Jeremias 24 - Biblia Dc en Mixe de Quetzaltepec

Ma yajwinkëma'ayën ja katsy mëti'ipë ujtsën mëët yë higo

¹ Tëë ënety yë Nabucodonosor yajkutujkpë jam Babilonyë tyajnëjkxy tsumy ja Jeconías, yë Joaquim yë myaank mëti'ipë jam Judá yajkutujkpën, mëët yë kopktëjkëty mëti'ipë jam Judá mëj'äämpy ijtëpën ets ja'ayëty mëti'ipë kojtëpën taktëpën ets mëti'ipë pujxn atsaaymyujktëpën, ko ojts yë Wintsën xytyuk'ixyës mäjtsk yë katsy ujtsëty mëët yë higo tëëm, jam kyiiynyë tsajptëjk'ëkë'ëm.

² Tu'kkatsy yaj'ixy oyëty ja higo tëëm, yë'ë mëti'ipë më''ëka'any tsaamë'kpën ets tu'kkatsy yaj'ixy ka'apë y'oyëty, ka'ap tjëkyepy wi'ix pën tjë'kxëty.

³ Ets xyajtëëyës ja Wintsën: Jeremías, ¿tii m'ijxyp? Tääjës n'ëtsooy: Higo tëëm n'ijxypyës. Mëti'ipë oyën ets mëti'ipë ka'ap y'oyëtyën, ka'apë tjëkyepy pën tjë'kxëty.

⁴ Ënet xy'ënëmaayës yë Wintsën:

⁵ Ëjts Wintsën, mëti'ipë yë Israel ja'ayëty Tyios'ajtëpën, jëtu'unës n'ëna'any: Jëtu'un tä yë higo tëëmën mëti'ipë oyëtyën, jëtu'unës yë Judá jyä'äy n'ixanë mëti'ipës ojts nkäxtën tsumy matsy ma Caldeo ja'ayëtyën. Mpa'ëyowäämpyës ets oy njawëja'antës,

⁶ ëjts n'ijx'itäämpy nkëwent'atäämpy ets nyajwinpitantëpës jatëkok ma ya'atë naax kajpnën. Yaajës nyajjotkujkëja'antë ets ka'ap nijëna'a n'ëkyajkutëkoyanës; ni'ikyës nkoja'an npäna'antë ets ka'ap nëjkx n'ëkwijxë'knëtës.

⁷ Nëjkxëpës nmo'otë ijxkujk ja'aykyujkën etsës ëjts xy'ijxpaatëty ko ëjts Wintsënajtp, yë'ë nëjkx nkajpn niwa'antës etsës nëjkx ëjts xyTyios'atë, jä'ä ko ëmuumtu'ukjot nëjkx jatëkok xynyiwinpitës.

⁸ E yë Sedequías mëti'ipë jam Judá yajkutujkpën ets kopktëjkëty ets tëkokyë Jerusalén ja'ayëty mëti'ipë ojts wyë'ëmtën kajpnjotm ëkë mëti'ipë ojts nyëjkxtën jap Egiptë tsënääpyë, jëtu'unës njawëja'antë tä ja higo tëëmën mëti'ipë ma'atëtyën, mëti'ipë ka'ap tjëkyepyën wi'ix yajë'kxëty.

⁹ Ëjts nyajkutukäämpy ets wiinkëtypë naax kajpn y'ëxëëk'ixëtëty mëti'ipë wiink naaxwiinyëtë yajpatëpën ets ijxpät wya'anëty ko ënety ëxëëk të jyatë, ko ënety ni pën kyatsokëtë, ko ënety ja'ay y'ëxëëk'ixëtë ets ko ënety të yajpoktë ma tu'kë'ëyë ja naax kajpnën ma awojpwä'kxy y'itën.

¹⁰ Yë'ëjës ntuknikäxantëp yë tsip käjpxy, yuu xëëw ets pa'am ëyo'on; nitu'uk kyawë'ëma'antë ma ja naax kajpnën mëti'ipës nmooytyën ets mëti'ipës nmooytyën ja y'ap y'okëty.