Isaías 37 - Biblia Dc en Mixe de Quetzaltepec

Ma ja Judá ja'ayëty yajtso'okëtën ja Wintsën

¹ Ko ja yajkutujkpë Ezequías tmëtoowpaty jëtu'unpë ja ayuk, ojts tkë'ëtswä'kxy ja wyit ets nyätyukxojxë ja wit mëti'ipë kuumpën u'kxpën mëët ko ëxëëk nyäjyawëty ets ojts nyijkxy ma ja Wintsën ja tsyajptëjkën.

² Tä tkejxy ja Eliaquim mëti'ipë wiinkëëpy kujkëëpyën ma ja kutujkëntëjkën, ja Sebná mëti'ipë kujääpyën ets ja teetytyëjkëty, mëjja'aytyëjkëty ojts ja wyit tuktëjkëtya'atë mëti'ipë kuumpën u'kxpën mëët ja amay jotmay ets ojts ninëjkxtë ja käjpxynyajxpë Jeséas, yë Amós yë myaank,

³ ets t'ënëëmëtëty ko ja yajkutujkpë jëtu'un ënaanp: Mon tuk tyam nyajpatëmë, mëj këjää ja tëytyu'unën, ka'ap ja jot mëjaawnë, jëtu'un tä tu'uk to'oxytyëjk jyätyën mëti'ipë mëjaawkukëjxëpën ko y'u'unk myääy tyimminanë naaxwiiny.

⁴ Jääpëk jeexyë yë mWintsën të tmëtoy wi'ix të y'ënä'änyën tääpë Asiria ja'ay mëti'ipë tsiptuunpëtëjk nyiwintsën'ajtypyën, ma ëxëëkjaty të tnikäjpxyën yë Dios juukpyë ets tëytyunëty ijxtëm pyaat'atyën, yë'ë Wintsën, Dios mëti'ipë mTios'ajtypyën tëë tmëtoy wi'ix të nyikäjpxyën. Paaty tyam yajnax wäänë ayuk ma Wintsënën ets tputëkëty mëti'ipë juuky jaakwë'ëmtëpën.

⁵ Ënet ja Ezequías ja tyuunpëtëjk ojts tninëjkxtë ja Jeséas,

⁶ Ets ja Jeséas tyuknipëjkëtë ets t'ënëëmëtëty ja yajkutujkpë: Jëtu'un yë Wintsën y'ënä'äny: Këtii xytsyë'ëkë yë Asiria yajkutujkpë tyuunpë ets ja aaw ayuk mëti'ipë të tkajpxtën tëkatsy ma ëjtsën.

⁷ Ëjts kë'ëm ntuknipëjktaakëjäämpy ets tu'uk ayuk nyija'tëtëty mëti'ipë nëjkx yajwinpityën ma nyaax kyajpnën ets ja'ay jam yaj'ookëtëty.

⁸ Ko ja Asiria ja'ay, mëti'ipë ja tsiptuunpëtëjk nyiwintsën'ajtypyën tnija'awëy ko ja yajkutujkpë tëë ënety tsyoony jam Laquis. Ënet jam Jerusalén tsyo'ony, jam ojts tpaaty ja Asiria yajkutujkpë Libná, Libná ja'ay ënety jam mëët tsyiptuny.

⁹ Ja Asiria yajkutujkpë ojts nijawë ko ja Tirhacá yajkutujkpë mëti'ipë Etiopíë ënä'ämpën, tëë ënety tuknipëjktaakë ko mëët ja tsyiptuunpëtëjk nyipëtë'ëka'anyë. Ënet jatëkok tkäjpxynyikejxy ja Ezequías yajkutujkpë mëti'ipë Judá ënä'ämpën ets t'ënëmaay:

¹⁰ Yë Dios, mëti'ipë mtuk'ijxpejtypyën, jëtu'un m'ënë'ëmxëty ko Jerusalén kajpn ka'ap wi'ix ntuna'anyës. Këtii mnätyukwin'ëënëtëty.

¹¹ Mijts wa'ats xynyijawë wi'ix yë Asiria ja'ayëty të tuntën ja naax kajpn mëti'ipëjaty të tnitëkëtën. ¿Ets ënät mijts mtsokpëtyë?

¹² ¿Tiosëm jëtää jääjë ko ojts n'ap n'okës tyajkutëkoytyë yë Gozán kajpn, Harán kajpn, Résef kajpn ets ja Bet-edén ja'ayëty mëti'ipë ijty jam tsënaaytyëpën Telasar?

¹³ ¿Maa tyam ja yajkutujkpëtëjk mëti'ipë ijty jam ënä'ämtëpën Hamat, Arpad, Sefarvaim, Hená ets Ivá?

