Isaías 28 - Biblia Dc en Mixe de Quetzaltepec

Ma ja Samaria yajtuk'ënëëmën ets tyaj'oyëty ja jyuukyajtën.

¹ Janty mon janty tuk yë Samaria kajpn yajpaaty, ja kajpn ma ja Efraín ja y'u'unk y'ok tsyëënëtën mëti'ipë ja amu'ukyëja'aytyëjk yajmëjnajxtëpën, mëti'ipë janty'oy näjya'awëyëpën ets jëtu'un ja jyuukyajtën tä pëjyën mëti'ipë të xyo'tsnën, jampë yajpaatyën naaxjotm ma winë y'ity wyintëyën. Janty mon janty tuk yajpaaty jä'ä ko yi'iyë yajmëjnajxyp ets amu'ukyë yajpaatëty.

² Yë Wintsën tam tu'uk ja'ay tyaj'ëwxity mëkpë, maayëp winë, mëti'ipë nëjkx jëtu'un kyëtä'äkyën tä tyëtsntu'uyën, tä myëk kyomtu'uyën mëti'ipë yajkutëkoopyën ja naax kajpn, tä mëktuupojën, tä mëj nëëkomën. Kë'ë'am nëjkx naaxkujëpipë.

³ Mëët ja tyeky tä'änëtita'any, mëti'ipë ënety amëj akëjxm yajpatpën, ma Efraín kajpnën mëti'ipë xëmë amu'ukyë yajpatpën.

⁴ Ets tääpë pëjy oypyë yaj'ixyën mëti'ipë të xyo'tsnë, mëti'ipë jam yajpatpën joyjotm ma winë y'ity wyintëyën, jëtu'un nëjkx jyäty tä tsatym tsya'amën mëti'ipë tsaamë'kpën: ko yaj'ijxpaaty tim nayajnëtujkp ets yajjë'kxy.

⁵ Jä'ä xëëw ja Wintsën mëti'ipë maaytyääyëpën winë, nëjkx jëtu'un nyäxy tä tu'uk yë yajkutujkpë kyujupën janty oypyë, tä tu'uk kumä'tnën mëti'ipë to'oxytyëjk wyääy tyukmajts'ijtëp mëti'ipë nëjkx ja naax kajpn tukmëjnaxtën mëti'ipë ënety të jyaakwë'ëmtën,

⁶ Yë'ë nëjkx twinma'anymyo'oy ja yajkutujkpëtëjk ets oy ja nipaye'eyën tuntëty, nëjkxëp tjotmëkmo'oy ja mëti'ipë tëjk këwent'ajtëpën ma ja naax kajpnën.

Ma ja Jerusalén ja'ayëty yajkajpxwijtën ets yajtukwinwanëtë ja oypyë

⁷ Näyjyëtu'un tää ja'ay mëti'ipë xëmë yuump këtaapën ko y'uuky myu'ukyë ets oy wi'ix jyäntynyijkxy ko ja nëë mëkpë t'uuky mëti'ipë mukpën. Yë teetytyëjkëty ets käjpxynyajxpëtëjkëty yë'ë jëtu'un yajnikajpxtëp, yuntë kyëtawtë ko ja mëknëë t'uuktë, wiinkjaty y'ënanëtë ko myukënëtë, je'eyë kyunëjkx kyukëta'awënëtë ko y'ijxma'atë. Näyjyëtu'un ko nëë poky nipaye'eytyë ëmu'ukyë jyëtijnëtë.

⁸ Jëtu'un yaj'ijxnë tëë yowë ëmu'ukyë ja'ay tni'ë'tsëtyääynyë ja kaaytyakn, kamaa wa'ats kyakëxë'ëky.

⁹ Xynyimëtyaktëpës ets y'ëna'antë: ¿Pën minaanp ets xyaj'ijxpëka'anëmë? ¿Pën minaanp ets xytyuknijawëja'anëmë mëti'ipë ja Dios të tnikäjpxyën?

¹⁰ ¿Ti jëtu'un xy'ijxëmë pi'k ëna'kënë, mëti'ipë je'eyë tsi'tsk y'ëxmajtsypnyëmë? ¿Mëti'ipë je'eyë kajpxë'kpnëmën?

