Isaías 43 - Biblia Dc en Mixe de Quetzaltepec

Yë Wintsën yë'ë tu'uk yaj'ëwaatsëpëtsëëmpë

¹ Miitsëty Israel ja'ayëty, Jacob nyaax kyajpn, mëti'ipë yë Wintsën ojts tyajkojyën, jëtu'un yë Wintsën m'ënë'ëmxëty: Këtii mtsë'ëkë, ëjts tëëjës mijts nyaj'ëwaatsëpëtsëmy; mxëëw të ntukmëkäjpxy ets të n'ënëëmë, mijts njä'ä'ajtyp.

² Pën nëë muum mtuknaxäämpy, ëjts tam'ataanpës mëët mijts; pën mëjnëë mninaxäämpy, ka'ap mnëëji'kxa'any; pën jëën mtuknaxäämpy, ka'ap mtsa'aja'anyë; oy jënu'un ja jëën jyayäänëty, mijts ka'ap nitii mjata'anyë.

³ Ëjts mijts xyWyintsën'ajtp, xynyitsokpë'ajtp ets xyTyios'ajtp, ja Wa'atspë yajpaatyën ma Israel kajpnën, Tëë mijts njä'äniwa'any; yë'ë Egiptë kajpn, Etiopíë kajpn ets Sabá kajpn të ntukujuy.

⁴ Jä'ä ko ntsoky njawë, mëj këjää mijts mtsoowpaaty ets ntsojkpy nja'ap. Ko mijts njä'ä'ata'any ets nyajtso'oka'any, tëëjës mayjyä'äy ets naax kajpn nkë'ëyäky.

⁵ Këtii mtsë'ëkëty, ëjts mijts nkuwa'anäämpy. Wä'än tjamëty ma xëëw pyëtsimyën ets ma xëëw kyëtä'äkyën; nyajwinpitäämpyës jatëkok yë mja'ay ets jatëkok tyu'ukyëtëty.

⁶ Etsës n'ënëëmëja'antë ja anëkëjxmtsowpë: Yajwinpitë jatëkok, ja ëpa'tkë'ëytsyowpë n'ënëëmëja'antës: Ka'ap miits xyjyä'ä'atë, ëxmatstë. Yajmintë ja nnëëxës ets ja nmaankës mëti'ipë jëkäm ijtëpën, mëti'ipë wiink naax wiink kajpn yajpatëpën,

⁷ tëkokyë mëti'ipës yë nxëëw nyija'awëtëpën, mëti'ipës të nkojy të nmä'kxyën, mëti'ipës të nyajkojy të mpëjktä'äkyën koos nmëët'aty ja mëj'ajt oyajtën.

⁸ Yajmiintëkës yë nkajpn, mëti'ipë jyamëët'ajtypyën yë wyiin je'eyëp ko ka'ap y'ixy; ets tam jyatatsk, ka'ap myëtoy.

⁹ Tu'ukmujkta'atë naax kajpnëty, tu'ukmujkta'atë mëj it mëj naaxwiinyëtë. ¿Pën ja jëtu'unpë të t'akäjpxy, ëkë pën ojts nikäjpxy tii tëëyëp tuunëp jajtëp? Wä'än tyajmintë ja jyä'äy pën të t'ixyën ets nikajpxëty wä'än tyajmëtoy ja tëyajtën.

¹⁰ Jëtu'un yë Wintsën y'ënä'äny: Miits nyajnajxtëp ijxpë nija'apë, miits të nwin'ixtë ets ntuunpë'atëty, ets xynyijawëtëty pën ëjts ets xymyëpëktëtyës ets xyjyä'äkyukëtëty ko ëjts jëtu'un. Ka'ap maa jëtu'unpë tios tä ëjtsën ets ka'ap nijëna'a jëtu'unpë y'ita'any.

¹¹ Ëjts xëmë Wintsënajtp; ka'ap maa wiinkpë mëti'ipë yajnitsokpën.

¹² Jëtu'un ja Wintsën y'ënä'äny: Tëës nikäjpxy ets tëëjës ntukyaax ntukjokë, ëjts të nyajnitso'oktë; ka'ap wyiink tiosëty, tam ja ja'ay nmëëtëtyës mëti'ipë të t'ixtën.

¹³ Jëtu'un tyimminy tyimku'ty, ëjts jëtu'un Tios'ajtp ets ni pën kyamayëtëty tjëjpmëwa'akëty ja nmëk'ajtënës. Ni pën kyamayëtëty ets tyajma'atëty mëti'ipës tëë ntuknipëjktaakën.

