Jeremias 16 - Biblia Dc en Mixe de Quetzaltepec

Ma ja Jeremías t'ëxajën ja Wintsën ja y'ënä'ämën

¹ Ënet ja Wintsën ojts xymyëkäjpxyës etsës xy'ënëmaay:

² Ka'ap mpëkëty ets ka'ap u'unk maay xymyëët'atëty ma ya'atë naax kajpnën,

³ jä'ä ko ëjts mëti'ipë Wintsën'ajtpën, tyam ntuk'ëwaanëja'any wi'ix jyata'an kyëpäta'antë ja u'unk ëna'k mëti'ipë yaa mëxu'unk'ajtëpën ma ya'atë naax kajpnën ets wi'ix jyata'antën ja nyiteety nyitaakëty.

⁴ Pa'am nëjkx yaj'ookëtë ets ka'ap pën nyiya'axa'anëtë, tä të'ënyën nëjkx muum wyimputskëta'aktë. Tsipjoty y'ooka'antë, lut majkwejkxy ets kaa jëyujk nëjkx tsyu'utsëtë wyëtsëtë ja o'kpë.

⁵ Ojtsës näjyëtu'un yë Wintsën xy'ënëëmë: Këtii jap tëkoty mtëkëty ma ja o'kpë tnijë'ë tniya'axtën, këtii näjyëtu'un xynyiyaxpëty ets xymyëkja'apëty mëti'ipë të y'ookyën, jä'ä ko tëëjës nyajjëwä'äky ja n'oyajtën, ja ntsojkën nja'awën ets npa'ëyo'owënës ma ja naax kajpnën. Ëjts Wintsën, ëjts ënaanp.

⁶ Mëj mutsk nëjkx ja'ay y'ooktë ma ya'atë naax kajpnën; ka'ap pën tyajnaaxtëkëja'any ja o'kpë ets ka'ap nëjkx pën ja o'kpë tniyä'äxy ets ka'ap ma pën nyäyajtsëtyuta'anyë ëkë ja wyääy tkääpa'any mëët ko ënety ja o'kpë tnimony tnituky.

⁷ Ni pën ja kyääky y'uuky tkanipëjktaakëja'any ets ja o'kpë yajwinkay yajwin'uukëty. Këtii nëkoo tyimmon tyimtuktëty ja mëti'ipë ku'o'këtëpën, oy yë'ë'atëty ja teety taak jyatimy'ooky.

⁸ Këtii mtëkëty ma jëën tëjkën ma ja'ay kyäytyën y'uuktën, këtii nëjkx jap mkääpyë m'ukpë,

⁹ jä'ä ko ëjts, Wintsën mëti'ipë maaytyääyëpën winë, mëti'ipë yë Israel ja'ayëty Tios'ajtëpën, ëjts ënaanp: Nyaj'atëkoyäämpyës ja xëëw ets ja xoontakën, ja ëy yä'äxy ma yajwin'ëwtën ja pëjkpë ukpë. Ya'atës nikäjpxyën jää tyuna'any jyata'anyë ma ënety mjuuky'atën ets nëjkxëp kë'ëm xy'ixtë.

¹⁰ Ko ënety xytyukmëmëtyä'äky ja naax kajpn ya'atë aaw ayuk, nëjkxëp myajtëëwinpitëtë: ¿Wi'ix jëtää ko yë Wintsën jëtu'un të tuknipëjktakëpë etsës ëyo'on jotmay mpaatëty mëjwiin këjää? ¿Tii tuuntëko'oyën ëëtsëty të ntuntë? ¿Tii poky ëëtsëty të ntukmëtëkoytyë yë nWintsën'ajtëm Dios?

¹¹ Ënet xy'ëtsowëty: Jëtu'un yë Wintsën y'ënä'äny: Tyaapë paaty jëtu'un jyäty kyëpety jä'ä ko ja m'ap m'okëty ojts xy'ëxmatstës ets ojts ja wiink tios tpanëjkxtëkëtë, yë'ë ojts t'ëwtajtnëtë ets tukwintooynyëtë ja poom; e ëjts jëkäm jëxkë'ëmës ojts xyajwë'ëmnëtë ets ka'ap pën t'ëktuunë ijxtëmës ënety të ntuk'ënëëmëtën.