¹⁴ Ojts ja Ezequías ja noky t'ëxajë mëti'ipë myëmiintën ja Asiria yajkutujkpë ja tyuunpëtëjk ets ojts tkäjpxy. Ok ja noky, jap ojts tmënëjkxy tsajptëkoty ets tukwinkukajpxëy ja Wintsën,

¹⁵ ets jyiiytyäky nyu'kxtäky, y'ënäny:

¹⁶ Wintsën, mëti'ipë maaytyääyëpën winë, ja Israel ja'ayëty ja Tyiosëty mëti'ipë jam ja y'ënyääytyakn myëët'ajtypyën itkujky ma ja Dios kukexyëtyën, mijts tu'ukyë mTios'ajtp ma nitëkokyë yajkutujkpën naaxwiiny naaxkëjxy. Mijts të xyajkojy yë tsajp ets naaxwiinyëtë.

¹⁷ Wintsën, tun mëyajtën, mëtoow'it ya'atë aaw ayuk, ja'akyukë mëti'ipës yam nikajpxäämpyën. Yaj'ëwa'ats yë mwiin ets xy'ixëty. Mëtoow'it wi'ix ja Senaquerib mnikäjpxy mnimëtyä'äkyën, tsaatsy ma'at ja aaw ayuk të mtuknipëtsëmyë, mijts Dios mëti'ipë juukyën.

¹⁸ Wintsën, mëtëy yë'ë ko Asiria ja'ayëty tëë ja naax kajpn tyaj'akëkooytya'atë tëkokyë mëët y'itjot nyaaxjot,

¹⁹ ets ko tëë tnino'ktaayëtë tsyaamëxanëty, y'awinaxëty, mëti'ipë ënety tyijtëpën tios, jä'ä ko ka'ap tyiosëty; naaxpotsy, tsaa ets kepy të y'itë mëti'ipë naaxwiinyëtë ja'ay kë'ëm të tyaj'oyën. Paatykyëjxm të tjantyyajkutëkoytyë.

²⁰ E tyam, yajtsoktëk ëëtsëty ma yë'ëjëtyën, Wintsën, mëti'ipës nTios'ajtëpën ets tëkokyë ja naax kajpn nijawëtëty ko mijts tu'ukyë mWintsën'ajtp ets mTios'ajtp.

²¹ Ënet ja Jeséas tkäjpxynyikejxy yë Ezequías: Jëtu'un yë Wintsën y'ënä'äny, mëti'ipë Tios'ajtpën ma Israel ja'ayëtyën: Tëës nmëtoy mëti'ipës të xy'amëtoy të xypyëjktsoyën ntunëtyës ma Senaquerib yajkutujkpën, mëti'ipë yajkutujkpën jam ma Asiria ja'ayëtyën.

²² Ya'atë jëtu'un aaw'ajtp ayuk'ajtp ma ojts ja Wintsën tnikäjpxy nimëtyä'äkyën wi'ix ja Asiria yajkutujkpë jyata'any kyëpäta'anyën: Yë Sión kajpn, jëtu'un yë'ë tä tu'uk yë to'oxy ëna'kën, je'eyë mtukxi'ikyë mijts Senaquerib. Je'eyë kyëpajk tyajyu'kxy tä jeexyë wyinma'any tyajjëtityën ko mijts mtso'onë ma jam të mjaja'tyën.

²³ ¿Pën xyjyëjp'ixy të xynyëxi'iky të xytyukxi'iky? ¿Pën xyjyëjp'ixy wyintsë'kën të xyajtëkooyë ets mëj këjxm mnäyajnaxyë ma yë'ëjën? Yë'ë Dios, Wa'atspë yajpaatyën ma Israel kajpnën.

²⁴ Je'eyë mtuunpë të xytyuk'ëne'emy ets të tnëxi'ik të tukxi'iktë yë Wintsën. Jëtu'un ojts m'ëna'any: Ëjts may kepy wintëkäämpë nmëët'atyës, jampaat muum kopkëjxm nja'tyës, jampaatës të nja'ty ma Líbano kyopk kupi'tykyën. Etsës të npujxë'ktaayë ja y'ajë kepy mëjëtypë ets tsiin kepy oyëtypë. Tëës ntukjëtijtëtyääyë tyun kyopk mëjëtypë ets yukjot kepyjyot mëti'ipë jëtu'un këxë'kpën pëjykyamën.

²⁵ Tëës muum wiink it wiink naax nyaj'oyë nëëjut ets nëë të n'uukyës koos të ntëëtsë, tëëjës yë nëë nyajtë'ëtsy jap Egiptë jëtu'un tääjës jeexyë je'eyë njä'äxëtityën.

