Isaías 65 - Biblia Dc en Mixe de Quetzaltepec

Ma yajnikäjpxyën wi'ix jyata'antën ja käjpxy kumëtoownajxpë.

¹ Jëtu'un yë Wintsën y'ënä'äny: Ja ja'ayëty mëti'ipë ka'ap tii të xy'amëtowtënës, yë'ë ojts xynyimintës; mëti'ipës ënety ka'ap të xy'ixta'atën, nikë yë'ëjës të xypyaatë. Ja naax kajpn mëti'ipës ënety ka'ap të xymyëkajpxtën, yë'ëjës të n'ënëëmëtë: Tyaajës jä'ä.

² Xëmës ja nkë'ë të nnajtsxajë ets jeexyë myintë ja naax kajpn mëti'ipë käjpxy kyumëtoownajxtëpën, mëti'ipë wiink tu'u të tmatstën ets ja jyot wyinma'any jä'ä të nyätyuktu'uwinwowëtë;

³ ja naax kajpn mëti'ipë ëjts nwintuuyës të xymyëtëkoyën; mëti'ipë ja wintsë'kën të tmo'oyën ja wiink tios jam muum aayjyotm ujtsjotm; ets të tukwintoy tukwinjoky ja poom ma ja wintsë'këntyaknën mëti'ipë muutsy pyotsyën;

⁴ mëti'ipë o'kpë jut akë'ëy ijty naaxwä'tspën, ets nyäxy tyëkë ma ka'ap pën y'ixëtëtyën; mëti'ipë ijty ëtsëmtsu'utsy tsyu'typyën ets yajxon tyaj'utsy ja tu'ts mëët ja tojkxnëë ka'apë wya'atsëtyën.

⁵ Ets y'ëna'antë: Jääyë ëwxit, këtiis nëkoo xytyony; ëjts kënu'kxyës mëj këjää, ka'ap tjëkyepy nëkoo xytyonëtyës. Tääpë ja'ayëty jëtu'un tä jëënën tu'kxëëwpë yeenyën; je'eyës xyajja'antyixy koos xyjyëjp kujokë.

⁶ E tyaapë tyunyë jyätyën aak këxja'ay myiny maas ëjtsën, ëjts ka'apës jëtu'unyë nyajninaxa'any ëkë je'eyë nnäkyë'ëmëkitanënës. Ëjts ëxëëkës yam ntuna'any tääpë ja'ayëty,

⁷ mëti'ipë të yajja'ay'ooktën ets ja tyeety tyaakëty ma näjyëtu'un të yajja'ay'ooktën. Yë'ëjëty tim no'k tim xaamtëp ijty jam tunkëjxm kopkëjxm ets ni'ikyë xyajjoot'anpëktës. Paatyës ntuknipëjktakënë ko yam winë npaye'eyä'änyës, ets ntukumëtowa'antës ijxtëm pyaat'atëtën. Yë Wintsën jëtu'un ënaanp.

Ma ja Wintsën tnikäjpxyën ko ja kënu'kxën tyajkëta'aka'any

⁸ Yë Wintsën jëtu'un y'ënä'äny: Ko yë tsatsymtsya'am tëë yajxon tsyä'ämy ets tap yë nyëë jyätyë, ka'ap pën tyajma'aty yë tsatym nyëë. E näjyëtu'unës ntuknipëjktaakë ntuna'a mëët koos ntsoky njawë ja ntuunpëtëjkës, ja naax kajpn ka'apës nyajkutëkoyä'äny.

⁹ Ëjts ntuknipëjktaakëjäämpyës ets ja Jacob tmëët'atëty ja y'u'unk y'ok nimay, ets jyam'atëty ja ja'ay ma Judá jyä'äyën mëti'ipë tunjot kopkjot wyintsëënëtëpën. Mëti'ipës të nwin'ixyën yë'ë nëjkx naaxwiinyëtë tjä'ä'atë, mëti'ipës xymyëtuuntëpën yë'ë nëjkx jam tsyëënëtë.

¹⁰ Ma ja Sarón itjotmën, mëti'ipë Joytyuuyën, nëjkxëp wyintujkta'ay mëët yë kupixyny ets tsajppax; näjyëtu'un jam ma Acor itjotmën, Joytyuuypyë, jam nëjkx y'oktë wyëtstë yë nkajpnës yë tsyajpkaa.

¹¹ E miitsëty wiink të m'ëtëtsnëtë, ni'ikyë ja Wintsën të xy'ëxmajtsnëtë, ka'ap jam të m'ëkyajpatnëtë maajës ja nkopkën kënu'kxypyë, jä'ä ja ka'ayën ukën të xytyukwintsë'ëkëtë ja tios Gad ets ja tios Mení mëti'ipë ja'ay tyijtëpën yajkumeenytyakpë.