¹⁴ Ja Wintsën, Wa'atspë yajpaatyën ma Israel kajpnën, mëti'ipë të mmo'ojëtën ja ëwaatsëtuuy'ajtën, jëtu'un y'ënä'äny: Ko ënety miitsëty nyaj'ëwaatsë pëtsëmtë, nkäxäämpyës ja'ay jam Babilonyë, ets nyaj'ëwa'atsa'anyës ja tëjk'aaw, tääts ja Caldeo ja'ayëty nyaj'awinpitanës ja xyoontakënëty pëjkën ijxën.

¹⁵ Ëjts jëtu'un Wintsënajtp, mëti'ipë të tyajkojyën yë Israel kajpn, Dios wa'atspë, mëti'ipë yajkutujkpën ma miitsëtyën.

¹⁶ Ojts ja Wintsën tyaj'oyë tu'uk yë tu'u nëëjoty, tu'uk ja najxtakn ma ja nëëkapën;

¹⁷ ets tyajtso'ony jam Egiptë mayjyä'äy mëët yë maykyëwaay ets kyepy wintëkäämpë, Israel ja'ay yajkutëkoyantëp. Tääpë mayjyä'äy ojts y'o'kta'atë, nitu'uk ojts kyawë'ëmy; jëtu'un ojts jyatë tä jëën pyi'itsyën.

¹⁸ E tyam jëtu'un yë Wintsën t'ënëëmë yë nyaax kyajpn: Këtii xy'ëkja'amyäjtsnëty tëëpë nyäxyën, këtii nëkoo xy'ëkmëmaay xy'ëkmëtajnëtëty ja tëëpë tyunyë jyätyën.

¹⁹ Ëjts jemyës yam winë ntuna'any, ets timtyämyë nyajwinkëxë'ëka'anyës. Nyajkojäämpyës tu'uk në'ë tu'u jam të'ëts'itjotm ets tu'uk mëjnëë ma ka'ap tii yony jyiitsyën.

²⁰ Nëjkxëpës xymyëjjaw xy'oyjyawëtë yë aayjëyujk ujts jëyujkëty, tä yë waxën ets patutkën, jä'ä ko ja nëë nyajpëtsëmyës të'ëts'itjotm, ets ma ka'ap tii y'ity wyintëyën, ets nyëë'uuk nyëëpëktëty yë nnaax nkajpnës mëti'ipës të nwin'ixyën,

²¹ ja naax kajpn mëti'ipës të nyajkojyën ets nimëtya'akëty ja nmëj'ajtënës.

²² E mijts Israel ja'ayëty, Jacob yë kyajpn, ka'apës ojts xymyëkäjpxy, ni'ikyënëm ojts xymyëtsipke'exyës.

²³ Ka'apës ojts xytyukwintsë'ëkë ja kupixyny ooky winno'okpyë winxämpyë ets ka'apës nitii wintsë'kën xymyooy. Ëjts ka'apës nja'ënu'kxëy ko n'amëtooy ja wintsë'kën, ets ka'apës wi'ix nja'awëy ko n'amëtooy ja poom jok.

²⁴ Ka'ap të xyjyuy ja waxk mëti'ipë pa'akxu'kpën ets jeexyë të xytyukwintsë'ëkës, ka'apës të xymyo'oy yë jëyujk on mëti'ipës nwintsë'kën'atëpën. Ni'ikyënëmës yë mpoky të xytyukyajtsipke'exy; je'eyës nëkoo të xytyuk'atsipy yë m'ëxëëktu'un m'ëxëëk kajpxën.

²⁵ E ëjts, mëët koos xyTyios'aty, tyamës npo'ta'aja'any mpoky ma të myajja'ay'ookyën, ets ka'apës nja'amyätsa'any ja mpoky.

²⁶ Pën mijts jam tii xynyijawë, mëti'ipës ka'ap oy të ntunyën, wä'än tyajpaye'ey. Nikajpxta'a yajxon wi'ixjatyës muum ntëkoyën, ets yaj'ixëty pën mijts ka'ap tii muum xytyuuntëkoy.

²⁷ Ja m'ap m'ok tyuuntë ja nëë poky, ja mya'ijxpëjkpëtëjkëty ojts xykyäjpxy kyumëtoownaxtë,

²⁸ ja mwintsëntëjk ëxëëk ojts jap y'ëtë'ëtstë maas yë ntsajptëjkën; paatyës ojts ntimmyajtstu'uty yë Israel kajpn, mëti'ipë yë Jacob kyajpn'ajtypyën ets myëtsip yajkutëkoyëtëty.