Isaías 48 - Biblia Dc en Mixe de Quetzaltepec

Ma ja Wintsën tnikäjpxyën tii jemy tunan jatanëpën

¹ Mëtoow'it ya'atë aaw ayuk, miitsëty jënu'un yë Jacob t'u'unk'aty t'ok'atyën, mëti'ipë xyëëwajtëpën Israel, Judá y'u'unk y'ok. Mëti'ipë tii winë nyikajpxtëpën mëët yë Wintsën xyëëwkyëjxm, mëti'ipë y'ëwtajtëpën yë Dios, mëti'ipë yë Israel ja'ay Tyios'ajtëpën, wiinkë'ëy akë'ëy.

² Mëti'ipë nätyijëtëpën kënu'kxykyajpn, ets jam nyäkyuwanëtë ma Tiosën, mëti'ipë Israel ja'ay Tyios'ajtëpën, ja Wintsën mëti'ipë maaytyääyëpën winë.

³ Ojts tëëyëp ntuk'ëwaanë wi'ix tii tsyo'onë'ky tsyo'ontäkyën; ëjts ojts kë'ëm nnikäjpxy. Ajotkumonës ojts winë ntuny ets tyuunë jyajtë.

⁴ Ëjts nija'apës ënety wa'ats ko mijts nijënu'un mkakäjpxyjyä'äkyukë, tsip ets myajkajpxwijëty, jëtu'un ja mjot mwinma'any tä tsaajën tä pujxnën, ka'ap nijënu'un tii nyäkjyätyë.

⁵ Ojts tëëyëp njatuk'ëwaanë ka'anëm ënety tii tyunyë jyätyë. Këtiipë jeexyë m'ëna'any: Yë'ëjës yë n'awinax të myëtä'äky, ëkë yë'ë yë naaxpotsyës jëtu'un të tyajkutuky.

⁶ Mijts tëë wa'ats xynyijawë mëti'ipë tyam yaj'ijxp yajtuunpën, ets kopkpëky ko xykyupëky ko mëtëy. E tyam yë'ë ntuk'ëwaanëjäämpy jempyë, yu'utsypë ka'apë xynyijawën,

⁷ mëti'ipë tyam naamkojpën, ka'ap yë'ëjëty tëëyëpë, mëti'ipë ënety ka'ap maa të xymyëtoyën yajnimëtyä'äky. Këtiipë m'ëna'anëty: Tyaapë nija'apës yë'ë.

⁸ Mijts ka'ap ënety ni ma jëtu'unpë xymyëtoynyëm ets ka'ap ënety xynyijawë, jä'ä ko mijts nat xëmë të mnäypyëjktä'äkyë. Ëjts wa'atsës të nijawë ko mijts ka'ap oy të mjuuky'äty, Nija'apës ko je'eyë të mkäjpxykyumëtoownaxy, jä'ä xëmë të myajtijy ko ka'ap mja'akyukë.

⁹ Je'eyëp ko mëkës të nmä'kxtuky yë'ëjës nkayajnipäxëtëkëjäämpy yë nxëëwës paatyës je'eyë të nkumä'kxë ets ka'ap të nyajkutëkoy.

¹⁰ Tëë mijts nyajwa'atsy, je'eyëp ko ka'ap jyëtu'unëty tä ja'ay poop pujxn tyajwa'atsyën, yë'ë mëët të nyajwa'atsy yë ëyo'on jotmay,

¹¹ Yë'ëkyëjxm koos ja nxëëw mëj'äämpy nyäxy, paatyës jëtu'un të ntuny, jä'ä ko yë nxëëwës ka'ap tjëkyepy nyipäxëtëkëty. Ka'apës nkupëka'any etsës ja nmëj'ajt n'oyajtënës wiinkpë yajmo'ojëty.

Ja Wintsën yë'ë yajtso'okäämpy ja nyaax kyajpn

¹² Ëkmëtoowkës, mijts Israel, miitsëty Israel ja'ayëty mëti'ipë Jacob nyaax'ajtyp kyajpn'ajtypyën, mëti'ipës kë'ëm të nmëkäjpxyën: Ëjts jëtu'un tu'uk Tios'ajtp, ëjts jëtu'un jekyëp tso'ontakp ets tyampaat ëjtsyëm ijtp.

¹³ Mëëtës yë nkë'ë ojts nyajkojy yë naaxwiinyëtë, ets näjyëtu'un nwijtstëëyës yë tsajp; koos ojts ntukmëkajpxtë yë xyëëwëty, tääts yu'kxpëjktë.

¹⁴ Tu'ukmujkta'atë ets xymyëtoow'itëty mëti'ipës yam nikajpxäämpyën: ¿pën ma miitsëtyën të tnikäjpxy, mëti'ipë tunan jatanëpën: ko ja ja'ay mëti'ipës të nwin'ixyën yë'ë jëtu'un tyunäämpy ja Babilonyë kajpn ets ja caldeo ja'ayëty tääjës të nmay të ntajyën?

¹⁵ Ëjts të n'ëna'any, ëjts të nmëkäjpxy, ëjts të nyajminy ets oy maa nyëjkxëty oy winë wyinpëtsëma'anxëty.

¹⁶ Winkontë yam ma ëjtsën ets xymyëtoow'itëty ya'atë aaw ayuk: Ëjts nijëna'ajës ojts ayu'utsy ame'tsyë tii nkakäjpxy; tam'ajtpës ko winë tyunyë jyätyë. E ëjts Wintsën tëëjës nmo'oy yë kuttujkën ets nyëjkxëty.

¹⁷ Jëtu'un yë Wintsën y'ënä'äny, mëti'ipë myajpëtsëëmëpën ëyo'ontum, yë Dios wa'atspë jampë yajpaatyën ma Israel kajpnën: Ëjts jëtu'un Tios'ajtp mëti'ipë mWintsën'ajtypyën, yë'ë ntukni''ijxëp mëti'ipë mtuk'oy'atëpën, jam nwoownëjkxy ma ja tu'ujën mëti'ipë mëpaat xye'eyën.

¹⁸ Tëë jeexyë xyjyä'äkyukë mëti'ipë të ntuk'ëne'emyën. Tam jeexyë wyimpäjt'ëtë'ëtsy ja mjuukyajtën, ets ni'ikyë jeexyë jotkujk myajpatnë,

¹⁹ nimay jeexyë ja m'u'unk m'oknë, tä nëë ajinën, ka'apë tjëkyepyën nmëtyo'owmëty, ka'ap jeexyë të nyajkutëkoytyë, ni'ikyë jeexyë të ni''ijxkëta'aktë.

²⁰ Käkpëtsëmtë jam Babilonyë, kukä'äktë yë Babilonyë ja'ayëty. Mëk tukyaax tukjokëtë mëët ja jotkujk'ajtën, tuk'ëwaanëtë wä'än timpyënëty naaxwiinyëtë apëtsëmy: Ënëëmëtë ko ja Wintsën tëë tyaj'ëwaatsëpëtsëmy ja Jacob mëti'ipë tyuunpë'ajtypyën.

²¹ Oy ojts jyanaxtë jam të'ëts'itjotm, ka'ap nëëtëëtsë tmëët'ajtë; jä'ä ko Dios ojts yë nëë tyajpëtsëmy tsaajoty, je'eyë ja tsaa tjëkëëy ets jap ja nëë tyajpëtsëëmy.

²² Jëtu'un ja Wintsën y'ënä'äny: Yë ëxëëkja'aytyëjkëty ka'ap jotkujk jyuuky'ata'antë.