Isaías 45 - Biblia Dc en Mixe de Quetzaltepec

Ma ja Wintsën tuknipëkyën ja Ciro tu'uk ja tuunk

¹ Ojts yë Wintsën tkënu'kxy yë Ciro ets yajkutukëty, kyë'ëkëjxy twijtsë'ky ets yajkutukëty ma ja naax kajpnën ets tpëjkëtya'ajëty ja yajkutujkpëtëjk mëti'ipë myëtsiptuuntëpën. Yë Wintsën ojts tyajkutuky ets tëjk'aaw y'ëwa'atsëty maajaty nyäxyën ma ja naax kajpnën ets ni pën kyamayëtëty tyaj'ëtukëty ja tëjk'aaw. Ets jëtu'un t'ënëmaay:

² Ëjts mijts ntu'uwinye'eyäämpy ets njita'amjäämpyës, n'atëjëtya'ajäämpyës ja tëjk'aaw pujxn mëëtpë, ets piw nuukës ntuunta'aja'any ja juunpujxn.

³ Mijts nmooytya'ajäämpy winë: mëti'ipë tsoowpaatyën, mëti'ipë yu'utsy ijtpën ets mëti'ipë pëjkë'ëky ijtpën, ka'apë ni pën tnijawën ets xynyijawëty koos ëjts jëtu'un Wintsënajtp; mëti'ipë yë Israel ja'ay Tyios'ajtëpën ets mëti'ipë mxëëw mtukmëkajpxëpën.

⁴ Mëët koos ijty mëk ntsoky njawë yë Jacob, ja Israel kajpn mëti'ipës nwin'ijxën, mxëëw të ntukmëkäjpxy ets tëë mëk'ajtën nmo'oy ets mëj'äämpy mnaxëty.

⁵ Ëjts jëtu'un Wintsënajtp, kamaa wiinkpë jëtu'unpë tä ëjtsën, ka'ap ma wiinkpë Dios. Tëë nyaj'ijxpëky ets mtsiptunëty oyës të xykya'ixy'äty,

⁶ ets yajnijawëty naaxwiinyëtë apëtsëmy ko ka'ap maa wiinkpë jëtu'unpë tä ëjtsën, Ëjts jëtu'un tu'ukyë Wintsënajtp.

⁷ Ëjts nyajtë'kxyp nyajjäjpy ets ëjts nyajkoots'ajtyp, nyaj'oy'ijtypyës winë ets nyaj'ëyo'onpatypyës tii. Ëjts, maas nWintsën'atyën, ntuuntääpyës oy tyimtiijëty.

Ma ja Wintsën yajkutukyën;

⁸ Ëjts nkäxäämpyës yam këjxm yë nmëk'ajtënës ets nmëta'aka'anyës ma tsip y'ityën, jëtu'un tä myaanikyën ets tä tyuuyimyën ets jëtu'un nyaaxkëta'aka'any, jëtu'un ja nitsokën y'ita'any ets jyää'ata'any ja tëypyë nipaye'eyën.

⁹ Tu'uk naaxtu'ts ets oymyëti'ipë tu'tsëty, ka'ap mëët nyäy'ojyë mëti'ipë yajkojëpën. Yë naax mo'onts ka'ap t'ënëëmë mëti'ipë pojtsëpën: ¿Tii mtuumpy?, ets ka'ap tjëkyepy t'ënëëmëty mëti'ipë të yajkojyën: Mijts ka'ap xyjäty mtunëty.

¹⁰ Ka'ap tjëkyepy tu'uk u'unk ëna'k t'ënëëmëty yë tyeety tyaak: ¿Miitsëty tiijës ko ojts xy'ëkyajmiintëpë naaxwiiny naaxkëjxy?

¹¹ Yë Wintsën, Wa'atspë yajpaatyën ma Israel kajpnën, mëti'ipë Israel të yajkojyën, jëtu'un y'ënä'äny: ¿Miitsëty yë'ëjës xyajtëwantëp wi'ix ja n'u'unk n'ëna'kës nyajyeeky nyajpetyën, ëkë yë'ëjës xytyukni''ixëjantë wi'ixës winë ntunëtyë?

¹² Ëjts të nyajkojta'ayës tëkokyë yë naaxwiinyëtë ets naaxwiinyëtë ja'ay. Nkë'ë n'aawës mëët të nwijtstëyës yë tsajp ets të n'ënä'ämta'ayës ja xëëw, po'o ets ja mëtsa'a.

¹³ Ëjts, Wintsën mëti'ipë maaytyääyëpën winë, tëëjës yë Ciro n'ëne'emy ets myëta'akëty, aak ëwaatsës nyaj'ita'any ja nyë'ë aaw tyu'u aaw; yë'ë kyoj'oyëjäämpy yë nnaax nkajpnës nyajtsmatsëjäämpy ëwaatsëtum yë nja'ayës mëti'ipë wiink naax wiink kajpn ojts yajmënëjkxtën tsum matsy, ka'ap t'amëtowa'any nyijuuypyëtsëm.

