Isaías 5 - Biblia Dc en Mixe de Quetzaltepec

Ma ja tsatsymkyam y'ijxpäjtën'atyën

¹ Jëtu'unës yam n'ëwa'any ijxtëm jeexyë ja nmëku'ukës y'iyën ma tkuuy'iyën ja tsatsymkyam mëti'ipë myëët'ajtypyën. Ja nmëku'ukës jam ijty tmëët'aty ka tsatsymkyam jë'kxynyaaxjotm.

² Yajxon ojts naax tajyuky, wa'ats tpiiwpëtsëëmtaay ja tsaa ets ojts nakemy. Jam kam'itkujky ojts tu'uk ja tëjk tkojy, ets tnipëjktakëy ma ja tsatym yajwinma'atsëtyën. Ja nmëku'ukës jëtu'un tjëjp'ixy pa'ak yowë ja tsatym pyëtsëmëty, e ko ja tsatym ojts tyëëm'aty, aak xunëty ojts pyëtsimy.

³ E tyam miits nyajtëwtë Jerusalén ja'ayëty ets miits Judá ja'ayëty: ¿Pën jëtää ja poky myëët'ajtyp, ja tsatym ëkë ëjtsë?

⁴ ¿Wi'ixës jëtää jeexyë n'ëktuny ja ntsatsym kam? ¿Ëkë wi'ixës jëtää ja ntsatsym kam të ntuny? Ëjts jä'äs të nja'ëwxity pa'akëty jeexyë të tyëëm'aty, e aak xunëty të pyëtsimy, ¿wi'ix jëtää ko jyëtu'unëty?

⁵ E tyam ntuknijawëja'antë wi'ixës ja ntsatsym kam ntuna'anyën: njëpëkäämpyës yam ja nyikemy ets ja kam tyimkutëkoyëty; tyamës ja nyipotsy njijtë'ëkanë ets ja ja'ay jap tyëkëtëty ets tkutä'änta'atëty;

⁶ jëtu'unyës ntimyjyä'äytyëkoyä'äny. Ni pën kyakuyu'ujëtëty ets ni pën kyawinpux kyawinpootëtëy, äämjyoty pejyjoty nëjkx wyi'imy. Ëjts kë'ëm njëpëkäämpy ja yoots nëma'a ets ka'ap y'ëktuunëty.

⁷ Ja tsatsymkyam, mëti'ipë ja Wintsën jyä'ä'ajtypyën, mëti'ipë maaytyääyëpën winë; yë'ë ja Israel kajpn, ja Judá kajpn. Yë'ë ja Wintsën të tjajëjp'ixy ma yë'ëjëtyën jeexyë tpatuntë ja ënä'ämën tëyajtën, e yë'ëjëty je'eyë yajja'ay'ooktë; ja nipaye'eyën të tjajëjp'ixy ma yë'ëjëtyën, yë'ë të tpaaty ma ja'ay je'eyë jyë'ëtën ya'axtën mëët ja pëjkën ijxën.

⁸ Janty mon janty tuk miitsëty myajpaatë, nëkoopë mjëën mtëjk xynyijuuypyätë, nëkoopë mkam mtu'u xypyëjkta'aktë, ka'ap xy'a'ixëtë ets wiinkpë nyaax tpaatëty, ets të mtsënaaytyaknpëktë, jëtu'un tä jeexyë miits nätyu'uk nkajpn'atën.

⁹ Tëës xy'ënëëmë ja Wintsën mëti'ipë maaytyääyëpën winë: Kanaak ja jëën tëjk y'atëkoyä'äny; oy jënu'un oytyuny jyakëxë'ëky, ni pën nëjkx jap kyatsëënë.

¹⁰ Oy jënu'un katsy'am tsatym jya'itëty, wäänë nëjkx wyinmuky. Oy xa'k'am tsajpmok jyapëtë'ëkëty, tu'kxa'kën nëjkx je'eyë wyinmuky.

¹¹ Janty mon janty tuk miitsëty myajpaatë, tsojk mpëtë'kojtë ko m'uuktë mmu'ukëtë, ets jëtu'un mkutsu'ujëtë.

¹² Xuxpë wojpë, ëëwpë koowpë mëët mxëëwtuntë, ka'ap ja ka'ayën ukën y'ëmaaytyä'äky ma kaaypyäjnën; je'eyëp ko tëë xyjyä'äytyëkooynyëtë mëti'ipë Dios të tunyën, ka'ap xy'ëkja'amyäjtsnëtë mëti'ipë të tyajkojyën.

¹³ Paatykyëjxm, mëët yë'ë ko ja naax kajpn ka'ap jyä'äkyukë, ni'amukë mnëjkxta'aja'antë wiink naax wiink kajpn tsumy matsy. Tëkokyë ja ja'ayëty mëët ja kyutuunk yuu'o'kta'aja'antë.

¹⁴ Jëtu'un tä kaa tni'ëwë'ëkyën yë jyi'kxy, jëtu'un ja naaxwiinyëtë y'ëwa'atsa'any, ets ja naax kajpn jap kyuka'anaxa'any mëët ja y'ënä'ämpëtëjk, jä'ä ja ja'ayëty jëtu'un jatantëp mëti'ipë ja wit meeny ka'ap ëmaay tjawëtën ets xëmë xyëëwtuntë.

