Jeremias 28 - Biblia Dc en Mixe de Quetzaltepec

Jeremías mëët yë Hananías käjpxynyajxpë

¹ Ma mëkoxk po'o y'apetyën, nän yë'ë jëmëjtpë, jää ma mëmajktaxk jëmëjt y'apetyën ma Sedequías yajkutukyën jam Judá, yë Hananías käjpxynyajxpë, yë Azur yë myaank, mëti'ipë jam Gabaón kukajpn'ajtpën, ojts tninëjkxy yë Jeremías ma ënety jam tsajptëkotm yajpaatyën, ma ënety näjyëtu'un jam yajpaatën wiinkëtypë teetytyëjkëty ets ja'ayëty mëti'ipë jam kunaax'ajt kukajpnajtëpën ets t'ënëmaay:

² Yë Wintsën mëti'ipë maaytyääyëpën winë, mëti'ipë Israel ja'ayëty Tyios'ajtëpën, jëtu'un y'ënä'äny: Jëtu'unës yë Babilonyë yajkutujkpë ntuna'any tä tu'uk tsajpkaa myëpotën yë kyukë'ë mëti'ipë tyukyuupyën.

³ Kommäjtsk jëmëjt nyajmina'anyës jatëkok yë apëjk atu'unën mëti'ipë yë Nabucodonosor ojts jap tsajptëkoty tmëpëtsëmyën ets ojts tmënëjkxy jam Babilonyë.

⁴ Näyjyëtu'un wyimpita'any jatëkok yë Jeconías, yë Joaquim yë myaank, mëti'ipë jam yajkutujkpën Judá ets nitëkokyë ja'ayëty mëti'ipë ojts jam Babilonyë yajmënëjkxtën tsumy matsy. Jëtu'un tääjës n'ëna'anyën, ëjts nyajmëpotëjäämpy yë Babilonyë yajkutujkpë. Ëjts Wintsën, ëjts ënaanp.

⁵ Tää ja Jeremías käjpxynyajxpë t'ëtsooy ja Hananías käjpxynyajxpë, tam ënety tmëtowtë ja teetytyëjkëty ets ja kunaax kukajpnëty mëti'ipë jam yajpatëpën ma tsajptëjkën:

⁶ Oy jëtu'un tä m'ëna'anyën jääpëk yë Wintsën t'ëktuny, oy'ajtp jeexyë ko wyimpitëty yë apëjk atu'unën mëti'ipë jap tsajptëkoty pëtsëëmën ets näjyëtu'un wyimpijta'atëty yë ja'ayëty mëti'ipë ojts tsumy matsy yajmënëjkxtën jam Babilonyë.

⁷ E mëtoow'it wi'ix mijts ets naax kajpn n'ënëëmëja'anyënës:

⁸ Ja käjpxnyajxpëtëjkëty mëti'ipë tëëyëp juuky'ajtëpën ma ënety mijts ets ëjts ka'ap nmi'inëmën naaxwiiny, ojts t'akajpxtë ko jyää'ata'any ma naax kajpnën ja tsip, yuu xëëw ets pa'am ëyo'on.

⁹ E ko ijty tu'uk yë käjpxynyajxpë t'akäjpxy yë oyajtën jotkujk'ajtën ets jyänty tyuny jyänty jyätyë, jää yaj'ixy ko janty Wintsën të kyexyë.

¹⁰ Ënet ja Hananías ojts tukyo'kpëjktu'uty ja Jeremías ja tsajpkaakukë'ë, mëti'ipë ënety jam yo'ktsum'ajtypyën ets ojts tëjtä'äky.

¹¹ Tyam tuktëjë tyam y'ënä'äny ma ja mayjyä'äyën: Jëtu'un yë Wintsën y'ënä'äny: Jëtu'un jyata'any kyëpäta'any ja mäjtsk jëmëjt, ntuktëjëtya'ajäämpyës ja tejpxy ma ja naax kajpnëtyën mëti'ipë ja Babilonyë yajkutujkpë të tsumy të tmatsyën ets ntuktëjëtya'aja'anyës ja kyutujkën tä yajtuktëjën yë tsajpkaakukë'ë. Ets ja Jeremías tim tso'on jam ënätyë.

¹² Kom ok, tëë ënety ja Hananías tukyo'kpojtu'uty ja Jeremías ja tsajpkaakukë'ë mëti'ipë yo'ktëy'äjtypyën, ënät ojts ja Wintsën tmëkäjpxy ja Jeremías ets t'ënëmaay:

¹³ Nëjkx ënëëmë yë Hananías: Ëjts mëti'ipë Wintsën'ajtpën, jëtu'unës n'ëna'any: Tëë xytyuktëjë yë tsajpkaakukë'ë mëti'ipë kepyën, tyam pujxn tsajpkaakukë'ë'atanëp.

¹⁴ Jä'ä ko ëjts mëti'ipë Wintsën'ajtpën mëti'ipë maaytyääyëpën winë, mëti'ipë yë Israel ja'ayëty Tyios'ajtëpën, jëtu'unës n'ënä'äny: Tëës yë naax kajpn ntukutsuumta'ay yë tsajpkaakukë'ë mëti'ipë aak juunpujxnën ets tmëtuntëty ja Nabucodonosor yajkutujkpë mëti'ipë jam Babilonyë ënä'ämpën. Yë'ëpaat yë jëyujk mëti'ipë ëwa'anëtyën tëëjës ntukë'ëtëjkëtyä'äyës.

¹⁵ Ënet ja Jeremías t'ënëmaay ja Hananías: Ëkmëtoow'it yajxon mijts Hananías. Mijts ka'ap Wyintsënëty të mkexyë, paaty yë naax kajpn wiinkjaty të xy'ënëëmë ets nëkoo je'eyë xyajjotkujk'aty.

¹⁶ Paaty yë Wintsën y'ënä'äny: Oy nkäxëty naaxwiiny, je'eyëp ko tu'ukyë nyajtëkoyä'äny. Ya'atë jëmëjt m'ooka'any, jä'ä ko je'eyë naax kajpn të xy'akajpxë etsës xymyëtsiptsoontëty.

¹⁷ Ja käjpxynyajxpë Hananías ojts jyänty'ooky jä'ä jëmëjt, ma mëwëxtujk po'o y'apetyën tääpë jëmëjt.