²⁶ ¿E mijts ka'ap të xynyijawë ko ëjts Wintsënajtp, ëjts winë ntuknipëjktakëp ko tii tyunyë jyätyë? Ëjts tëëyëpës jëtu'un ntuknipëjktaakë ijxtëm tyam winë tyunyë jyätyën; paatykyëjxm mijts may ja naax kajpn të xyajkutëkoy ets je'eyë xit ko'ow të xytyuunta'ay.

²⁷ Yë ja'ay mëti'ipë jam tsënaaytyëpën ka'ap tii të myäyëtë, je'eyë të tsyë'ëkëtë ets të tsyëtyuntë, aayën ujtsën të yajpaatë, mëëy u'unkën, ujts u'unkën; jëtu'un tä ujts yonyën tëjkkëjxy ets ko y'aantä'äky, tëë nyaxo'tsnë.

²⁸ Wa'atsës nijawë tiijaty mtuunpyën ets tiijaty mtuknipëjktakëpën; wa'atsës nijawë koos mijts të xytyukjoot'anpëky.

²⁹ Tëës nijawë ja mjoot'an ets mmëj'ajt mkëjxm'ajtën, jëtu'un yam npëjkta'aka'anyës mjëjp tunkëjxm tä jeexyë pujxn jam nkëxjëëpyënës, tä jeexyë pujxn ntuk'atijën ets yë'ë ntukwo'onwinpita'anyë ma të mtsoonyën.

³⁰ Ënet ja Jeséas t'ënëmaay ja Ezequías: Ya'atë mtuk'ixëp ets xynyijawëty mëti'ipë tunan jatanëpën: Ya'atë jëmëjt yë'ë mkaytyëp yë tsajpmok mëti'ipë kë'ëm yonaanp muxaanpën, e kom tëkëëk jëmëjt jyëkyejpy mni'iptëty ets xyajpëtë'ëktëty ja mpëjktä'äkyëty, ijxtëm ja aaytyëëm ujts tëëmën ets aaypyajk ujts pajkën mëti'ipë mjë'kxtëp mpëktëpën.

³¹ Ja Judá ja'ayëty mëti'ipë jaakwë'ëmtëpën, jëtu'un nëjkx yontë jyiitstë tä aay ujtsën. Nëjkxëp tyiktskä'äktë ets nëjkxëp tyëëmpätë,

³² nëjkxëp jam wyë'ëmtë Jerusalén, jam ma Sión kopkën jam'atantëp ja mëti'ipë juuky wë'ëmantëpën. Ya'atë jëtu'un tyunäämpy ja tsyojkën jya'awën mëjpë këjääpë ja Wintsën mëti'ipë maaytyääyëpën winë.

³³ Yë Wintsën jëtu'un të tnikäjpxy: Yë Asiria yajkutujkpë Ka'ap tyëkëja'any jam Jerusalén, ets nitu'uk yë tyi'pxn tkatukti'pxa'any, ka'ap tyajtuna'any ja mëti'ipë nätyuk'akëëytyujkëpën ets ni tka'oytyuna'any ja ye'eypyäjn jam Jerusalén ma jeexyë tnitëkëtën ja naax kajpn.

³⁴ Ja në'ë tu'u mëti'ipë të tpaminyën, jä'ä jatëkok y'awinpitëjäämpy; ka'ap tyëkëja'any ma tääpë naax kajpnën. Ëjts mëti'ipë Wintsën'ajtpën, ëjts ënaanp.

³⁵ Nkuwa'anäämpyës ets nyajtso'okäänpyës ya'atë naax kajpn mëët koos njot'aty ja ntuunpës David ets mëët koos mëj näjyëkyepyë.

³⁶ Ënet ja Wintsën ja kyukäjpxy ojts tsyoony ets ojts nyijkxy jam ma ja Asiria ja'ayëtyën, tääts tyaj'o'ky nimëko'px ja majkta'px mëkoxk mil ja Asiria ja'ay. Komjëpom aak ooky ojts kyuxëënyëtë.

³⁷ Ënätyë ja yajkutujkpë Senaquerib y'ënäny ets tsyo'onta'atëty ja tsiptuunpëtëjk ets nyëjkxtëty jatëkok Nínive.

³⁸ Jam ënety kyajpxtä'äky ja Senaquerib ma ja tsyajptëjkën jam Nisroc, mëti'ipë y'ëwtajtypyën, ko jam tyukmiinë nimäjtsk yë myaank, tu'uk jä'ä xyëëwajtyp Adramélec ets tu'uk Sarézer, jä'ä yaj'o'këtë. Ko yaj'o'ktaayë, tääts ojts kyakojnëtë jam Arafat. Yë'ë ojts kyutëkëty ma ja kutujktaknën yë myaank Esarhadón.