Jeremias 29 - Biblia Dc en Mixe de Quetzaltepec

Ma ja Jeremías tuknijayën ja noky ja myëkukajpn tsumy matsypë yajpaatën wiink naax wiink kajpn

^1-2 Tëë ënety yë Jeconías yajkutujkpë yajmënëjkxnë wiink naax wiink kajpn tsumy matsy, mëët ja taak yajkutujkpë ets ja tuunpëtëjkëty mëti'ipë tuuntëpën ma ja kutujkëntëjkën, tääts ja kopktëjkëty mëti'ipë jam Judá ets Jerusalén mëj'äämpy ijtëpën ets ja mëti'ipë kojtëpën pi'tëpën ets mëti'ipë yaj'o'oyëtyëpën ja pujxn oyjyätyëtypë. Ënet yë Jeremías käjpxynyajxpë ojts tyajkojy tu'uk yë noky jam Jerusalén ets tuknikejxy ja ja'ayëty mëti'ipë ënety tsumy matsy të yajmënëjkxtën wiink naax wiink kajpn ets ja teetytyëjkëty, käjpxynyajxpëtëjkëty ets ja ja'ayëty mëti'ipë ja Nabucodonosor të tmënëjkxyën tsumy matsy jam Babilonyë.

³ Ya'atë noky yë'ë ojts tmënëjkxy yë Elasá, yë Safán yë myaank ets Guemarías, yë Hilquías yë myaank, mëti'ipë ja Judá yajkutujkpë kyäjxën jam Babilonyë ets nëjkx jam nyäwya'këxë'ëkëtë ma ja Nabucodonosor yajkutujkpën. Ja noky jëtu'un y'ënä'äny:

⁴ Jëtu'un yë Wintsën y'ënä'äny mëti'ipë maaytyääyëpën winë, mëti'ipë yë Israel ja'ayëty Tyios'ajtëpën, yajtuknikäxtë nitëkokyë ja'ayëty mëti'ipë të yajmëtsoontën tsumy matsy yaa Jerusalén ets të yajmënëjkxtë jam Babilonyë:

⁵ Kojtë mjëën mtëjkëty ets jap mtsëënëtëty; kojtë ma'kxtë m'aay mkepyëty mëti'ipë yë tyëëm mjë'kxtëpën.

⁶ Pëktë uuktë, mëët'atë m'u'unk m'ëna'këty ets wä'än m'u'unk m'ëna'këty näjyëtu'un tpëktë t'uuktë. Nimayëtë jam ets këtii mniwäänëtë.

⁷ Tuntë, wä'än yë naax kajpn t'oy'ity ma tsumy matsy myajpaatën wiink naax wiink kajpn ets niwaantsow nimëpëjktsowëtë ma ëjtsën, jä'ä ko pën tääpë naax kajpn yajpatp jotkujk, nän jotkujk miitsëty myajpaata'antë.

⁸ Ëjts Wintsën mëti'ipë maaytyääyëpën winë, yë Israel ja'ay Tyiosëty, ëjts ënaanp: Këtii mnätyukwin'ëënëtëty yë ja'ay mëti'ipë nätyijëtëpën najtsja'apë ets käjpxynyajxpë, mëti'ipë jam yajpatëpën ma miitsëtyën; këtii xymyëpëktëty yë kyëma'ayëty mëti'ipë nyimëtyaktëpën.

⁹ Mëti'ipë yë'ëjëty nyikajpxtëpën ëjts nxëëwkyëjxmës ka'ap tyiyajtënëty. Ka'ap y'ëjtsëty të nkexy. Ëjts Wintsën, ëjts ënaanp.

¹⁰ Jëtu'un yë Wintsën y'ënä'äny: Ko ënety yë Babilonyë kajpn t'apety yë jyëmëjt tëkë'px majk, tääts miitsëty nputëkëja'antë ets ntuna'anyës ja mëti'ipës të ntukwinwanëtën ko nyajwinpita'antë ma ja mnaax mkajpnëtyën.

¹¹ Ëjts nija'ap wi'ixës nimay nitajën winë mëët miitsëty ets oy mjuuky'atëty ka'ap y'ëxëëkëty, jotkujk myajpaatëty. Ëjts Wintsën, ëjts ënaanp.

