Isaías 32 - Biblia Dc en Mixe de Quetzaltepec

Ja ënä'ämtakn ma y'ita'anyën ja mëtëypyë ja nänyipaye'eyë

¹ Ma y'ita'anyën ja mëtëypyë ja nänyipaye'eyën, tu'uk ja yajkutujkpë jam yajpaata'any mëti'ipë oy nipaye'eyaanpën ets aakjëtu'un ja ënä'ämpëtëjk y'ita'antë mëti'ipë jam tunantëpën.

² Nitu'ukjaty jëtu'un të yajpëjkta'aktë tä tu'uk tsoktaknën, oy mëkpoj myinëty, oy mëk tuu myinëty; jëtu'un nëjkx nyaxtë tä yë nëë ntuk'yajxo'kmëtyën aay ujts, tä muum të'ëts'itum nyinikën yë mëjtsaa.

³ Yajxon nëjkx winë t'ixtë tuntë, ets ja amay jotmay mëti'ipë ja ja'ay myëët'ajtëpën nëjkxëp tmëtoow'itë.

⁴ Jëyëjp nëjkx winë tmëmay tmëtajtë, täänëm winë tuntëty. Ja aaw ayuk mëti'ipë ënety kyajpxtëpën, nëjkxëp oy yajja'akyukë.

⁵ Ka'ap nëjkx oyjyä'äy yajtijy mëti'ipë winma'anytyukën ets ka'ap nëjkx yaj'oyjyawë mëti'ipë tsëtyu'untëkën.

⁶ Jä'ä ko yë ëxëëk ja'ay ëxëëkëty kyäjpxy myëtyä'äky ets aak ëxëëkjaty tii tnimay tnitajë; yajja'ay ookaanp je'eyë ets wiinkjaty tnimëtyä'äky ja Wintsën; ja mëti'ipë ja yuu'o'këpën ka'ap tkääky mye'ey; mëti'ipë tëtsëpën, ka'ap tyajnëë'uuky.

⁷ Ja ja'ay mëti'ipë ka'ap ja jyot wyinma'any y'oyëtyën, ma'atjaty ja aaw ayuk tkäjpxy; yi'iyë myëmääpy myëtäjpy ka'apë y'oyëtyën; y'ëxëëk tuumpy ja ëyoopëja'ay ko wyin'ëëny ets y'ëxëëk tuumpy näjyëtu'un ja mëti'ipë tii yajmëyäjtypyën.

⁸ E ja'ay mëti'ipë oy ja jyot wyinma'anyën, myëmääpy myëtäjpy ja oypyë ets jä'ä tyuunpy.

Ma yajnimëtya'aktën ja to'oxytyëjk mëti'ipë ka'ap tii nijënu'un tmëmay tmëtajtën

⁹ E miitsëty to'oxytyëjktëjkëty mëti'ipë ka'ap tii xymyëmay xymyëtajtën, mëtoow'itë mëti'ipë yam ntuk'ënëëmëjantëpën. Miitsëty to'oxytyëjktëjkëty mëti'ipë yi'iyë wit meeny mtuk'ijxpäjtëpën, ja'akyukëtë ya'atë aaw ayuk.

¹⁰ Tyam akujk jotkujk mnäyjyawëtë myajpaatë, ko jyajëmëjt'atëty o'ktëy ënety jää mjatë mkëpätë, jä'ä ko itaanp ja yuu xëëw ets ka'ap jyää'ata'any ja tsatym.

¹¹ Mëti'ipë tyam ka'ap tii xymyëmay xymyëtajtën, je'eyë nëjkx mtsëyuytyë; miitsëty mëti'ipë tyam akujk jotkujk mnäjya'awëtëpën, mëët'atë ja amay jotmay, ijxpëktë ja mjemywyitëty, yë'ë këëtspë tuktëkëtë mëti'ipë kuumpën u'kxpën, mmontë tuktë jë'ëtë ya'axtë.

¹² Yaj'ixëtë ko miitsëty mpëjkëtëp m'ijxëtëp jam ma mkam mtu'ujëtyën ets ma ja m'tsatym kamëtyën.

¹³ Äpny ets aay ujts jam yonaanp maas yë nkajpnën ma tu'kë'ëyë ja jëën tëjkën mëti'ipë yi'iyë tsojkën'atë ja äjtsën pujtën.

¹⁴ Ja këmoontëjk tukwa'ats wyë'ëmta'aja'any; ja naax kajpn yajtuk'ye'eytyuta'ajaanp; ja itjot ma ja këwent'ajtpë y'itën ni pën jam kyapaata'any nijëna'a, yi'iyë nëjkx jam jyaak yajpaatë ëxëëkjëyujk, jëyujk, jëyujk tsajpkaa nëjkx jam jyaak jë'kxy jyaak pëktë.

¹⁵ E ja Wintsën ja myëk'ajtën, mëti'ipë winë yajkojpyën minaanp jatëkok ma ëëtsajtëmën ets nëjkx ja itjot aanë'ëk tëëtsë'ëkpë y'awinpity jë'kxy naaxjot ets nëjkxëp jam winë y'ity wyintëy.

¹⁶ Ja tëyajtën ets ja oypyë ja nänyipaye'eyën jä'ä nëjkx y'ëne'emy oymyaakajpnëty.

¹⁷ Ja oypyë ja nänyipaye'eyën nëjkxëp tyajjää'aty ja jotkujk'ajtën, xeemyajtën ets oyajtën xëmëkyëjxmëpë.

¹⁸ Jam nëjkx ja nnaax nkajpnës jyuuky'äty ma ja naax kajpnën akujkpë jotkujkpë, jam nëjkx jyuuky'äty oy tsuj ets katii kyajjotmaytyunëtëty ma jyëën tyëjkën,

¹⁹ oy ënety muum ja ja'ay tëë ja tun kopk twinpujxtutaaynyëtë ets aanë'ëk tëëtsë'ëk ja naax kajpn yajpatnë.

²⁰ Miitsëty jotkujk nëjkx mjuuky'atë, ma ja mkam mtu'ujëtyën, jam'ataanp ja mëj komnëë mëti'ipë ja m'aay mkepy mtukyajxooktëpën ets ja mjëyujk mtsajpkaajëty ka'ap nëjkx tyaj'ëmaaytya'aktë ja y'ääy y'ujts mëti'ipë y'oktëp wyëtstëpën.