Isaías 35 - Biblia Dc en Mixe de Quetzaltepec

Ma ja naax kajpn jatëkok wyimpityën jam Sión.

¹ Wä'än txoontä'äky ja itjot, të'ëts it të'ëts naaxpë; wä'än tjam'aty ja xoontakën, ja jotkujk'ajtën ets yaj'ixëty pëjyjyotypë ujtsjotypë,

² wä'än jam tyony yë pëjy, lirië pëjy, wä'än tuktuky mëët yë xoontakën ets jotkujk'ajtën. Yë Wintsën oy tsuj tyaj'awinpita'any tä ja Líbano kopkën, jë'kxynyaaxjot tä ja Carmel kopk ets Sarón joyën. Ni'ëmukë nëjkx t'ijxtë ja Wintsën ja myëj'ajt y'oyajtën, mëti'ipë ja Wintsën yajmëjnajxëpën.

³ Yajjotmëkpëktë ja pa'amja'ay, mëjaawmo'otë ja tëëpë y'ënu'kxëtën,

⁴ ënëëmëtë ja mëti'ipë xëmë tsëyuuypyën: Jotmëk it, këtii mtsë'ëkë. Tyaa ja mTiosëty mëti'ipë myajtso'okanëtëpën, mëti'ipë tyiytyunäämpyën ja mëtsiptëjk ijxtëm pyaat'atyën.

⁵ Ënet nëjkx y'ijxë'ëktë ja wiintstëjkëty ets myëtoowë'ëktë ja ja'ay mëti'ipë natëtyën

⁶ Ja tekymya'at këjxmëty nëjkx pyujtë'ëktë ets ja uumtëjk nëkooyë nëjkx yaxnëtë jyojknëtë. Jam të'ëts'itjotm të'ëts naaxjotm jam'ataanp ja nëë, xii yaa muum ja nëë myuuta'any.

⁷ Nëëjot y'awinpita'any ma ka'ap ja nëëjën, mo'ontsjot jyata'any ma ënety xëmë të tsyë'ëts'ityën. Ma ënety ja wax ets ja tsa'any të y'itën, tsajpkäpnyjot ets ja nëëwäkjot y'awinpita'any.

⁸ Jam ja Wintsën tu'uk ja mëjtu'u tyajnaxa'any mëti'ipë yajtijaanpën, Kënu'kxytyu'u. Mëti'ipë ënety ka'ap wya'ats'atën ka'ap nëjkx jam tyëkëtë, yë tsuuja'aytyëjk ka'ap nëjkx jam nyaxtë, yi'iyë nëjkx jam nyaxtë mëti'ipë mëtëy juuky'ajtëpën.

⁹ Ka'ap jyam'ata'any yë kaa, nitii jëyujk jam kyayajpaata'any mëti'ipë kutsë'ëkën. Jam nyaxa'antë mëti'ipë ënety ja ëwaatsë'ajtën të tpaatën.

¹⁰ Ja ja'ayëty mëti'ipë ënety ja Wintsën të yajtso'okëtën ëëp yaxp jam jya'ta'antë Sión, ets xoontä'äky yajpaata'antë winë xëëw winë jëmëjt. Pyaatantëp ja jotkujk'ajtën ets ja xoontakën ets ja jë'ëyën yaxën nëjkxëp y'atëkoy.