Isaías 3 - Biblia Dc en Mixe de Quetzaltepec

Ma ja Tios ja nëë poky tpaye'eyä'änyën

¹ Ja'aykyukëtë yajxon. Yë Wintsën jyëpëjkäämpy, ja ka'ayën ukën jam Judá ets jam Jerusalén, näjyëtu'un ja nëë tuu ets tëkokyë ja jë'kxy pëky.

² Yajkutëkoyäämpy ja jotmëkja'aytyëjk, ja tsiptuunpëtëjk, ja yajkutujkpëtëjk, ja käjpxynyajxpëtëjk, ja najtsja'apëtëjk, ja mëjja'aytyëjk,

³ ja winye'epyëtëjk, ja wintsëntëjk, ja najtskajpxëpëtëjk, ja xëëwmääpyëtëjk ets ja patooy panajxpë.

⁴ Ets tpëjkta'aka'any yë ëna'ktëjk ets yë'ë yajkutuktëty; pi'k ëna'k nëjkx y'ëne'emy.

⁵ Mëj këjää nëjkx jyää'aty ja amay jotmay ma ja naax kajpnën; xim yam ja ja'ay nyänyimatsa'anyë, ka'ap maa pën y'ëknämyëku'uk'ijxënëty.

⁶ Nëjkxëp tu'uk ja ja'ay ja y'uty t'ëk'ënëmaaynyë: Mijts jaaktam mwit mtujkxy, nikë oy mijts myajkutukëty ma ya'atë naax kajpnën taj xitpë yajpaatyën.

⁷ Tääts nëjkx tu'uk y'ëtsoy: Ëjts ka'apës xymyäyëty wi'ixës tääpë jotmay ntunëty etsës nyaj'oyëty. Maas yë ntëjkën ka'ap jam tii, tiijës nkayëp n'uukëp, paaty miitsëty nëkoopës ëjts xypyëjkta'aktëty kutuunk.

⁸ Mëtëy jëtu'un ko yë Jerusalén ja'ayëty o'ktëy tyam jyatë kyëpätë, ets Judá ja'ayëty taj xit yajpaatë mëëtkyëjxm ko të tmëtëkoytyë yë Dios ets ko të tyajjoot'anpëktë mëti'ipë ënä'ämp yajkutujkpën.

⁹ Ja y'ëxëëkjot y'ëxëëk winma'any yë'ë kë'ëm ëxaty nätyuktuunëtëp, jä'ä ko ja nyëë pyokyëty ka'ap tjëkyepy tkuyu'utstëty; timjëtu'un tä tëkok jyäjty kyëpejtyën yë Sodomë kajpn, ojts ja naax kajpn tuknija'awëtyä'äy wi'ix ënety tyëkoyën. Janty mon janty tuk yajpaatë, kë'ëm nyäyajkutëkoya'anëtë.

¹⁰ Ja ja'ay mëti'ipë mëtëy juukyajtpën jotkujk yajpaaty, oy winë wyinpëtsë'ëm jyëjpëtsë'ëmxëty ets yë'ë tyukjotkujk'ajtyp ko winë oy tuny.

¹¹ Janty mon janty tuk yajpaaty ja ëxëëk ja'ay, jä'ä ko ëxëëk jyata'any. Jëtu'un nëjkx ja Wintsën tyukumëtoyë tä ënety ja nyëë pyoky kyëjääjëtyën.

¹² Pi'k ëna'k yajkutujkp maas ja nnaax nkajpnën; to'oxytyëjk tyam ënä'ämtëp. Nnaax nkajpnës, mwin'ë'ënëtëp mëti'ipë mkutujkpë'ajtëpën, jam myajnëjkxëtë ma wiink tu'ujën.

¹³ Ja Wintsën tëë tuknipëjktaakë ets tpaye'eyä'äny ja mtëko'oyën, ets mmo'oja'anyë ja tëytyu'unën ijxtëm mpaatyën.

¹⁴ Yë Wintsën tyukwinmëtowäämpy ja mëjja'aytyëjk ets ja kopktëjk ja nyëë pyokyëty, ets t'ënëëmëja'any: Miits të xypyëjkëtë ja ëyoopëja'ay ja kyä'äyën y'ukën, tëë xymyäätstë ja mëti'ipë ënety ja y'u'unk y'ëna'k tyuk'ixäämpyën, ja mëti'ipë të xymyäätstën jam ma mtëjkën të xymyënëjkxta'atë.

¹⁵ Pën ja kuttujkën të mmo'ojëtë ets ja nnaax nkajpnës o'ktëy xytyuntëty ets ja ëyoopëja'ay xyjyaamtään xynyaaxtääntëty. Ëjts jëtu'un ënaanp, ëjts Wintsën, mëti'ipë maaytyääyëpën winë.

Ma ja ja'ay yajtëytyuntën jampë Jerusalén kyukajpn'atën

¹⁶ Näyjyëtu'un yë Wintsën y'ënä'äny: Ja to'oxytyëjkëty mëti'ipë jam Sión kukajpnajtëpën, ja amëj akëjxmëpë jyuuky'atën; ja në'ix pa'at'ijxpë jyä'äy'atën, ja wiinkonjatypë nyajtswa'akëtën ets mëti'ipë yaj'ënantëpën ja tyekytsyum,

¹⁷ yë'ëjës mëët ntëytyuna'any ja pa'am mëti'ipë yajkutë'kxëpën ets ja wyääy kya'ata'atëty ets niwa'ats ëxwa'ats wyë'ëmtëty.

¹⁸ Jä'ä xëëw yë Wintsën tjëpëka'any ja kë'ëk, ja wit,

¹⁹ yo'kjän, kë'ëjän,

²⁰ yo'kwits, tekyjän, kumä'tn, ja tsooy mëti'ipë nätyukja'axëtëpën,

²¹ kë'ëjiits, jëjpjiits,

²² wit tujkxy oyëtypë, niyä'äp, kumots, xuumy,

²³ ijxn, atëëytyuk mëti'ipë ja to'oxytyëjk nätyukwinkuwijtsëtëpën, yo'knwits ets tu'kë'ëyë jënu'un ja to'oxytyëjk tyajtuntën ko nyäy'oytyunëtë.

²⁴ Je'eyë nëjkx tyokxu'knëtë ijxtëm jeexyë pya'akxuuktën, tejpxy nëjkx yajtukyo'ktsumtë tä jeexyë pyo'owëën yajkëxpëktën, ni'ikyë nëjkx wyääy yajnëkä'pta'atë ijxtëm jeexyë yenyjyäty tmëët'atën; tä jeexyë oywyit tuktëkëtën, këëts wit nëjkx tyajtuntë, tä jeexyë yaj'oytyuntën, anpujxn nëjkx yajtuktsa'atë.

²⁵ Jam nëjkx ja mja'ay y'ooktë tsipjotm, ja mtsiptuunpëtëjk jam nëjkx y'ooktë ma ënety tsyiptuntën.

²⁶ Jë'ëjaanp ya'axaanp ja naax kajpn ets mon tuk yajpaata'any, nëjkxëp ja ja'ay tsyo'ontaaynyë ets tukwa'ats ja naax kajpn wyë'ëmëty.