Jeremias 13 - Biblia Dc en Mixe de Quetzaltepec

¹ Ënet ja Wintsën xy'ënëmaayës: Nëjkx tu'uk juy yë mwëën mëti'ipë linë witën ets mnäwyëënëtëty, je'eyëp ko këtii xyajxookëty.

² Ënätës njuuy ja nwit wëën tä ja Wintsën ojts xytyuk'ëne'emyënës etsës nnäwyë'ënë.

³ Ënet jatëkok ojts ja Wintsën xymyëkäjpxyës etsës xy'ënëmaay:

⁴ Yë'ë mmënëjkxëp jam ma Éufrates mëjnëëjën, ja wëën mëti'ipë mjuuyën mëti'ipë të mnätyukwëënyën ets xyu'utsëty tsaajoty.

⁵ Ënet ojts nnëjkxyës jam ma ja Éufrates mëjnëëjën ets jam nyu'tyës ja wit wëën tsaajutjoty, jëtu'un tä ënety ja Wintsën të xytyuk'ëne'emyënës.

⁶ Tëë ënety nyäxy kanaak xëëw koos jatëkok ja Wintsën xy'ënëmaay: Nëjkx jam ma ja Éufrates mëjnëëjën ets xymyëminëty ja mwëën mëti'ipë myu'tsën tsaajutjoty.

⁷ Ënet ojts nnëjkxyës ma ja Éufrates mëjnëëjën ets n'ixtaaytyäkyës ja wëënës maajës ënety të nyu'utsyën, je'eyëp ko tëë ënety pyu'taktaaynyë, ka'ap y'ëk'oy'ajnë.

⁸ Ënet ja Wintsën jatëkok ojts xymyëkäjpxyës,

⁹ etsës xy'ënëmaay: Timjëtu'un yë Judá ja'ayëty ets Jerusalén ja'ayëty nyajjata'antës.

¹⁰ Ya'atë naax kajpn mëk nyäpyëjkta'akëtë, ka'ap tmëmëtowtë yë n'ënä'ämënës, jëtu'un ijxtëm yë'ëjëty tuknipëjktaakëtën jëtu'un winë tuntë. Wiink tios të tpanëjkxtëkëtë të tmëtuntë ets të t'ëwtatë. Jëtu'un yë'ëjëty tä tääpë wëënën.

¹¹ Jëtu'un tä tu'uk ja'ay nyäwyë'ënta'atsyën, jëtu'unës yë Judá ja'ayëty ets Jerusalén ja'ayëty të nmëët'aty, wë'ënta'atsy tu'ukmukyë të yajpaatë mëët ëjts ets yë'ë nnaax'at nkajpn'atëtyës, jëtu'un yë nxëëwës tyajmëjnaxtëty, tääts yë nmëj'ajt n'oyajtënës jam nyikëxë'ëkëty ma yë'ëjëtyën. E yë'ëjëty ka'ap të xymyëmëtowtës. Ëjts Wintsën, ëjts ënaanp.

¹² Näyjyëtu'un xy'ënëëmëty: Yë Wintsën mëti'ipë yë Israel ja'ayëty Tyios'ajtëpën, jëtu'un y'ënä'äny: Oymyëti'ipë tu'tsëty jyëkyejpy n'atääm'ujtsmëty mëët yë tsatym nyëë mëti'ipë tëë nyimaanaxyën. Ets Israel ja'ayëty jëtu'un nëjkx m'ëtsoyë: ¿Yë'ëmës jëtää nkanija'awëtyëpë ko jyëkyejpy oymyëti'ipë tu'tsëty n'atääm'ujtsmëty mëët yë tsatym nyëë mëti'ipë tëë nyimaanaxyënë?

¹³ Ets xy'ëtsowëty: Jëtu'un yë Wintsën y'ënä'äny: Nyajmuktëkoyäämpyës tëkokyë yë ja'ayëty mëti'ipë yaa tsënaaytyëpën ma ya'atë naax kajpnën, yë yajkutujkpëtëjk mëti'ipë ënä'ämtëpën jam ma David yë kyutujktaknën, yë teetytyëjkëty, käjpxynyajxpëtëjkëty ets tëkokyë yë Jerusalén ja'ayëty.

¹⁴ Ënätës jëtu'un nyajjajtaja'any tä ja'ay tu'ts tukpu'ujën, xim yam nëjkx tsyiptuntë, tu'k u'unk tu'k ëna'k. Ka'apës npa'ëyowa'antë; nëjkxëpës nyajkutëkooytya'atë, ka'apës nimona'any nituka'any ets ka'apës nmëjjawëja'any. Ëjts Wintsën, ëjts ënaanp.