¹² Ënet nëjkx miitsëty xymyëkajpxtës ets nëjkx xynyimintës mëët yë oyjyot oywyinma'any, nmëtoow'itäämpyës ijxtëm ënety miitsëty m'ëna'antën.

¹³ Koos nëjkx xy'ixta'atë, nëjkxëpës xypyaatë, jä'ä ko winë aaw winëjotës nëjkx xy'ixta'atë.

¹⁴ N'a'ixëjäämpyës ets miits xypyaatëtyës ets nyajkutukäämpyës ets y'oyëtëty ja mjuukyajtënëty: nëjkxëp nyajtsoontë muum wiink kë'ëy wiink kajpn ets oymyaajëty ma ojts nnajtswopëtën ets jatëkok nyajwinpita'antë ma ya'atë naax kajpnën ma mtso'ontën. Ëjts Wintsën, ëjts ënaanp.

¹⁵ Miitsëty jëtu'un m'ëna'antë: Yë Wintsën tëëjës xymyo'otë mëti'ipë käjpxynyajxtëpën yaa ma Babilonyë kajpnën.

¹⁶ Yë Wintsën jëtu'un të tnikäjpxy yë yajkutujkpë mëti'ipë jam ënä'ämpën ma David yë kyutujktaknën ets ja'ayëty mëti'ipë yaa kunaax'ajt kukajpnajtëpën, miits yë mmëku'ukëty mëti'ipë ojts ka'ap yajmënëjkxtën tsumy matsy mëët miitsëty:

¹⁷ Ëjts Wintsën, mëti'ipë maaytyääyëpën winë, ëjts ënaanp: Tsip käjpxy, yuu xëëw ets pa'am ëyo'on ntuknikäxantëp. Jëtu'un nyajjata'antë tä higo pu'utsën mëti'ipë ka'ap tjëkyepyën yajë'kxëty.

¹⁸ Yë'ë mëët npajëtita'antës tsip, yuu xëëw ets pa'am ëyo'on. Ëjts nyajkutukäämpyës ets naax kajpn wiinkëtypë tsyë'ëkëtëty jyawëtëty ko ënety t'ixtë ets ijxpät wyë'ëmtëty ma ja naax kajpnëtyën ko tëë yajpoktë ets wintsëtyu'un jëjptsëtyu'un të wyë'ëmtë, mëti'ipë nëjkx yë naax kajpn tsë'ëkëtën ets tmëkjawëtën ko ënety tëë n'ëxwoptës ets të nwojpwa'kxtës.

¹⁹ Jä'ä ko ka'ap tja'akyujkëtë koos ojts njatuk'ëwaanëtë mëët ja nkäjpxynyajxpëtëjkës mëti'ipës ntuknikäjxtën ets jeexyë jyootwinpitë. Ëjts Wintsën, ëjts ënaanp.

²⁰ E paaty n'ënëëmëtë ets yë'ë xytyuntëty mëti'ipës nikäjpxypën, tu'kë'ëyë miitsëty mëti'ipë ojts myajmëtsoontën tsumy matsy jam Jerusalén ets myajmënëjkxtë jam Babilonyë.

²¹ Yë Wintsën mëti'ipë maaytyääyëpën winë, mëti'ipë yë Israel ja'ayëty Tyios'ajtëpën, jëtu'un tnikäjpxy ets të yajnimëtyä'äky yë Ahab, yë Colaías yë myaank ets Sedequías, yë Maaseías yë myaank, mëti'ipë mwin'ë'ënëtëpën mëët yë Wintsën xyëëwkyëjxm: Ëjts nyajkutukäämpy ets Nabucodonosor yajkutujkpë ëxëëk tyunëtëty ets yaj'ookëtëty miits mwintuuy.

²² E ko ënety yë Judá ja'ayëty pën tpoktë mëti'ipë jam Babilonyë yajpatëpën tsumy matsy, jëtu'un nëjkx y'ëna'antë: Yë Wintsën mtëytyunëtëp ijxtëm tëytyuunyën yë Sedequías ets Ahab, mëti'ipë yë Babilonyë yajkutujkpë yajjëëntëtsën.