¹⁴ Jëtu'un ja Wintsën t'ënëmaay ja Israel ja'ay: Ja naaxtuunpë ja'ayëty japë Egiptë yajpaatën, ja ajuupyëtëjk ets ato'kpëtëjk mëti'ipë tso'ontëpën Etiopíë, ja yenyjyä'äytyëjk mëti'ipë Sabá itjotm yajpatëpën, jam nëjkx nyäkyuwa'anëtë ma mijtsën ets nëjkxëp jam myëtuntë; tsumy matsy nëjkx xymyënëjkx mëët pujxntejpxy, nëjkxëp mwinkoxtänëty ets nëjkxëp mënu'kxtä'äkyë: Tëyajtën yë'ë ko yë Wintsën tam yajpaaty ma miitsëtyën. Ka'ap maa wiinkpë ijxtëm yë'ëjën ets ka'ap maa wiinkpë tios.

¹⁵ E mijts Dios, ka'ap myaj'ixy, Dios mëti'ipë yajnitsokpyën yë Israel kajpn.

¹⁶ Tëkokyë ja'ayëty mëti'ipë yajkojtëpën awinax, tsëtyu'unmëët nëjkx wyë'ëmtë, tukxi'iky ets o'ktëy nëjkx jyatë.

¹⁷ E ja Israel ja'ay Wintsën ojts yajtso'okëtë, yatsokëtë winë xëëw winë jëmëjt, ets yë'ëjëty ka'ap ojts nijëna'a tsëtyu'unmëët wyë'ëmtë ets nijëna'a o'ktëy kyajata'antë.

¹⁸ Mëti'ipë ja tsajp yajkojën, mëti'ipë Tios'ajtpën ets Wintsën'atpën, mëti'ipë yajkojën yë naaxwiinyëtë ets yajxon tyaj'o'oyëtyääy ets tyajta'tspëjktaay, ojts tuknipëjktaakë këtiipë winwa'ats y'itëty, yë'ëkyëjxm të tyajkojy ets twin'it twintsëënëtëty mëti'ipë juuky'ajtëpën, tääts të y'ënä'äny: Ëjts jëtu'un nätyu'uk Wintsënajtp ets ka'ap maa wiinkpë.

¹⁹ Këtii ame'tsyë mkajpxëty muum akootstuuy naaxwiiny naaxkëjxy. Ëjts ka'apës n'ënëëmë yë Jacob y'u'unk y'ok: Jamës xy'ixta'ajëty ma ka'ap tiijën. Ëjts, mëti'ipë Wintsën'ajtpën, mëtëyës nkäjpxy ets aakjä'ä mëti'ipë mëpaat'ajtpën.

Ma ja Wintsën tni'ojën ja awinax

²⁰ Ye'eymyujkta'atë ets mmintëty. Winkoonta'atë miitsëty, nijënu'un të mkäktso'oktën ma naax kajpn o'ktëy të jyätyën. Mëj këjää ja'ay tsyuu'atë ko yë'ë tuk'ijxpätë awinax mëti'ipë mëët kepy y'oytyunyëtyën ets ënät twinkajpxta'aktë tä jeexyë Tiosëtyën mëti'ipë ka'ap tjëkyepy yajtso'okëtëtyën.

²¹ Kajpxtë ets aakmëët nyiwa'kpäjn tii xynyimëtya'akëty, pën m'ënantëp näyajtëwëtë nixim niyam. ¿Pën ojts ëka'any ya'atë jëtu'unpë tnikäjpxy? ¿Pën ojts mtuk'ixëtë tëëyëp? ¿Këtii y'ëjtsëtyë, maas nxëëwatyën Wintsënë?. Ka'ap ma wiinkpë Dios jëtu'unpë tä ëjtsën. Ka'ap maa wiinkpë Dios mëti'ipë mëtakpën tsipjoty ets mëti'ipë yajnitsokpën.

²² Naax kajpnëty jëkämpaatpë yajpaatën, nimiintëkës ets nyajtso'oktëty, jä'ä ko ëjts jëtu'un Tios'ajtp nätyu'uk, ka'ap maa wiinkpë.

²³ Ëjts ojts kë'ëm nyänyikäjpxyë, tëëjës nikäjpxy koos nmëta'aka'any, ets jëtu'un jyänty tyuna'any jyänty jyata'anyë: nëjkxëp ni'ëmukë ja'ay xywyinkoxtänëtës ets nikajpxtë yë nxëëwës,

²⁴ ets y'ëna'ana'antë: Yi'iyë tu'uk yë Wintsën yajmëtakp, yë'ë nätyu'uk mëk'ajtën myëët'ajtyp. Tëkokyë nu'unës ënety xymyëtsip'atën, nëxi'iky tukxi'iky wyë'ëma'antë.

²⁵ Ëjts mëyajtënës ntuunpy ko yë Israel kajpn yë'ë mëta'akaanp jotmëk nyäjyawëja'anyë koos ënety ëjts xytyukjotmëk'aty.