Jeremias 19 - Biblia Dc en Mixe de Quetzaltepec

Ma y'ijxpäjtën'atyën tu'uk ja tu'ts apu'u

¹ Jëtu'unës ja Wintsën xy'ënëmaay: Nëjkx tu'uk juy naaxtu'ts ets xywyoowmukëty tu'uk mäjtsk yë mëjja'aytyëjk ets teetyëjk.

² Tääts mnëjkxëty jam Ben-hinom joyjyotm, ma yajpaatyën tu'uk ja tëjkëtyakn ma t'ixko'owtën ja tu'ts apu'u yë tu'ts pojtspëty. Jamts xynyikajpxëty ja aaw ayuk mëti'ipë ntukmëtowäämpyën.

³ Jëtu'un xy'ënëëmëty: Judá yajkutujkpëtëjk ets miitsëty Jerusalén ja'ayëty, mëtoow'itë ya'atë Wintsën yë y'aaw y'ayuk, mëti'ipë maaytyääyëpën winë, mëti'ipë yë Israel ja'ayëty Tyios'ajtëpën: Mëk ëyo'onës nkäxäämpy ma ya'atë kajpnën; ko ënety pën tnijawë'aty, je'eyë nëjkx myony tyuk,

⁴ jä'ä ko yë Israel ja'ayëty ojts xy'ëxmatstës ets ojts ya'atë it naaxwiinyëtë tyaj'awinpitë wiink naax wiink kajpn, wiink tios ojts tukwintsë'ëkëtë ja poom jok, ja tios mëti'ipë ënety ka'ap t'ixy'atën ets ja y'ap y'okëty ets Judá yajkutujkpë nän ka'ap ënety të t'ixy'atë; ojts jam tämtë tjä'ätsë ja wa'ats ja'aytyëjk ja jyot nye'pnyëty.

⁵ Ojts näjyëtu'un tyajkojtë wintsë'këntyakn ma tyaka'antë nino'oky nixämy yë y'u'unk y'ëna'këty mëti'ipë ojts tukwintsë'ëkëtën yë Baal. Ëjts ka'apës ojts jëtu'un n'ënëëmëtë ets ka'ap ojts jyëtu'unëty n'ënä'ämtës, ka'ap ojts jëtu'un nmay ntajyës y'ëtë'ëtstëty.

⁶ Pyätyp ja xëëw jëmëjt ma ya'atë it naaxwiinyëtë ka'ap t'ëkxëëwajnëty Tofet ets Ben-hinom Joyjyot, jä'ä nëjkx yajtijy O'kën Joyjyot. Ëjts Wintsën, ëjts ënaanp.

⁷ Ma ya'atë it naaxwiinyëtën nyajma'ta'ajäämpyës tëkokyë mëti'ipë yë Judá ja'ayëty ets Jerusalén ja'ayëty tyuknipëjktakëtëpën. Ëjts nyajkutukäämpy ets myëtsip ëxëëk tyunëtëty, yaj'ookëtëty, yë jyot nyini'kxëty yë'ë nëjkx lut majkwejkxy ets kaa tsyu'tsëtë.

⁸ Aanë'ëk tëëtsë'ëk nyaj'awinpita'anyës ya'atë kajpn, je'eyë ja'ay tsyë'ëkëtëty ko t'ixtëty. Yë ja'ay mëti'ipë jam najxtëpën je'eyë nëjkx tnimon tnituktë ets je'eyë nëjkx tsyë'ëkëtë ko t'ixtëty ëxëëk të jyäty ja naax kajpn.

⁹ Ëjts nyajkutukäämpy ets ja ja'ay tsu'utstëty ja kyë'ëm u'unk kyë'ëm ëna'k, ye'etyëjkpë to'oxytyëjkpë; nixim niyam nëjkx nyätsyu'tsënëtë ko ënety o'ktëy jyajnëtë ets kyëjxtaaynyë ja jë'kxy pëky mëët ko ja myëtsip të yajnatukëtë.

¹⁰ Ko ënety jëtu'un të m'ëna'any, ënät nëjkx xytyukpu'ujë ja tu'ts ma ja ja'ay t'ixtëtyën mëti'ipë mjämyëët'ajtëpën

¹¹ ets xy'ënëëmëtëty: Yë Wintsën mëti'ipë maaytyääyëpën winë, jëtu'un y'ënä'äny: Jëtu'unës ya'atë naax kajpn ntuna'any tä ja'ay tu'uk yë naaxtu'ts tukpu'ujën ets ka'ap tjëkyepy wi'ix nyaj'o'oyëmëty jatëkok. Nëjkxëp jam Tofet ja'ay nyäyajnaaxtëkëty, jä'ä ko ka'ap ënety ma t'ëkjëkyäjpnë nyaaxtëkëtëty.

¹² Jëtu'unës ya'atë naax kajpn ntuna'any ets ja ja'ayëty mëti'ipë jap tsënaaytyëpën tä yë Tofet kajpn jyäjtyën. Ëjts Wintsën, ëjts ënaanp.

¹³ Yë jëën tëjk mëti'ipë yajpatëpën jam Jerusalén, ja këmoontëjk ma ja Judá yajkutujkpëtëjk y'ënä'ämtën ets ja tëjk kopk ma ja mëtsa'a twintsë'ëkëtën mëët ja poom, mëët ja uuky, aak ëxëëk nëjkx nyajxta'ay, jëtu'un tä jam jyäjtyën Tofet kajpnjotm.

¹⁴ Ënet jatëkok yë Jeremías ojts nyijkxy jam Tofet, ma ja Wintsën kyäjxën ets tnimëtya'aka'any ja Wintsën ja y'aaw y'ayuk. Tääts wya'ak'o'oyëy tsajptëjk'ëkë'ëm ets t'ënëmaay ja naax kajpn:

¹⁵ Yë Wintsën mëti'ipë maaytyääyëpën winë, mëti'ipë yë Israel ja'ayëty Tyios'ajtëpën, jëtu'un y'ënä'äny: Nkäxäämpyës ja tëytyu'unën mëti'ipës të nnikäjpxyën ma ya'atë naax kajpnën ets ma tëkokyë yë wiinkëtypë naax kajpnën mëti'ipë mëët nyämyëwinkon'atyën ya'atë kajpn, jä'ä ko tëë kyujuun'ooktë ets ka'apës të xymyëmëtowtë.