Isaías 50 - Biblia Dc en Mixe de Quetzaltepec

Yë Wintsën pyutëjkëp yë ja'ay mëti'ipë tuk'ijxpäjtëpën

¹ Jëtu'un ja Wintsën y'ënä'äny: Miitsëty këtii m'ëna'antëty ko paatyës ja Israel kajpn të n'ëxmatsy, mëti'ipë miits mtaak'ajtëpën ëkë paatyës të ntooky ma wiink kajpnën jä'äkyëjxm koos ënety pën nmënu'kxy'äty. Miitsëty paaty të myajtooktë wiink naax wiink kajpn jä'äkyëjxm ko të mpokytyuntë; ja Israel kajpn paaty të yaj'ëxmatsy jä'ä ko miitsëty je'eyë të mkäjpxykyumëtoownaxtë.

² ¿Tii ko ka'ap pën npatyës koos ojts njaminy? ¿Tii ko ka'ap pën y'ëtsooy koos ojts njamëkäjpxy? ¿Jëtu'un m'ënantë ko ka'apës xymyäy pën nyajtso'okëtyës? ¿Jëtu'un m'ënantë ko ka'apës xymyäy pën nyaj'ëwaatsëpëtsëmëtyës? Ëjts tu'k aaw je'eyë nkäjpxyës tääts ja mëjmejy tsyi'itsy, ja mëjnëë y'awinpity të'ëts'itjot ets ja nëë jëyujk tyëëtsë o'kta'atë ëkë pyutsnëtë ko ka'ap ja nëë.

³ Nyajkootsëpës ja tsajp ets jë'ë ya'ax nyaj'ityës.

Wi'ix ja Wintsën ka'ap tsyë'ëkë jyawën ma ja ëyo'on jotmay y'ityën

⁴ Tëës ja Wintsën xynyë'ëmo'oy xytyu'umo'oy wi'ixës ja aaw ayuk oypyë ntukwinmëtya'akëtyën ja ja'ay tëëpë y'ënu'kxën ets tëëpë myëjaawkëxyën. Jopyëp xytyukmëtoowkojyës ja oypyë jaantypë.

⁵ Yë Wintsën yë'ëjës të xymyo'oy ijxkujk ja'aykyujkën, e ëjts käjpxykyupëjkpë të nnäpyëjktä'äkyës ets ka'apës ni'ikyë të nnäyu'ts të nnäkyiiyënë.

⁶ Ojtsës yë njot nnini'kx nkë'ëyäky ets yajwop yajka'atsëty, ets ka'apës wi'ix n'ënany ko tnëwijxtaaytyë ja n'awaayës. Oy ojts pën xy'ojy xyä'äxyës ets xywyintsujy xyjyëjptsujyës, ka'apës n'akoowtuty.

⁷ Jä'ä ko nija'apës ko ja Wintsën, yë'ëjës xypyutëjkëp, paatykyëjxm ka'ap nyajpokyës oy pën xyjya'ojy xyjyayä'äxyës; paatykyëjxm mëk nyajpaatyës tsaajën, jä'ä ko wa'atsës nijawë ko ka'ap tjëkyepy pën xytyukxi'ikëtyës.

⁸ Winkon yajpaaty mëti'ipës xyajtsokpën: ¿Pën jää pën mëti'ipës xy'ëxëëk'ijxpën? Tsojk nimäjtsk nja'amëmë ma ja kutujkënën. ¿Pën jää pën mëti'ipës xynyiwaanpätaanpën? Wä'än tminy ets wä'änës xytyukwinmëtoy.

⁹ Ëjts tyamës n'ëna'any ko yë Wintsën yë'ëjës xypyutëjk xypyupäjtp; ¿pën jyëkyejpy nëkoo xynyani'ëënëtyës? Tëkokyë yë nmëtsipës jëtu'un nëjkx pyu'ta'atë tuk witën.

¹⁰ Miitsëty ninaak xymyëjjaw xykyënu'kxyjyawëtë ja Wintsën, ninaak xymyëtoow'itën mëti'ipë ja tyuunpë kyäjpxyp myëtyäkpyën, oy muum mku''ux mkukootsëtë, oy muum mkupi'itsëtë, jam ja mjot mwinma'any pëjkta'aktë ma Wintsënën, yi'iyë Dios tukjotkujk'atë.

¹¹ E tëkokyë ja ja'ayëty mëti'ipë je'eyë tsip y'ixkujkëtyëpën ets tnipëjktaakëtë wi'ix tii tuuntëkoytyëtyën, kë'ëm nëjkx ëxëëk jyatë tsipjoty, ma ja tsipën mëti'ipë ënety kë'ëm të xy'ixkukëtën. Yë Wintsën kyäxäämpy ya'atë ëyo'on ets jam nëjkx m'ooktë.