Isaías 64 - Biblia Dc en Mixe de Quetzaltepec

¹ Jääpëk jeexyë xykyë'ëtswä'kxy yë tsajp ets mkëta'akëty naaxwiiny ets xyajyu'kxypëjkta'ajëty ja tun kopk,

² ets naax kajpn xyajtooytya'ajëty jëtu'un tä yë mats wyintooykyëtä'äkyën ëkë jëtu'un tä yë nëë y'ë'tskëtä'äkyën. Ënet ja mmëtsiptëjk m'ixkapëtëty ets ja naax kajpn mwinkutsë'ëkëtëty.

³ Ko xyaj'ijty ja ëyo'on tsë'ëkëpë jawëpë ka'ap ënety pën jëtu'un tyim'ëna'any, ko mjënäjky yaa ëpa'tkë'ëy, ojts ja tun kopk yu'kxpëjkta'atë mijts mwintuuy.

⁴ Ni ma kyayajmëtoy'äty wiinkpë Dios jëtu'unpë tä mijtsën, mëti'ipë jëtu'un winë tyuunpyën tä mijtsën ma ja y'u'unk y'ëna'kën mëti'ipë tukjotkujk'ajtëpën.

⁵ Mijts m'oyjya'ap yë ja'ay mëti'ipë akujk jotkujk winë oy tyuunpyën, ets jyä'ämyejtsyp mëti'ipë mijts mtsojkpyën yajtunëty.

⁶ Tëkokyë ëëtsajtëm aak ëxëëk ja'ay nyajpatëmë; oy njanäjya'awëmëty oy yowë winë ntu'unëmë ma yë'ëjën, jëtu'un nyaj'ijxëmë tukwit tukpatsyën; aakjëtu'un ëëts'ajtëmë tä aaykyëta'akën poj'ampë xyëëwtsa'ayën, mëët ko je'eyë xëmë njëëky'ajt nmëku'uk'ajtëm nyaj'o'këmë, tä ënät ëëtsajtëm jëtu'un njajt nkëpäjtëmë tä jeexyë je'eyë nwinpapojëmën.

⁷ Ka pën mkamëkäjpxyë ets ni pën kya'ëna'any jamës näkyuwanëja'anyë ma mijtsën; paaty je'eyë të mnäyu'tsënë etsës të xy'ëxmajtsnëtë ko je'eyë ëxëëkpë ntuntë nkajpxtës.

⁸ E mijts Wintsën, je'eyëm nteety'atë e ëëtsëty jëtu'un tä mo'ontsën ets mijts mnajxp tä tu'ts pojtspën; aakmijts ëëts të xyajkojtë.

⁹ Wintsën, këtii janty nëkooyë mtimjyoot'anpëky ets xëmë xytyimja'amyetsy ëëts ja ntuuntëko'oy nkajpxtëko'oyënëty. Ëk'ix, ëëts mijts xykyajpn'ajtëp.

¹⁰ Ix ja mnaax nkajpn aak aanë'ëk aak tëëtsë'ëk yajpatnëtë, ets ja Jerusalén kajpn tëë xit ko'ow jyajtaaynyë.

¹¹ Ja ntsajp tëjkëtyës ma ijty ja nteety n'apëtyës mwin'ëw mwinya'axëtën, tëë ja tyooytyä'äy. Tu'kë'ëyë mëti'ipë ënety ëëts ntsojktëpën, xit ko'ow të jyajta'ay.

¹² E mëët ijxtëm tyaapë yam yaj'ixy yajkoyën, ¿këtiijën tii xytyuna'anyë? ¿Amonyën m'ita'anyë etsës jëtu'unyë o'ktëy njatëtyë?