¹² Miitsëty tëkatsy mkumeeny'ata'antë: Kupuxy nyaj'ooka'antë. Jä'ä ko tëë njamëkajpxtë ets ka'ap të m'ëtsowtë; ojts njamëëtmëtya'aktë e miitsëty ka'ap të mja'akyukëtë; jä'ä të xytyuntë mëti'ipës ka'ap nkumayën ets mëti'ipës n'ëxëëk'ijxypyën.

¹³ Paaty tyam ja Wintsën y'ënä'äny: Ëjts ja ntuunpëtëjk pyaatantëp ja kyääky y'uuky, e miitsëty ni'ikyë m'ayuu'ata'antë; yë'ëjëty nëjkxëp ja xyiktëpë xyoontëpë, e miitsëty je'eyë nëjkx myajnëxi'ik myajtukxi'iktë.

¹⁴ Ëjts ja ntuunpëtëjk akujk jotkujk y'ëwa'an xyoonta'aka'antë, e miitsëty je'eyë ja mon tuk mjë'ëja'an mya'axa'antë.

¹⁵ Ja nja'ayës nëjkxëp tkajpxpaatë ja mxëëw ko ënety pën tpoktë ëkë ko ënety tsoktë pën y'ookëty. Ja ntuunpëtëjkës nyajtëkatsanëpës ja xyëëw.

¹⁶ Ko ënety pën ma naax kajpnën t'amëtoy ja näkyënu'kxë, Dios y'amëtowëp, mëti'ipë tëyajtën winë tyuunpyën; ko ënety pën tii tnikajpxa'any ëkë tnikajpxpäta'any, Dios nëjkx ja xyëëw tkajpxpatëyë, mëti'ipë tëyajtën winë tyuunpyën. Ja ëyo'on jotmay mëti'ipë ënety të y'ityën, nëjkxëp yajja'atyëkooytyääynyë, ets ka'ap nëjkx maa y'ëkyaj'ijxnë.

¹⁷ Ëk'ixtë, ëjts nyajkojäämpyës yam jemypyë tsajp ets naaxwiinyëtë. Mëti'ipë të nyäxyën tëë ja kyixy ets ka'ap mëpaat y'ëkyajja'amyäjtsnë, ets ni pën nëjkx jëna'a tka'ëkjot'ajnë.

¹⁸ Akujk jotkujk xëmë myajpaatëty, koos winë nyajkoja'any, nyajkojäämpyës yë Jerusalén kajpn oypyë ma ja ja'ay jotkujk jyuuky'atëtyën.

¹⁹ Ëjts jotkujkës nnäjyawëja'anyë mëët yë Jerusalén, ets xoonta'akaanpës mëëtës yë nnaax nkajpn, ka'ap nëjkx nijëna'a pën jyi'iy yä'äxy, ets ka'ap nëjkx nijëna'a pën myony tyuky.

²⁰ Jam ka'ap nëjkx pi'k ëna'k y'ëk'o'knëtë tsojk, yë mëjja'aytyëjk jeky nëjkx jyuuky'atë. Ja mëko'px jëmëjtpë y'ookyën tsojkën ënety y'ooky, ko pën mëko'px jëmëjt kyajuuky'atëty, poky ënety y'ity.

²¹ Nëjkxëp ja'ay ja tyëjk tkojtë, ets nëjkx jotkujk tuktsëënëtë; nëjkxëp tpäntë tkojtë ja tsatym, ets nëjkx tjë'kxtë tpëktë ko ënety tyëëmpety.

²² Ka'ap nëjkx ja'ay je'eyë jyëën tyëjk tkojy ets wiink ja'ay tuktsëënëty; ëkë nëjkx je'eyë tkojy tpeny mëti'ipë jyë'kxëp pyëkëpën, ets wiink ja'ay jyë'kxëp pyëkëp. Jeky jyuuky'ata'any yë nnaax nkajpnës, jëtu'un tä kepyën; yë ntuunpëtëjkës jotkujk nëjkx jyuuky'atë ko ënety tyuntë pyëktë.

²³ Ka'ap ja tuunk nyatëkë'atëty, ko ënety ja u'unk ëna'k myëxu'unk'atë, ka'ap nëjkx yajpoktë, kënu'kxy ja Wintsën yaj'ita'anëtë, kënu'kxy nëjkx y'itë y'u'unk y'ëna'këty.

²⁴ Ka'anëm ënety xymyëkajpxtës koos n'ëtsoowinpitëty, ka'anëm ënety kyajpxpëtsëmtë koos nnijawëty wi'ix y'ëna'ana'antën.

²⁵ Ja pa'uk ets ja kupixyny tu'ukyë nëjkx y'oktë wyëtstë, yë kaa ets tsajpkaa tu'kmukyë jyë'kxa'antë, ets tsa'any naax jyë'kxäämpy. Maas yë wa'atspë nkopkën ka'ap nëjkx pën jyiiky myëku'uk tmëtëkoy.