.

³⁸ Jëtu'un yë Wintsën y'ënä'äny: Pyatäämpy ja xëëw maas ja nkajpn nëjkx yajkoj'oyën jatëkok, nëjkxëp yajkoj'oyë ja Hananel ja kyëjxmpotsy ets tyimja'tëty jampaat ma ja Tëjkëtyaknën ets jampaat ma y'ëwtijtë'ëkyën.

³⁹ Tëyë nëjkx ja tsëpa'an yaj'ijxtë, jam tsyoonëty ets jya'tëty jam Gareb ma ja nitunën, jam y'ëwtijtë'ëkëty ets jya'tëty jam Goá.

⁴⁰ Jampaat ma ja joyjyotën ma nyaaxtëkëtën yë o'kpë ets ma yajwëjyën yë kuyjaam ets ja yu'uyjyot mëti'ipë jam winkon ma Cedrón wokën, tyimja'ty jam ma këwaaytyëjk'aawën, jampaat maatsow ja potsy tyäkën maatsow yë xëëw pyëtsimyën, ëjts nëjkx nyajtuknikënu'kxë. Ya'atë naax kajpn ka'ap nëjkx nijëna'a pën t'ëkyajkutëkooynyë ets t'ëkyajma'tnë.