Isaías 30 - Biblia Dc en Mixe de Quetzaltepec

Wiink yaj'ixy mëti'ipë ja näypyutëkë y'amëtoopyën jap Egiptë

¹ Jëtu'un ja Wintsën y'ënä'äny: Janty mon janty tuk yajpaatë ja u'unk ëna'k mëti'ipë ka'ap jyä'äkyukëtën, mëti'ipë winë tyuknipëjktakëtyëpën ets ka'apës xyajtëwtë, mëti'ipë tii tyuuntëpën ets ka'apës y'ëjtsëty nwinma'anymyo'otë, jëtu'un ni'ikyë ja pyoky tyajmayëtë.

² Jap pëyi'ikyë nyëjkxtë Egiptë, ëjts ka'apës pën tii xyajtëy; ja yajkutujkpë faraón jä'ä tyukjotkujk'ajtëp, jap Egiptë kyäktso'oktë.

³ Je'eyëp ko ja Egiptë yajkutujkpë ka'ap nëjkx oy kyëwent'atëtë, ja tsoktakn mëti'ipë ënety të tjapaatën jap Egiptë, je'eyë nëjkx o'ktëy tmëjatë.

⁴ Oy nëjkx ja mja'ay xyakäxtë jam Soan ets jam Hanés ets ja naax kajpn ja y'aaw y'ayuk tjamënëjkxëty,

⁵ je'eyë nëjkx o'ktëy tmëjatë tääpë naax kajpn, ka'ap nëjkx nitiiputëjkën ets nitii jotkëtakën myo'ojëtë; je'eyë nëjkx yajmon yajtukëtë ets yaj'ëyo'onpaatëtë.

⁶ Ma yaj'akäjpxyën wi'ix jyata'antën ja jëyujkëty jam Négueb: Ma ja it naaxwiinyëtën kutsë'ëkëpë, ma tsyëënëtën ja kaa ets myu'utë nyiitstë, ma tsyëënëtën ja tsa'any ets jëyujk mëjatypë mëti'ipë kääkëtijtëpën, ja krukts ets ja kwaay tyukmëjnëjkxtëp jap Egiptë ja wyit myeenyëty, ma ja kajpnën ka'apë tii tkëjxmëtyën.

⁷ Ka'ap tii myäyë, ka'ap tukjaty wi'ix pyutëkëtëtyën, paatyës të nxëëwmo'oy: Mëj jëyujk mëti'ipë je'eyë ni'tspën ets ka'ap tii tuny.

⁸ Min ets xykyëxja'ajëty kepykyijxy, jëtu'un jam xykyëxja'ajëty tä ja'ay muum tii tkëxtsa'ayën yë'ë ijxpäjn wa'anëp xëmëkyëjxm.

⁹ Ya'atë naax kajpn je'eyë kyäjpxykyutëjy, ka'ap wyintsë'ëkë, ka'ap nijënu'un tmëtowa'any ja Wintsën ja y'ijxpëjkën.

¹⁰ Jëtu'un ja käjpxynyajxpë t'ënëëmëtë: Këtii nëkoo tii xy'ijxpëtsëmtëty, këtii nëkoo ja tëyajtën xytyukmëmëtya'aktëtyës. Yu'unk naxymës xymyëkajpxtëty; këtiis xypyëjkëtëty ja mëti'ipës nmaaytyëp ntajtëpën.

¹¹ Ixmatstë ja në'ë tu'u, jëjpwa'ktu'utë ja najxtakn, tim jëpëktë ja Wa'atspë Kënu'kxypyë ma Israel kajpnën.