¹² E miitsëty nän wäänë o'ktëy të m'ëtëtsnëtë këtiinëm ja m'ap m'okëty, nitu'ukjaty aakjëtu'un winë të xytyuunëtë tä kë'ëm mmaytyën mtajtën ets ka'apës të xymyëmëtowtë.

¹³ Paaty miitsëty ntimy'ixkäxa'antë ma ya'atë kajpnën ets jam najtswopëja'antë ma tu'uk kajpnën mëti'ipë yë m'ap m'ok ets miitsëty ka'ap të xy'ixy'atën, jam nëjkx xëëny koots xymyëtuntë ja wiink tios, ka'ap n'ëkpa'ëyowanëtë nijëna'a.

¹⁴ E ëjts Wintsën, jëtu'unës n'ëna'any: miimp ja xëëw po'o ma nëjkx ka'ap pën y'ëk'ënanën: Mëët ja Wintsën ja jyuukyajtën, mëti'ipë yajpëtsëëmën ja naax kajpn jap Egiptë,

¹⁵ jä'ä nëjkx y'ëna'antë: Mëët ja Wintsën ja jyuukyajtën, mëti'ipë yajpëtsëëmën ja Israel kajpn ma ja myëtsipën anëkëjxmtsowpë yajpaatyën ets maajaty ja it naaxwiinyëtën ma të kyääkwa'kta'atën. Ëjts nëjkx ntuknipëjktaakë jëna'a mwinpitëty ma mnaax mkajpnëtyën, ma it naaxwiinyëtën mëti'ipës nmooytyën ja y'ap y'okëty.

¹⁶ Ëjts Wintsën jëtu'unës n'ëna'any: Nyajminäämpyës ja'ay mëti'ipë nëë jëyujk majtstëpën ets tmatstëty ja Israel ja'ay. Ok nyajmina'anyës nimay mëti'ipë aayjëyujk ujtsjëyujk y'ijxtaaytyëpën ets tmajtsmuktëty ja Israel ja'ayëty tunkëjxmëpë kopkëjxmëpë tsyëënëtën.

¹⁷ Jä'ä ko wa'atsës n'ijxtaay ntuuntaay tiijaty tyuuntëp kyajpxtëpën ëxëëkjaty; nitii kyayu'utsy'ity ma ëjtsën, ni yë'ë nyëë pyokyëty tkajëkyepy tkuyu'utstëty.

¹⁸ Jëyëjp nëjkx ntukumëtoyës ja pyokyëty, mäjtsk oknipety nëjkx ntukumëtoyës ja tyëko'oyënëty mëët yë'ë ko të t'ëxëëktuntë ja it naaxwiinyëtë mëët ja y'awinaxëty ëxëëkpës n'ixyën ets ka'ap të twintsë'ëkëtë ja it naaxwiinyëtë mëti'ipës ojts njatukumaytyën.

Ma ja Jeremías tmëkäjpxyën ja Wintsën

¹⁹ Wintsën mëti'ipës nmëk'ajtyp nmëjaaw'ajtypyën ets mëti'ipës xykyuwaanp xynyixajpën, maas tsoktakn npaatyën koos ëtsë'ëkëtuuy ntänë; mijts nëjkx mniminyë ja naax kajpn mëti'ipë yajpatëpën mapaat yë naaxwiinyëtë jyëjpkëxyën, jëtu'un myaj'ënëëmëja'any: Yi'iyë ëëts të xytyukkumaytyë ja n'ap n'okëty ja tios ka'apë myëtëyëtyën, mëti'ipë ka'ap tyunyën ets mëti'ipë ka'ap tmëët'atyën ja mëk'ajtën.

²⁰ ¿Jyëkyejpy yë naaxwiinyëtë ja'ay t'oytyunëty kë'ëm yë tyiosëtyë? Ka'ap tjëkyepy, paaty tääpë awinax ka'ap tyiyëty jyääntyëty.

Ma ja Wintsën y'ëtsoowinpityën

²¹ Paatykyëjxm të ntuknipëjktaakës koos ja nmëk'ajtën nyaj'ixa'anyë; jëtu'un xynyijawëtëty ko ëjts jëtu'un Wintsënajtp.