Isaías 46 - Biblia Dc en Mixe de Quetzaltepec

Ja wiink tios mëti'ipë Babilonyë ja'ay y'ëwtajtëpën

¹ Wintakp naaxkoop yë Bel, yë Nebo ka'ap nitii t'ëktuunë; Jëyujk këjxy yajmënëjkxtë yë y'awinaxëty, je'emty yë jëyujk tjawëtë mëti'ipë të y'ënu'kxëtën.

² Tam ja awinax mëti'ipë u'upyën ets tam mëti'ipë tëë tyëjwä'kxyën, ka'ap tjëkyepy wi'ix nyäyajtso'okëtëty, ets yë'ëjëty jam yajmënëjkxtë të'ëts'itjotm.

³ Mëtoow'itë ya'atë aaw ayuk, miitsëty Jacob yë y'u'unk y'okëty mëti'ipë të wyë'ëmtën ma ja Israel kyajpnën: Tëë miitsëty ntsëëmjëtitë ka'anëm ënety mintënëm naaxwiiny naaxkëjxy; tëë ntsääntë nkontë,

⁴ ëjts je'eyëmës ënety n'ixëty ko miitsëty nëjkx mëjja'ayëtë, ko ënety miitsëty tëë mkupo'ojënëtë ëjts je'eyëm nëjkx miitsëty nmajts'itë. Ëjts miitsëty të nyajkojtë ets je'eyëm ntsäänä'an nkona'antë, ëjts miitsëty nmajts'itantëp ets nyajtso'okantëp.

⁵ ¿Pën mëët xy'ëk'ijxkijpxtëtyës? ¿Pën maaytyëp mtajtëp jëtu'un y'ixëty tä ëjtsën?

⁶ Tä ja'ay mëti'ipë may yë pu'ts pujxn yäjkpyën ets may yë poop pujxn tkijpxtä'äky ets t'ënëëmë tu'uk ja ja'ay ets t'oytyunëty yë awinax, yë'ëts y'ëwtajtyp ets twinkoxtänë.

⁷ Tmëjëtitë ënät kyejkyijxy ets tmënëjkxtë muum; ma tmëja'tën, kepykyijxy tkëxkë'ëtë ets jam tyajwë'ëmtë; jam y'ity, ka'ap maa nyijkxy. Oy jënu'un tmëya'ax tmëjoktëty t'amëtowtëty yë näypyutëkë ka'ap y'ëtsowa'anëtë ets ka'ap yajtso'okëtëty ëyo'ontum.

⁸ Ja'amyätstë ya'atë, pokyjyä'äytyëjkëty, këtii tii mnätyukwin'ëënëtëty, mëmay mëtajtë yajxon oy.

⁹ Ja'amyätstë wi'ix tëëyëp jyäjty kyëpejtyën. Ëjts jëtu'un Tios'ajtp ets ka'ap ma wiinkpë. Ëjts jëtu'un Tios'ajtp ets ka'ap maa wiinkpë jëtu'unpë tä ëjtsën.

¹⁰ Tëëyëpës nikäjpxy mëti'ipë tunan jatanëpën, ojts nimëtyä'äkyës mëti'ipë ënety ka'ap jyätyënëm kyëpetynyëm; tëëjës n'ëna'any: Mëti'ipës të ntuknipëjktaakën kopkpëky ko tyuna'any jyata'anyë; ëjts ntuunta'ajäämpyës mëti'ipës nmääpy ntäjpyën.

¹¹ Tëës tu'uk ja'ay nikäxë jamtsow ma xëëw pyëtsimyën, jëtu'un myina'any tä tu'uk joonën mëti'ipë jëtu'un winë tyunäämpyën tääjës nmay ntajyën. Ijxtëmës të nikäjpxyën jëtu'unës ntuna'any, tëëjës yajxon nwinmay nwintajy mëti'ipës ntunäämpyën ets ntuunta'ajäämpyës mëti'ipëjaty nwinma'any'äjtypyënës.

¹² Mëtoow'itë ya'atë aaw ayuk, miitsëty mëti'ipë ka'ap mëpaat pën wi'ix m'ënë'ëmxëtën, mëti'ipë ënantëpën ko tsip ja nitsokën yajpaaty:

¹³ Ëjts tëëjës ntuknipëjktaakë ets jyää'atëty ja ëwaatsëtuuy'ajtën; yë nnitsokënës ka'ap mëpaat pyo'oxy ets ka'ap mëpaat jëkäm yajpaaty. Ëjts yë ëwaatsëtuuy'ajtën ntukpaatäämpy yë Sión kajpn, ëjts nmo'ojäämpy yë Israel ja'ayëty ja mëj'ajtën oyajtën.