Isaías 31 - Biblia Dc en Mixe de Quetzaltepec

Mëti'ipë jap Egiptë y'amëtoowtëpën ja näypyutëkë

¹ Ëxëëk ja naax kajpn jyata'an kyëpäta'antë mëti'ipë ja näypyutëkë y'amëtoowtëpën jap Egiptë, mëti'ipë tyuk'ijxpäjtëpën ja kwaay, mëti'ipë tyukjotkujk'ajtëpën ko may tmëëtëty ja kepy wintëkäämpë, ets ka'ap t'ijxpaatë ja Wintsën Wa'atspë mëti'ipë ja Israel ja'ay y'ëwtajtëpën ets ka'ap yë'ë t'amëtowtë ja näypyutëkë.

² E yë'ë nän tyukjajtyp wi'ix ja ëyo'on jotmay tpëjkta'akëtyën, ko tii tnikäjpxy ka'ap ok y'ayuk tukxi'iky. Yë'ë ëxëëk tyajjata'any tyajkëpäta'any ja mëti'ipë tuuntëkoopy kajpxtëkoopyën ets mëti'ipë ëxëëk ëtëtsp ënaanpën.

³ Yë Egiptë ja'ayëty, ja'ay yë näjyëtu'unëty, ets ka'ap tyios'atë; yë këwaayëty, jëyujk yë'ëjëty ets ka'ap pyoj'atë. Yë Wintsën nipëtë'ëkanëtëp yë'ëjëty ets tyiytyuna'anëtë, tu'ukyë ëxëëk jyata'an kyëpäta'antë, jëtu'un ja mëti'ipë kuwaanpën ets mëti'ipë yajkuwaanpën.

⁴ Jëtu'unës ja Wintsën të xy'ënëëmë: Jëtu'un tä tu'uk mëj kaajën mëti'ipë të tyaj'ookyën tu'uk yë kupixyny, oy jënu'un ja ja'ay jyamuktëty ets jya'ëtsë'ëkëja'anëtëty, yë'ë ka'ap tsyë'ëkë; nän timjëtu'un ja Wintsën mëti'ipë maaytyääyëpën winë, ko ënety myiny ets tniwaantu'uty ja nyaax kyajpn mëti'ipë jam tsënaaytyëpën ma Sión kopkën.

⁵ Jëtu'un tä tu'uk yë joontaak tnike'eky tkuke'ekyën yë y'u'unk ko tii jëyujk myatsa'anyë, jëtu'un ja Wintsën mëti'ipë maaytyääyëpën winë tkuwa'ana'any yë Jerusalén kajpn, kyuwa'anäämpy, yajtso'okäämpy, nyiwaantu'utäämpy, ets ëwaatsëtuuy tpëjkta'aka'any.

⁶ U'unk maayëty, miitsëty Israel ja'ayëty, jootwinpitë jatëkok ma Tiosën mëti'ipë të xyajjoot'anpëktën.

⁷ Jä'ä ko jä'ä xëëw ma ënety miitsëty ka'ap xy'ëktsojknëtën ja m'awinaxëty mëti'ipë oytyunyën mëët yë pu'ts pujxn ets poop pujxn, mëti'ipë kë'ëm myajkojtën mëët ja mkë'ë m'aawëty mëti'ipë të tyuuntëkoyën.

⁸ Jää nëjkx ja Asiria ja'ay yajkupujxta'atë, je'eyëp ko ka'ap nyaaxwiinyëtë ja'ayëty jëtu'un tyuna'anëtë. Ja tsip yë'ë yajkä'äkäämpy ja ja'ay ets ja ëna'ktëjk mëti'ipë tsiptuuntëpën mëtuunpë y'awinpita'antë;

⁹ Mëët ja tsë'ëkë jawë jëtu'unyë nëjkx kyäknë pyujtnë ja yajkutujkpë, ja mëti'ipë ënety kuwanëtëpën nëjkxëp ja y'ak tnajtsjëpijpëtya'atë. Ja Wintsën jëtu'un ënaanp, ko tam Jerusalén yajpaaty jëjp'ixy ja o'ktakn ma nyitoya'antën ja myëtsiptëjk.