¹⁵ O'ktëy nëjkx ja ja'ay jyatë, mëti'ipë ënety mëj këjxm të nyäjyawëtën, naax'ix naaxkow nëjkx jyaak jëtitë.

¹⁶ Ja Wintsën mëti'ipë maaytyääyëpën winë, nëjkxëp ja myëj'ajtën tyaj'ixyë ko ënety winë tnipaye'ey; jëtu'un nëjkx ja Wintsën tyaj'ixyë ja wya'atsajtën ko ënety mëtëy winë tuny.

¹⁷ Nëjkxëp ja naax kajpn kyutëkooytya'atë. Jëyujk tënaaytyakn nëjkx y'awinpity ja kajpn. Yë'ë nëjkx jam y'ujts'oktë tsajppax ets kupixyny.

¹⁸ Janty mon janty tuk miitsëty myajpaatë, jä'ä ko mëët ja näywyin'ëënë mtuuntëkoytyë, jëtu'un ja nëë poky xypyajëtitë tä kepy wintëkäämpë yajpajëtutyën.

¹⁹ Miitsëty mëti'ipë ënantëpën: Wä'än yë Dios tsojkyë tuunkojy tii tyunäämpyën ets n'ijxmëty; wä'än tsojkyë tuunkojy mëti'ipë të tuknipëjktaakën, ets nija'awëmëty.

²⁰ Janty mon janty tuk miitsëty myajpaatë, jä'ä ko yë'ë mtijtëp oy mëti'ipë ëxëëkën. Koots xy'ixtë ja xëënyajtën ets ja kootsajtën xëëny xy'ixtë; ja ta'ampë pa'ak xyjyawëtë ets ja pa'akpë ta'am xyjyawëtë.

²¹ Janty mon janty tuk miitsëty myajpaatë, jä'ä ko wijy mnäyajnaxëtë.

²² Janty mon janty tuk miitsëty myajpaatë, jä'ä ko je'eyë m'uuktë mjë'kxtë ets jëtu'un mnäyjyawëtë mëtaktëp yowë, tëë xyjyajnëtë wi'ix xyëpintëtyën ja uuky ets ka'ap pën m'ëkmëëpatënëtë.

²³ Mnimeenypyëjktëp ets ja ëxëëk ja'ay ka'ap pyokytyëkëty, ets ka'ap xypyaye'eytyë ja wa'ats ja'ay ijxtëm pyäätyën.

²⁴ Paaty miitsëty, jëtu'un nëjkx mjatë mkëpätë tä aay pu'uxm nyitoyën ets tä aaykyëta'ak jaam jok jyätyën, tä yë kepypyu'utë'ëkyën ets tä yë pyijy tyëtsta'ayën ets naax y'awinpity. Mëët ko ja Wintsën mëti'ipë maaytyääyëpën winë ja y'ijxpëjkën ets ja y'ënä'ämën ka'ap të xypyatuunëtë.

²⁵ Paatykyëjxm yë Wintsën të tukjoot'anpëky yë nyaax kyajpn, tëë tnipëtë'ëky ets tëytyuny. Tëë ja ëyo'on jotmay y'ity mëjwiin këjää jam tunjotm, xii yaa muum ja o'kpë të kyä'äy në'ëjoty tu'ujoty tä pu'uxmën. E ja Wintsën ja y'äkë tyoyë ka'ap xyeemnyëm, je'eyëm ja ëyo'on jotmay tyaj'ity.

²⁶ Tëë ja Wintsën tu'uk ja wit wintëy tpëjktä'äky ets të tmëkajpxmuky ja naax kajpn ka'apë tkajpnëtyën; jëkäm të tyajtsoony ets të tyajminy. Poj'am myina'any, ka'ap pyo'oxa'any;

²⁷ ka'ap jam pën ma yë'ëjëtyën mëti'ipë të y'ënu'kxën, ka'ap pën myä'äy, ka'ap pën mëti'ipë wyëën jo'onyën, ka'ap pën mëti'ipë kyë'ëk të wyimpotyën.

²⁸ Aak jëjpxu'uny ja kyu'umënëty ets aak wo'onë'ëky tyaj'itë ja tyi'pxnëty. Ja kyëwaayëty aaktam ja kyujup mëti'ipë juunën tä tsaajën, ets jëtu'un y'ëwtity ja kepy wintëkäämpë ja nyiye'eypyäjn pojxujtykyën.

²⁹ Jëtu'un nyiitsy tä kaajën, tä kaajën mëti'ipë të jyëyujk matsyën, ets tmënëjkxy ja jëyujk ooky, pën ëkpëjkëtëp.

³⁰ Tääpë kajpn, ko ënety xëëw jëmëjt tpaaty, jëtu'un nëjkx yajmëtoy tä mëjmejyën ko ënety tukja'ty yë Israel kajpn; kootsëm nëjkx yë naaxwiinyëtë jyäty ets wa'ats nëjkx pyi'tsta'ay yë të'kxpë jajpë.