Isaías 38 - Biblia Dc en Mixe de Quetzaltepec

Ma ja Ezequías pya'ampetyën ets ma jatëkok tsyo'okyën.

¹ Ënet ojts yë Ezequías mëk pa'am pyäätyë. Tääts yë Jeséas käjpxynyajxpë nyimiinë ets y'ixa'anyë wi'ix ënety yajpaatyën, ënät y'ënëmaayë: Jëtu'un yë Wintsën y'ënä'äny: Oy y'oyëty ko xyakëty ja m'aaw m'ayuk naamka'anëm m'ookynyëm, jëtu'un nijawëtëty ja m'u'unk mto'oxytyëjk tii mtsojkën'ajtypën, jä'ä ko m'ookaanp tsojk, ka'ap mtso'oka'any.

² Ënet ja Ezequías jam myëj'ijxpejty potsywinm ets tyëjkëy Dios mëkajpxpë ets y'ënäny:

³ Tyam nmënu'kxtä'äky mijts Wintsën ets xyjyä'äymyätsëty wi'ix oy të nmëtunyën ets tëy tëtä'äky të nyajtu'uye'eyës yë njuukyajtën, tëë npatunyës ijxtëm mijts xy'oyjyawën. Ko nyu'kxtaktaay tääts tyëjkëy yaxpë.

⁴ Ënet ja Wintsën ojts tuk'ëne'emy ja Jeséas

⁵ ets nëjkx t'ënëëmë ja Ezequías: Jëtu'un ja Wintsën y'ënä'äny, mëti'ipë y'ëwtajtën yë m'apteety David: Tëës nmëtoy ijxtëm mijts të m'ëna'anyën ets mjë'ëyën myaxën tëëjës nmëtoy. Tyamës njaakyajkëjääjëja'any majkmokx jëmëjt yë mjuukyajtën.

⁶ Mijts ets tëkokyë yë Jerusalén kajpn nputëkëjäämpyës ets nyajtso'okäänpyës, këtiipë nëkoo nyitëkëtëty yë Asiria yajkutujkpë. Ëjts ja naax kajpn n'ijx'itäämpy nkëwent'atäämpyës.

²¹ Ojts yë Jeséas tyaj'oyë yë tsatym myo'otsy ets yajtuknipëkëty ja tsyëtyut ja yajkutujkpë ets ja yajkutujkpë tsyoky.

²² Ënet ja Jeséas tyajtëëy: ¿Tiijës ntuk'ixëp etsës nnijawëty ko jyëkyejpyës nnëjkxëty ma tsajptëjkën?

⁷ Ënet ja Jeséas y'ëtsooy: Ya'atë ja Wintsën yäjkpy ijxpäjtën ko yë'ë tyunäämpy mëti'ipë të tnikäjpxyën.

⁸ Ma xëëw mëtyoowpën mëti'ipë myëët'ajtypyën yë Ahaz, tyamës yë xëëw nyaj'ixtëkë ye'eyä'äny majk wä'äkyën ma jam kyëta'akanën. Ënet ja xëëw majk wä'äky ojts y'ixtëkëwä'äky ets näjyëtu'un ojts ja y'äpk y'ixtëkëwä'äky.

⁹ Ko ja Judá yajkutujkpë tsyoky y'akëtäky, ënät tyaj'o'oyëy ya'atë ëy:

¹⁰ Tyaajës ënety ëjts të nmay të ntajy: Maas ënety jotkujk njuuky'ätyën jääjës nëjkx ntso'onë; jä'ä ko jëtu'un të nyaj'ëne'emyës koos jam nnëjkxëty ma xëmëkyëjxm ooky nyajpatmëtyën.

¹¹ Etsës të nmay të ntajy: Ëjts ka'apës nëjkx Wintsën n'ëk'ijxnë yaa naaxwiiny naaxkëjxy, ni pënës nka'ëk'ixanë mëti'ipë yaa juuky'ajtëpën.

¹² Tëës ja ntsënaaytyakn xyajma'ta'atë, tëëjës xypyëjkëtë tä tsajppax këwent'ajtpën kupixyny këwent'ajtpën yajpëjkëtën yë y'ijt taknëty. Ëjts jëtu'unës ënety ja njuukyajtën yajpatnë tä tu'uk wit të yajpukëëtsyën. Xëëny kootsës nyajtëytyuunë.

¹³ Jëtu'un tääjës jeexyë kaa xy'akääp xytyuk kääpën, jëtu'unës një'ëy nyä'äxy xëëny koots. Xëëny kootsës xyaj'ëyoy.

¹⁴ Je'eyës njaak ajëjy tä kuukën, tä pakën. Tëës ja nwiin nyatimy'ënu'kxënë mëët koos jam tsajpkëjxm mpa'at'ixy. Wintsën ëjts ëxëëkës näjyawëty, tun mëyajtën mijtsës ni ijxkëtak.

¹⁵ ¿Ëjts wi'ixës na'ëna'anëty, yë'ëjës të xyajkojy? Tëës yë ntsuu jyatimkyäknë mëët ko je'eyë pyëjknë y'atoonë n'aaw njotës.

¹⁶ Mëti'ipëjaty ja Wintsën pyëjk'ijtyp myajts'ijtypyën, juuky'atantëp yë'ëjëty, etsës jam njuuky'ata'any ma yë'ëjëtyën.

¹⁷ Ix, tyam jotkujkës nyajpaaty, ets ka'ap n'ëkmoon n'ëktujknës. Mijts të xykyëwent'aty yë njuukyajtënës këtiipë kyuka'anaxëty jap jutjoty, jä'ä ko mijts tëë xymyä'kxta'ay yë npokyës.

¹⁸ Mëti'ipë jap yajpatëpën jutjoty, ka'ap t'ëkjëkyäjpnëtë wi'ix mwin'ëw mwinya'axëtëty, mëti'ipë të y'ooktën, ka'ap t'ëkjëkyäjpnëtë mëjjaw mkënu'kxy jawëtëty; mëti'ipë jap jutjoty tëë kyënajxnëtën, ka'ap niwi'ixtsow t'ëkjëkyäjpnëtë wi'ix oy mmëtunëtëty.

¹⁹ Yi'iyë tëy mëti'ipë juuky'ajtëpën jyëkyäjptëp wi'ix mwin'ëw mwinya'axëtëty, jëtu'un tääjës ëjts tyam ntunyën.

²⁰ Tyaa ja Wintsën tyimyajpaaty etsës xyajtso'oka'any. Tsojk nwinxoontakëmë mëët yë kow ets tsojk n'ë'ëwëm nyaxëmë jap ma Wintsën yë tyëjkën.