¹² Paaty ja Dios Wa'atspë mëti'ipë jam ma Israel kajpnën, y'ënä'äny: Miitsëty wiink xyjyawëtë ko tii mjyajtuk'ëwaanëtë, yi'iyë tsip käjpxy mtuk'ijxpäjtëp ets ja ëxëëk tuunk ëxëëk käjpxy, jam mnäkyëxwa'anëtë,

¹³ paaty miitsëty mmëët'ajtëp ja poky. Jëtu'un miitsëty tä tu'uk potsyën mëti'ipë të kyë'tstaaynyën, ma ënety ka'ap tii xymyäytyën xytyajtën jää kyëtawa'any;

¹⁴ jëtu'un nëjkx mjatë tä ja'ay tu'ts tukpu'ujën, mëti'ipë jëtu'unyë xijtëëpën ets tyëkooytyä'äy, nimaa tu'ts apu'uk kyawë'ëmy mëti'ipë jeexyë jëënpajk yajtukjä'äpë'kpën ëkë mëti'ipë jeexyë nëë jaakyajtukju'tpën.

¹⁵ Jëtu'un y'ënä'äny ja Wintsën, Wa'atspë yajpaatyën ma Israel ja'ayëtyën: Jootwinpitë ets mjotkujk'atëty; xeemy ets tu'uwitsy nëjkx mjuuky'atë, yë'ë mtukjotmëk'atëp. Je'eyëp ko miitsëty ka'ap oy ja jëtu'unpë xymyëtowtë,

¹⁶ je'eyë të m'ëna'antë: Nikë oy ntimkyäkmëty, kwaaykyijxy nkäkmëty. Oy, kä'äktë. Tëë m'ëna'antë: Yë'ë ntukäkmëp kepy wintëkäämpë mëti'ipë mëk pëyë'kpën. Je'eyëp ko ja mmëtsipëty mëk ni'ik pyëyë'ëktë poj'am nëjkx mnajtspaatëtë.

¹⁷ Tu'uk ja ja'ay nëjkx je'eyë y'ity mëti'ipë nitu'kmil yajkä'äkëpën, nimëkoxk ja ja'ay nëjkx y'itë mëti'ipë myajkäkta'ajëtëpën; koonëm niwäänë mwë'ëmtëty, jëtu'un tä tu'kpajk muum yë kepy të yajkuwopën tunkëjxm mëti'ipë ja'ay ijxpäjn wyäämpyën.

¹⁸ E yë Wintsën jëjp'ixy jam yajpaaty ets jatëkok mwinpitëty; yë'ë mëk mjatsokëtë, jä'ä ko yë Wintsën nipaye'epy yë mëtëy. Akujk jotkujk ja'ay yajpaatë mëti'ipë y'ëwxijtëpën yë Dios.

¹⁹ Mijts Sión kajpn, ma jam mtsëënën Jerusalén, ka'ap m'ëk jëëy m'ëk yaxnëty. Ja Wintsën myëët'atäämpy ja pa'ëyo'owën najts'ëyo'owën ko ënety tmëtoy mjë'ëy myä'äxy, je'eyë tmëtoowpaatëty ko ënety xy'amëtoy ja näypyutëkë, ënätyë mputëkëja'anyë.

²⁰ Oy ënety ëxëëk të m'ëkjaty të m'ëkkëpety, ets të mmony të mtuky, yë'ë ka'ap nijëna'a m'ëxmatsa'anyë ets ka'ap jëkäm nyäpyëjkta'aka'anyë; m'ixëp ko ënety jëtu'un tuny.

²¹ Ko ënety muum ajotkumonë mtu'utëkoyä'äny, pojën xymyëtowa'any tu'uk ayuk mjëxkë'ëy mëti'ipë nëjkx m'ënë'ëmxëtyën: Tyaatsow ja tu'u, yaatsow nëjkxtë.

²² Nëjkxëp xy'ëxëëk'ijxnë ja m'awinax, ja mtsaapotsy ets mkepy tsyetsy mëti'ipë ja ja'ay y'oytyuuntëpën mëët yë poop pujxn ets pu'ts pujxn. Ëxëëk nëjkx xy'ijxnë ets pu'uxmën putsta'akën nëjkx xyajnajxnë.

