Jeremias 20 - Biblia Dc en Mixe de Quetzaltepec

Ma yajnikäjpxyën wi'ix jyata'anyën yë Pashur

¹ Ko ja Pashur, Imer yë myaank, mëti'ipë teety'ajtpën ets mëti'ipë tsajptëjk këwent'ajtpën, tnija'awëy wi'ix ënety ja Jeremías të kyäjpxynyäxyën,

² ënät ni'ënä'ämëy ets Jeremías yajkox yajtsiikëty ets tkuwëëntëty mëët yë kepy yo'kntujpë yajkutsumyën jam ma ja Benjamín ja tyëjk aawën wiinkonpë yajpaatyën ma ja tsajptëjkën.

³ Ënet jatëkok ni'ënä'ämëy ets ja Jeremías yaj'ëxmatsëty ets yajtukyo'käjtu'utëty ja kepy ma ënety matsy të tyaj'itën. Ënet ja Jeremías y'ënëmaayë: Tëë yë Wintsën yë mxëëw myajtëkajtsxëty ma ijty mxëëwatyën Pashur, jä'ä myajtijanë Magor-misabib.

⁴ Jä'ä ko jëtu'un yë Wintsën y'ënä'äny: Kutsë'ëkë nyaj'awinpita'any, yë'ëpaat nëjkx mtsë'ëkëty yë ja'ay mëti'ipë mëët oy të mnäjyawëtyën; m'ixëp ko ënety ja mmëku'uktëjk yaj'ookyë yë myëtsiptëjk. Nkë'ëyakäämpyës yë Judá ja'ayëty ma Babilonyë yajkutujkpën, may nëjkx tsumy matsy yajmënëjkxtë jam Babilonyë ets may nëjkx yajkupuxtë.

⁵ Yë mëtsip yë'ë nëjkx nkë'ëmooytyä'äyës tëkokyë wit meeny mëti'ipë yaajën naaxjoty kajpnjoty, tëkokyë ja naax kam, wit tujkxy ets apëjk atu'unën mëti'ipë tsowëtyën; mëtsip nëjkx tjä'ä'ajta'ay ja wit meeny mëti'ipë ja Judá yajkutujkpë të tnipëjkpetyën, tëkokyë aak Babilonyë nëjkx yajmënëjkxta'ay.

⁶ E mijts Pashur, nëjkxëp myajmënëjkxy tsumy matsy jam Babilonyë, mëët yë m'u'unk m'ëna'k m'u'unk mto'oxytyëjk. Jam nëjkx mnaaxtëkë mëët ja mja'ay mëti'ipë mëët oy të mnäjyawëtyën ets mëti'ipë të xywyin'ëënyën mëët ja tëkatsypë ja käjpxynyajxën.

Ma Jeremías jyoot'anpëkyën Tios wyintuuy

⁷ Wintsën, mijts tëëjës xywyin'ëëny, kë'ëmës të nmëpëjkpë; ni'ik mmëkëty, paatyës ka'ap të xyajmëtä'äky. Janaam jatsojk je'eyës nyajnëxi'iky nyajtukxi'iky; aak xytyukxikpës yë ja'ay.

⁸ Koos nkäjpxy, tsipës xëmë nikäjpxyp ets o'kën tëko'oyën; je'eyës xëmë nyaj'ojy nyajyä'äxy ets nyajnëxi'iky nyajtukxi'iky, paaty jyëtu'unëty jä'äs ko nikäjpxy mijts yë m'aaw m'ayuk.

⁹ Koos n'ëna'any: Ëjts ka'apës yë Wintsën n'ëkja'amyätsanë ets ka'apës yë xyëëw n'ëknikajpxanë; koos jëtu'un n'ëna'any ënät jap njootjotyës njawë yë m'aaw m'ayuk tsyooypyiky jëënën ets jëtu'unës ntimjyawë tim tsääpy tim no'kp yowë, tyimtuktëjkëp njawës nwaay npajk. Koos njaakkumä'kxëja'any, nijënu'un tkajëkyepy.

¹⁰ Nmëtoopyës ko ja'ay ame'tsyë myëtya'aktë ets y'ëna'antë: kutsë'ëkë yajpaaty oymyaajëty. Ënet y'ëna'antë: Mintë, tsojk npoky'ixta'ayëmë. Yë'ëpaat mëti'ipës mëët oy nämyäyën näjyëtu'un t'ëwxitë jëna'ajës muum n'ëktëkoy. Jëtu'un y'ëna'antë: Jääpëk jeexyë y'ëkyajwin'ëëny; tääts nmëmëtakmëty ets ëxëëk ntu'unmëty.

¹¹ E mijts Wintsën, mijts myajpatp mëët ëjts, mtsip'ixy mijts ets ni pën mkamayë; mëti'ipës xyjya'ixjëtijt xyjyapajëtijtpën ka'ap myëta'aka'any ets ka'apës xymyäyëty; ka'ap wyimpëtsëma'any oy mëti'ipë jyamaay jyatajtëpën, tsëtyu'unmëët wyë'ëma'antë, o'ktëy jyata'antë ets ka'ap nëjkx yajja'atyëkoy ko ënety o'ktëy jyatë kyëpätë.

¹² Wintsën mëti'ipë maaytyääyëpën winë, mëti'ipë mëtëy tii nyipaye'epyën, mëti'ipë tyuk'ijxnajxypyën ja'ay jyot wyinma'any, tuk'ijxkës wi'ix xytyiytyunyën tääpë ja'ayëty, jä'ä ko mijts ntuk'ijxpejtyp ets mëtëy xynyipaye'eyëtyës.

¹³ Kuuy'ëwtë yë Wintsën ets mëjjaw jaantyjyawëtë, jä'ä ko yë'ë yu'tsyp yë ja'ay mëti'ipë jë'ë ya'ax yajpatpën ëxëëk ja'ay itkujky.

¹⁴ Npojkpyës yë xëëw maas ojts nmëxu'unk'atyën. Jä'ä xëëw maas ojts yë ntaak xyajmëxu'unk'atyën, ka'ap tjëkyepy kënu'kxy y'itëty.

¹⁵ Npojkpyës yë ja'ay mëti'ipë ojts yë nteetyës tuknijawën ko ënety tu'uk yë myaank të myiny naaxwiinyëtë ets ojts jotkujk nyäjyawëty.

¹⁶ Wä'än tääpë naaxwiinyëtë ja'ay jëtu'un tjaty tkëpety tä yë kajpnën mëti'ipë yë Wintsën xëmëkyëjxm të tyajkutëkoyën. Wä'än jopyëp tmëtoy wi'ix ja'ay tmëjë'ë tmëya'axtën yë pëjkën ijxën; ko kyujkyxyëëwënë wä'än tmëtoowpaaty wi'ix ja'ay y'aya'axtën ko tsip tyunyë,

¹⁷ jä'ä ko yë Dios ka'apës ojts xyaj'ooky ntaakës jyootjoty. Jëtu'un jeexyë ntaakës jootjoty n'o'kyës tä o'kpë yajnaaxnitajyën, jëtu'un'äämpy jeexyë ka'ap ntimmyëxu'unk'ajtyës.

¹⁸ ¿Tiijës ko ojts n'ëkmëxu'unk'ajtpë ets n'ixëtyës je'eyë ja ëyo'on jotmay ets njuuky'atëtyës je'eyë tsëtyu'unmëët?