Isaías 29 - Biblia Dc en Mixe de Quetzaltepec

Ariel ets ja myëtsiptëjk

¹ Janty mon janty tuk yajpaaty yë Ariel kajpn, ja kajpn ma ojts tëkok ja David pyo'kxyën. Ja kajpn ma ja xëëw, winjëmëjt tyunyën,

² jä'ä ko ntukpaatäämpyës yë amay jotmay yë Ariel kajpn, itaanp jam ja jë'ëyën yaxën. Ënätnëm nëjkx n'ixyës pën xyëëwajtypyën Ariel.

³ Ëjts nkäxäämpyës yë ntsiptuunpëtëjk ets myajnatukëtëty, n'oytyunäämpyës yë ijtakn pa'apa'a ma këwent'aty m'itëtyën, jamës nyaj'oyëjä'äny ja ënyääytyakn ma ja tsiptuumpëtëjk mnipëtë'ëkëtëtyën.

⁴ O'ktëy mjata'any mkëpäta'any, jëtu'un nëjkx mnaaxkukëtawë, ko mjaya'ax mjajokëty jëtu'un je'eyë yajmëtowa'any tä tii tyukwanën, jëtu'un tä jeexyë mëkxejyën.

^5-6 E ajotkumonë nëjkx yë mmëtsiptëjk o'ktëy jyajta'atë, ja Wintsën mëti'ipë maaytyääyëpën winë yë'ë nëjkx tëytyuny ja mmëtsip mëët ja poj ënääw, nëë tuu ets jëën. Nëjkxëp ja mëtsip naax wayën jyajta'atë, ets tä tu'uk pu'uxm wyimpapojyën, jëtu'un nëjkx kyëxë'knëtë.

⁷ Tëkokyë ja naax kajpn mëti'ipë mëët tsyiptuntën ja Ariel kajpn, mëti'ipë mëët të tnitëkëtën ja naax kajpn ta'tspëkyëtypë, mëti'ipë o'ktëy ja jyiiky myëku'uk të tuntën, jëtu'un nëjkx y'awinpitë tä ja'ay wyinkuma'ayën, ëkë tä ja'ay tii t'ijxma'atyën koots.

⁸ Jëtu'un tä tu'uk ja'ay yuu'ookyën ets wyinkuma'ay ko kyäy, ko wyijy je'eyëm ja myox'ak tukwa'ats; ëkë tä tu'uk ja'ay tyëëtsën ets wyinkuma'ay ko nyëë'uuky, ets ko myä'äywyijy nëkooyë y'aaw të tyëtsmujknë mëët ja tëëtsë. Jëtu'un jyata'antë ja naax kajpn mëti'ipë Sión kajpn nyipëtë'ktëpën.

⁹ Juuyky'atë jëtu'un mëët ja mtsuu winma'anyëty. Juuyky'atë jëtu'un wiints, ka'ap tii xy'ijxpaatëty. Juuyky'atë jëtu'un tä tu'uk amu'ukyë ja'ayën, oy ka'ap nitii mëkpë nëë xy'uuktë.

¹⁰ Yë Wintsën tëë mtuknikäxëtë tsuu ma'ay. Yë käjpxynyajxpëtëjk yë'ë ja'ay tyukjotkujk'ajtëp je'eyëp ko jëtu'un yë Wintsën të tyunëtë tä jeexyë wit të yajtukwinkuwitsëtën.

¹¹ Tu'kë'ëyë mëti'ipë jeexyë ja käjpxynyajxpë nyikäjpxypën, jëtu'un tä jeexyë muum këxja'ay y'ityën ets pëjkë'ëky ets ku'ëtsa'ay. E oy pën ja myëku'uk tja'ënëëmëty mëti'ipë nokykyajpxpën: Tyaa tyaapë noky ënät ëk kajpx, yë'ë je'eyë y'ëtsowa'any: Ka'ap tjëkyepy nkajpxëtyës, jä'ä ko ku'ëtsa'ay tääpë noky.

¹² E ko pën ja myëku'uk t'ënëëmëty mëti'ipë ka'ap tukjatyën nyoky kyajpxëty: tyaa tyaapë noky ënät ëk kajpx ënät y'ëtsowa'anyë: Ka'apës ntukjaty noky kyajpxëty.