²³ Jëtu'un nëjkx mjatë mkëpätë ko ënety ëxëëk winë të xytyuntë jam Israel: ko ojts ka'ap ja mto'oxytyëjk xywyintsë'ëkëtë ets xymyëët'ajnëtë ja mjëëky mmëku'uk ja tyo'oxytyëjkëty ets ojts winë xynyikajpxtë ëjts nxëëwkyëjxmës ka'apë myëtëyëtyën mëti'ipë ënety ka'ap të ntuk'ënä'ämtën. Ëjts nija'apës yë'ë yajxon ko jëtu'un m'ëtëtstë m'ënantë. Ëjts Wintsën, ëjts ënaanp.

Ma yajnikäjpxyën ja Semaías

²⁴ Ojts yë Wintsën tuknipëky yë Jeremías ets t'ënëëmëty yë Semaías mëti'ipë Nehalam kukajpn'ajtpën:

²⁵ Yë Wintsën mëti'ipë maaytyääyëpën winë, mëti'ipë yë Israel ja'ayëty Tyios'ajtëpën, jëtu'un y'ënä'äny: Mijts, ojts tu'uk xykyexy yë noky kë'ëmwinma'any ets xytyuknikejxy yë Jerusalén ja'ayëty ets ja teety Sofonías, yë Maaseías yë myaank ets wiinkëtypë teetytyëjkëty. Ma jap nokyjoty xy'ënëëmën ja Sofonías:

²⁶ Mijts yë Wintsën të mpëjktä'äkyë ets mteety'atëty ets xykyutëkëty yë Joiadá ets mijts mniwintsën'atëp ja tsajptëjk ma yaj'ijx'ity yajkëwent'atyën. Ko pën ja'akyupoj myinëty ets tyëkëty ëëpë kajpxpë jëtu'un tä käjpxynyajxpën, ënätyë xymyatsëty ets xypyëjkta'akëty ma ja kepyën mëti'ipë pokyjyä'äy yajtukyo'ktsuumpën ets yë'ë mtukutsumëp yë pujxntä'äky.

²⁷ ¿Wi'ix ko të xykyatuk'ojy yë Jeremías, mëti'ipë jam Anatot tso'onpën, mëti'ipë mëtyakpën ma miitsëtyën jëtu'un tä jeexyë kyäjpxynyajxpë'atyën?

²⁸ Yë'ëpaat ojts tu'uk yë noky xytyunikäjxëmë jam Babilonyë, ma y'ënä'änyën: Miitsëty jeky jam m'ita'antë Babilonyë tsumy matsy, paaty nikë tim kojtë jam yë mjëën mtëjkëty ets yajxon mtimtsyënaaytyaknpëktëty, kojtë päntë yë aay kepy aay ujts ets xyjyë'kxtëty xypyëktëty.

²⁹ Yë teety Sofonías ojts ja noky tukwinkukajpxë ja Jeremías.

³⁰ Ënet ja Wintsën ojts tmëkäjpxy ja käjpxynyajxpë ets t'ënëmaay:

³¹ Tuknikäx yë ayuk tëkokyë yë ja'ayëty mëti'ipë wiink naax wiink kajpn yajpatëpën tsumy matsy ets xy'ënëëmëty ko ëjts Wintsën, ëjts ënaanp: Mëët ko yë Semaías të m'ënë'ëmxëtë mëët ëjts nxëëwkyëjxmës ets ka'ap y'ëjtsëty të nkexy ets ko ka'ap y'ëjtsëty të nmo'oy ja ayuk mëti'ipë oy të xymyëtowtën ets ka'ap myëtëyëty,

³² ëjts mëti'ipë Wintsën'ajtpën, jëtu'unës n'ëna'any: Ntëytyunäämpyës yë Semaías mëët tëkokyë yë y'u'unk y'ok, yë'ë ka'ap tmëët'ata'any yë y'u'unk y'ok ma naax kajpnën mëti'ipë nëjkx jotkujk jyuuky'atën, jä'ä ko wiinkjaty t'ënëmaay yë naax kajpn etsës xymyëtsiptso'ontë. Ëjts Wintsën, ëjts ënaanp.