Isaías 62 - Biblia Dc en Mixe de Quetzaltepec

¹ Mëët ko ntsoky njawë mijts Jerusalén kajpn, ka'ap tjëkyepy amonyë n'itëtyës; mëët ko ntsoky njawë mijts Jerusalén kajpn, ëjts ka'apës npo'kxa'any koonëm n'ixëtyës ko ënety jëtu'un tyi'kxy jyäjy tä xyiintyä'äky jyajtä'äkyën, mëët ko ënety të mmëtä'äky, ets koonëmës n'ixëty jëtu'un tyi'kxy jyäjy ja nitsokën tä jëënyä'änkën.

² Nëjkxëp ja naax kajpn t'ixtë ko ënety të mnitso'oky, nitëkokyë yë yajkutujkpëtëjk y'ixantëp yë mmëj'ajt m'oyajtën. Ënet nëjkx jempyë mxëëw xypyiky mëti'ipë Wintsën kë'ëm mmo'ojanëpën.

³ Mijts mëj'äämpy m'ita'any ma Dios kyë'ëjën, jëtu'un tä tu'uk kujänën mëti'ipë yajkutujkpë yajtuumpyën,

⁴ Ka'ap nëjkx m'ëk yajtijnë Tëë yaj'ëxmatsy ets ka'ap nëjkx mnaax mkam y'ëkyajtijnë Tëë kyutëkoy, yë mxëëw jä'ä nëjkx yajtijy Ëjts Ntsojkën, ets mnaax mkajpn jä'ä nëjkx yajtijy Ëjts Nto'oxytyëjk, jä'ä ko mijts yë Wintsën ni'ik mtsojkën'ajtëp, ets yë'ë jëtu'un itaanp tä mniye'etyëjkën ma mnaax mkajpnën.

⁵ Jëtu'un tä tu'uk yë yä'äy ëna'k pyikyën mëët ja kiixy, jëtu'un ja Dios mpëka'anyë, nëjkxëp myaj'oyëty ets jotkujk nyäjyawëja'anyë mëët mijts tä tu'uk ye'etyëjk nyäjyawëtyën ko pyiky mëët ja tyo'oxytyëjk.

⁶ Jerusalén, jam ma mpotsykyopkën tëëjës jam npëjktä'äky yë këwent'ajtpë, xëëny koots y'ëna'antë: Këtii m'ëmontë miitsëty mëku'uktëjkëty mëti'ipë Wintsën myëkajpxtëpën,

⁷ këtii xyajpo'kxtë ja'ayëty koonëm tkoj'o'oyëtya'atëty ja Jerusalén kajpn, ets tëkokyë naax kajpn kyuuy'ëw kyuuya'axëtëty.

⁸ Tëë yë Wintsën xyëëw tukajpxpety ets y'a'oykyë'ë të txajjë'ëky mëti'ipë maayëpën winë ets të y'ënä'äny: Nijëna'ajës nka'ëkyajkutujknë ets mmëtsip yë'ë tjë'kxtëty tkaytyëty yë mtsajpmok ëkë jaaypyo'kxyjyä'äy yë'ë t'uuktëty yë mtsatsym nyëë mëti'ipë të xynyitunën;

⁹ Miitsëty nëjkx kë'ëm xyajpëtë'ëktë ja mpëjktä'äkyëty miits nëjkx kë'ëm xyjyë'kxtë ets ëjts xyajmëjnaxtëty; nëjkxëp xyajmuktë yë mtsatym tyëëmëty ets nëjkx ja tsatym nyëë xy'uuktë jap tsajptëkoty.

¹⁰ Pëtsëmtë, pëtsëmtë tëjk ëkë'ëy, nipëjktaakëtë ja nyë'ë tyu'u ja nnaax nkajpnës. Oytyuntë yajxon ja në'ë aaw tu'u aaw ets xyjyëkoonta'atëty yë tsaa; Pëjkta'aktë tu'uk ijxpäjtën ets naax kajpn t'ixtëty.

¹¹ Tëë ja Wintsën tuk'ëwa'anëtyä'äy ja naax kajpn naaxwiinyëtë apëtsëmy: jëtu'un të t'ënëëmë Ënëëmëtë yë Sión kajpn ko tëë jyä'ty ja Yaj'ëwaatsëpëtsëëmpë. Yë Wintsën tëë ja nyaax kyajpn tyaj'ëwaatsëpëtsëmy, yë'ë yajmiimpy.

¹² Ets Israel ja'ayëty yajtijanëtë Ja wa'atspë ja naax kajpn. Mëti'ipë yë Wintsën të yaj'ëwaatsëpëtsëmëtën, ets näjyëtu'un ja Jerusalén kajpn mëkpë yajtsokyën. Ja naax kajpn ka'apë yaj'ëxmatsyën nätyu'uk.