¹³ Ëjts tëëjës yë Wintsën xy'ënëëmë: Ya'atë naax kajpn nëkoojës wiinkë'ëy akë'ëy xywyinkäjpxy xywyinmëtyä'äky yë jyot wyinma'any wiinktsow tyaj'ity, ets koos xytyukxoontä'äky, jëtu'un tä naaxwiinyëtë ja'ay kë'ëm të tuknipëjktaakën.

¹⁴ E paatykyëjxmës të ntuknipëjktaakë koos nyaj'ixa'anyë ja nmëj'ajtën etsës tääpë naax kajpn jëtu'unyë amonyë nyajwë'ëma'any. Ja wyijy'ajtën ets ja kyëpetyajtënëty ja wyijyjyä'äytyëjkëty, jëtu'unyë nëjkx tyëkooytyä'äy.

¹⁵ Janty mon janty tuk yajpaatë ja'ayëty mëti'ipë yu'tstëpën ja tyëko'oyënëty ma Wintsënën, mëti'ipë koots tuuntëkooytyëpën ets y'ëna'antë: Ka'ap pën xy'ijxëmë, ka'ap pën nijawë.

¹⁶ Wiinkjaty ja'ay winë tmëmay tmëtajtë. Jëtu'un tä jeexyë tyu'knaxëtyën yë naax mëët yë pojtspë. Tu'uk yë kepy ëkë tsaa ka'ap tjëkyepy y'ëna'anëty: mijts ka'apës oy të xyajkojy, ëkë tu'uk yë tu'ts ka'ap tjëkyepy y'ëna'anëty: mijts ka'apës oy të xypyotsy.

Ma yajnikäjpxyën ja Israel kajpn ko jatëkok ja ëwaatsëtuuy'ajtën tpaata'any.

¹⁷ Tsojk yukjotm y'awinpita'any, yuutakn tuuntakn; ets yuutakn tuuntakn, y'awinpita'any yukjot.

¹⁸ Jä'ä xëëw, nëjkxëp ja nat tmëtoy ko ënety tii yajkäjpxy nokykyijxy, ets ja wiints nëjkxëp y'ixë'ëky oy ënety jënu'un kyootsëty.

¹⁹ Ja ja'ayëty mëti'ipë yu'unk naxym yajpatëpën xoonta'akantëp jatëkok ma Wintsënën, mëti'ipë ëyoow jotëkooytyëpën jotkujk nyäjawëja'anëtë ma Tiosën mëti'ipë Israel ja'ayëty y'ëwtajtëpën.

²⁰ Kutëkoyantëp ja ëxëëkja'aytyëjk, ka'ap maa y'ëkyajpaatanëtë mëti'ipë ëxëëk ëtëtstëp ënantëpën, kutëkoyantëp näjyëtu'un ja ja'ayëty mëti'ipë myëmaay myëët'ajtëpën ja ëxëëktu'un ëxëëk kajpxën,

²¹ mëti'ipë wiink ja'ay tyuknipëjktëpën ko yajja'ay'ooktë, mëti'ipë myeenymyooytyëpën ja yajkutujkpë ets wa'ats ja'ay nyäyajnaxëtë ets yajtëytyuny ja mëti'ipë ka'ap tii poky tmëëtëtyën.

²² Paatykyëjxm ja Wintsën, mëti'ipë yë Israel ja'ay Tyios'ajtëpën, mëti'ipë yajtsokën ja Abraham, jëtu'un y'ënä'äny: Tyam ets jëtu'un tyu'uye'eyëty yë Jacob ka'ap y'ëktsëtyunanë ets ka'ap tsapts yë wyiin jyëjp y'ëkjajnëty.

²³ Ko ënety ja y'u'unk y'ok t'ixtë wi'ixës winë të ntunyën ma ja nyaax kyajpnëtyën, ënät nëjkx t'ijxpaatë ja nwa'ats'ajtënës ets nëjkxëpës xywyinkutsë'ëkëtë, maas ëjts nxëëwatyën Dios mëti'ipë Israel ja'ayëty kyënu'kxyjya'awëtëpën.

²⁴ Mëti'ipë ënety ka'ap tii oy tja'akyukëtën nëjkxëp wyijytya'aktë; ets mëti'ipë ënety ka'ap tii oy tmëpëktën, nëjkxëp y'ijxpëktë.