²³ Yë Wintsën mtuknikäxanëp ja nëë tuu ma ënety të mni'ipy të mkojyën, jam mkamwinm mtu'uwinm may jam xyajpëtë'ëkëty ja tsajpmok ets ja mjë'kxy mpëky. Jä'ä xëëw ja mtsajpkaa nëjkx jyë'kxtë pyëktë ku'uxyë.

²⁴ Yë'ëpaat ja mjëyujk mtsajpkaa nëjkx jyë'kxtë pyëktë ku'uxyë ets nëjkx xyajtuny akujk jotkujk ma mkam mtu'ujën.

²⁵ Ko ënety jyää'aty ja o'kën tëko'oyën ets kyutëkooytya'atë ja naax kajpn mëti'ipë mëkëtyën ets ta'tspëkyëtyën, Jää'ataanp ja nëë mëti'ipë nëjkx yaj'uukyën, jampaat tunkëjxm kopkëjxm ka'ap ja nëë y'ëmaaytya'aka'any.

²⁶ Ja Wintsën yajtsooypyatäämpy ja nyaax kyajpn ja tsyëtyut ets yajxon tpita'any. Ënet ja po'o jëtu'un tyë'kxa'any tä xëëwën ets ja xëëw mëk nëjkx jyäjy tä jeexyë niwëxtujk tyë'kxtën.

²⁷ Ëk'ixtë, yë Wintsën jëtu'un kë'ëm tyimminy tä ja'ayën mëti'ipë jëkäm tso'onpën; Ja jyoot'an yëkëm je'eyë wyinjojknë, ko kyäjpxy, aakjä'ä nyikäjpxyp ja o'kën tëko'oyën.

²⁸ Ko xyejy jëtu'un yajmëtoy nëëkomën; tä nëëkomën mëti'ipë yo'kntuuy ku'utpën. Yë'ë nyimiinp yë naax kajpn ets tyajnëjkxa'any ëyo'ontum tä ja'ay tsajpkaa tkepymyëtsumën mëti'ipë tyukyuupyën, Yë'ë nyimiinp ja naax kajpn ets tyaj'ëmona'any jëtu'un tä ja'ay yë jëyujk t'ajäänë'ëkyën ets twoowtëkoy.

²⁹ E miitsëty ni'ikyë nëjkx mxoonta'aktë, ni'ikyë nëjkx m'ëwtë mya'axtë jëtu'un tä ja'ay xyëëwtunyën tu'ktsu'um; jotkujk nëjkx yajpaatë mjot mwinma'anyëty ijxtëm ja'ay tkuuy'etsyën xuxpë wojpë ko nyijkxy jam kajpnjotm ma ja Wintsën ja tyun kyopkën, ma ja Israel ja'ayëty tmëët'atën ja tsoktakn.

³⁰ Yë Wintsën yajmëtowanëp ja y'aaw y'ayuk mëët ja mëj'ajtën kuttujkën ets tyaj'ixa'anyë ja myëk'ajtën, atsë'ëk ajawë winë tuna'any; yë'ë yajtunäämpy jëën, ënääw, tuu ets tëtsn tuu.

³¹ Ko ënety yajmëtoy ja Wintsën ja y'aaw y'ayuk ets ko ënety tyäky ja tëytyu'unën, jäänëm nëjkx ja Asiria tsyë'ëkëtë.

³² Ko ënety ja Wintsën tjëwojpë'ëky ja Asiria, nëjkxëp ja ja'ay y'ëwtë kyowtë. Yë Wintsën yë'ë nyipëtë'ëkäämpy ja Asiria kajpn ets mëët tsyiptuna'any.

³³ Tëëyëp yë Asiria ja'ayëty ets kyutujkpëtëjkëty ojts yajtuknipëjktaakëtë yë ëyoowtakn mëjpë ets këkpë, tu'uk ja o'ktakn ma nyitoytyëtyën mëët ja ja'axy kepy. Yë Wintsën wyimpiixëjäämpy yë jëënmëët ja azufre.