Ma ja Israel yajkajpxtë'ëyën

¹⁵ Miitsëty Israel ja'ayëty, ja'akyukëtë wi'ix yë Wintsën të y'ënä'änyën. Këtii janty mëj janty këjxm mtimnyäjyawëty, yajxon ja'akyukë.

¹⁶ Yë'ë Wintsën mëjjaw kënu'kxyjyawë maanëm ka'ap tyajminyën ja kootsajtën ets ka'anëm mkunäpëtë akootstuuy jam kopkkëjxm; maanëm ka'ap kootspuknë tyaj'awinpityëm ets tu'ts kujenyën ja jajën të'kxën tyajjaty mëti'ipë miitsëty mjëjp'ijxtëpën.

¹⁷ Pën miitsëty ka'ap mja'akyukëtë, je'eyës një'ëja'any nya'axa'any ame'tsyë mëëtkyëjxm ja m'amëj'ajt m'akëjxm'ajtënëty; nwiinnëëjës je'eyë ka'ajaanp koos ënety n'ixy ntuny wi'ix ja Wintsën ja nyaax kyajpn yajmënëjkxyën tsumy matsy wiink naax wiink kajpn.

Ja Wintsën ja y'aaw y'ayuk mëti'ipë ja yajkutujkpë tyuknikäjxën

¹⁸ Jëtu'un xy'ënëëmëty yë yajkutujkpë ets yajkutujkpë taak: Jënaktë jam ma myajkutuktën, naaxkëjxy u'unyëtë, jä'ä ko tëë kyä'äy ja mkujän mëti'ipë myaj'oykyëxë'këtëpën.

¹⁹ Yë Négueb kajpn tëë ja myëtsip yajnatujkta'ayë; ka'ap ni pën jam nyäxy. Yë Judá ja'ayëty wa'ats të yajmënëjkxta'atë tsumy matsy wiink kë'ëy wiink kajpn, ni'ëmukë të yajmënëjkxta'atë.

²⁰ Ëk'ijxë'ëktë ets xy'ixtëty wi'ix yë mëtsip jam anëkëjxmtsow myäymyintën. ¿Ma ënät ja mja'ay mëti'ipës njëjp'ijxyp mputëkëtëty, mëti'ipë mnätyukmëjpëjktakëpën?

Ma yaj'akäjpxyën ko ja Israel ja'ay yajmënëjkxa'antë tsumy matsy

²¹ Mijts Jerusalén, ¿wi'ix m'ëna'ana'any ko ënety yë'ë m'ëne'emyë ja ja'ay mëti'ipë myaj'ijxpëjkën? Jëtu'un ja pëjkën ijxën mtukja'ta'anyë tä tu'uk to'oxytyëjkën mëti'ipë u'unk maay yajja'täämpyën naaxwiiny.

²² Pën myajtëëpy tii ko jëtu'un mjaty mkëpety, mnijawëp ko yë'ëkyëjxm ko ënety të mpokytyuny. Paatykyëjxm të myajnijeny të myaj'ixjeny ets ëxëëk të mjaty të mkëpety.

²³ ¿Wä'än jëtää yë yëk ja'ay nyätyëkatsëtëty poopë? ¿Wä'än jëtää yë kaa nyätyuknipëjktu'utëtëty yë kyats'ajtënë? Näyjyëtu'un miitsëty ka'ap tjëkyepy mnäyajtëkatsëtëty, miitsëty ëxëëkpë të xy'ijxwë'ëmtë, ka'ap tjëkyepy oypyë xytyuntëty.

²⁴ Paatykyëjxm jëtu'unyë nwojpwa'kxa'antë, jëtu'un tä pyojwä'kxyën yë aay pu'uxm mëti'ipë pojë'kpën jam të'ëts'itjotm.

²⁵ Mijts Israel jëtu'un mjata'any mkëpäta'any, mnitëjkëyëp jëtu'un mjatëty. Ëjts Wintsën, ëjts ënaanp. Mijts ojtsës xyjyä'äytyëkoy, ja awinax mëti'ipë ka'ap myëtëyëtyën yë'ë të xytyuk'ijxpety.

²⁶ Niwa'ats ëxwa'ats nyajwë'ëma'any ets mtsëtyunëty mjaaypyätëty.

²⁷ Tëës n'ixy ja mjot mwinma'any, wi'ix ka'ap xywyintsë'ëkën ja mniye'etyëjk, ja tsëtyu'unmëëtpë ja tuunk ko jëtu'un m'ëtë'ëtsy tä tu'uk ja to'oxytyëjkën mëti'ipë jyot nyini'kx tyo'kpyën yäjkpyën, ko xytyuny ja ka'apë tyuunëtyën jam tunkëjxm kopkkëjxm. Janty mon janty tuk jëtu'un myajpaaty. ¿Jëna'a jyëjpkëxa'any tääpë jëtu'unpë ëxëëk tuunk xyajtu'uye'eyën?