Isaías 39 - Biblia Dc en Mixe de Quetzaltepec

Ma ja Ezequías t'ëxajën ja Babilonyë kutuunk

¹ Jä'ä xëëw jä'ä jëmëjt ojts yë yajkutujkpë Merodac-baladán, yë myaank yë Baladán, mëti'ipë yajkutujkpën jam Babilonyë, ojts tnijawë ko ënety ja Ezequías mëk të pyikyë ets ko tëë jatëkok tsyo'oky y'akëtä'äky; ënät ja tyuunpë tkejxy mëët ja oy aaw oy ayuk ets tukmëkäjxëy tu'uk ja näynyamo'ojë.

² Ezequías janty'oy nyäjya'awëyë, ojts tuk'ijxta'ay tëkokyë jënu'un ënety winë tmëëtëtyën, tä yë poop pujxnën, pu'ts pujxnën, nëë mëti'ipë pa'akxu'kpën tsowëtypë ets ma tyaj'ityën pëjkë'ëky ja pujxn mëti'ipë myëtsiptuunpyën ets tëkokyë jënu'un winë pëjkë'ëky tmëët'atyën. Nitii ojts tkayajninaxy, wa'ats tuk'ijxtaay jënu'un winë tmëëtëtyën ets maajaty tyaj'ityën.

³ Ënet ja käjpxynyajxpë Jeséas ojts tninëjkxy ja Ezequías yajkutujkpë ets tyajtëëy: ¿Ma tääpë ja'ay tsyoontë, wi'ix të y'ëna'antë? Tääts ja Ezequías y'ëtsooy: Jëkäm tsyoontë, jam Babilonyë.

⁴ Ënet ja Jeséas jatëkok tyajtëëy: ¿Tiijaty të t'ixtë ma m'akujktëjkën? Tääts ja Ezequías y'ëtsooy: Tëë t'ijxta'atë winë. Ni tu'ukës të nkayajninaxy, wa'atsës winë të ntuk'ijxta'ay.

⁵ Tä ja Jeséas t'ënëmaay ja Ezequías: Mëtoow'it ya'atë aaw ayuk mëti'ipë yë Wintsën kyäjpxypën, mëti'ipë maaytyääyëpën winë:

⁶ Pyatäämpy ja xëëw jëmëjt ma myina'antë yë mëtsip ets tyajnëjkxta'aja'antë tëkokyë winë mëti'ipë yajpatpën ma mkutujktaknën ets tëkokyë mëti'ipë të tpaat të t'ixtën yë m'ap m'okëty tyampaat; nëjkxëp winë tmënëjkxta'atë jam Babilonyë, nitii kyawë'ëma'any. Jëtu'un yë Wintsën të y'ënä'äny.

⁷ Yë'ëpaat nëjkx yajmënëjkxtë m'u'unk m'okëty jam Babilonyë, nëjkxëp yajnëtsuktë y'ëxtsyaajëty ets jap myëtuntëty ma ja yajkutujkpë ja y'akujk tëjkën.

⁸ Ezequías yë'ë tyukjotkujk'atëp ko yë'ë oy yajpaata'any mapaat jyuuky'ätyën, paaty t'ëtsooy ja Jeséas: Ja Wintsën ja y'aaw y'ayuk mëti'ipës mijts xytyuknimiimpën oy yë'ë.