¹¹ E kajts wyi'ixëty, pën ka'ap jyä'äkyukëtë, tsipëty yam yajmëmëtya'aka'antë, jä'ä yajtukmëkajpxantëp ja ayuk mëti'ipë ka'ap yajwinjawën. Jëtu'un ja Dios tmëkajpxa'any ya'atë ja naax kajpn.

¹² Jä'ä ko ojts tëëyëp yaj'ënëëmëtë: Tyaa ja jotkujk'ajtën, tyaa ja po'kxtakn; wä'än yaa tpo'kxtë mëti'ipë tëë y'ënu'kxëtën, E yë'ëjëty ka'ap ojts jyä'äkyukëtë.

¹³ Paatykyëjxm ja Wintsën jëtu'un myëkajpxa'anëtë tä pi'k ëna'k yajmëkäjpxyën, mëti'ipë nokykyapxtso'ontëpën. Ko ënety muum nyëjkxtë, jëtu'unyë yuntëty kyëtawtëty ets nyäyajtsëtyutëtëty, nyäyajkuka'anaxëtëty muum ets koonëm tsyiptëkëtëty.

¹⁴ Paatykyëjxm tyam myaj'ënëëmëtë miitsëty naax kajpnëty, mëtoow'itë ya'atë aaw ayuk, miitsëty yajkutujkpëtëjk ets mëti'ipë ënä'ämtëpën wintsën'ajtëpën.

¹⁵ Ëëtsëty ka'apës yë o'kën tëko'oyën ntsë'ëkëtë jä'ä ko tëëjës yë käjpxytyu'unën mëët ntuntë, paaty tyam oy jënu'un jyaminëty yë ëyo'on jotmay, nitiijës xykyajata'antë; tëëjës nijawëtë ko n'antakmëty jotkujk jam n'ijtmëty, ets ko nwin'ë'ënmëty, npatmëp ja tsoktakn.

¹⁶ Paaty ja Wintsën y'ënä'äny: Ëjts npëjkta'akäämpyës yam tu'uk yë tsaa jam Sión, tu'uk yë mëjtsaa, oytsyaa ets tsoowpaatypë, mëti'ipë mëj'äämpy itëpën, ets yë'ë potsy ëjx'atëp. Pën ënety tyukjotkujk'ajtypyën, nëjkxëp jam tpaaty ja po'kxtakn.

¹⁷ Tääpë potsy yë'ë nëjkx mëët yajtuk'ijxtë ja mëtëypyë ja nipaye'eyën. Ja tsoktakn mëti'ipë ënety të xyjya'ixta'atën mëët ja win'ë'ënën antakën yë'ë nëjkx yaj'atëkoyë ja tëtsn tuu, ets mëti'ipë ënety mnätyuk'apëjktujkëtëpën, jëtu'unyë nëjkx jam komnëë yajwinpajë'ëtyë.

¹⁸ Nëjkxëp y'atëkoy ja mkäjpxytyu'unën mëët ja o'kën, mëti'ipë ënety mëët ja o'kën të xykyäjpxy'atën, ka'ap nëjkx y'ëktsoowpatnë. Minaanp ja ëyo'on jotmay, o'ktëy nëjkx mjatë mkëpätë.

¹⁹ Ko myinëty tääts mpajëtuta'anëtë. Jopyëp myina'any, xëëny koots. Je'eyë xymyëtoowpaatëty ko tää myiny tääts ënätyë mtsë'ëkëja'antë.

²⁰ Jëtu'un nëjkx mjuuky'äty tä ja'ay ka'apë y'oymyä'äyën jä'ä ko ka'ap tii nyipä'än.

²¹ Jëtu'un nëjkx ja Wintsën winë tuny tä jam Perasim winë tuunyën, ets tä jam Gabaón joyjotmën, nëjkxëp ja myëj'ajtën tyaj'ixyë ka'apë nijëna'a yaj'ixynyëmën, ets tyajwintu'upëka'any mëti'ipë të tuknipëjktaakën.

²² Paaty myaj'ënëëmëtë këtii je'eyë xynyëxi'ik xytyukxi'iktëty, këtiipë mjotmay kyëjääjëtëty; jä'ä ko tëëjës nijawë ko yë Wintsën mëti'ipë maaytyääyëpën winë, yajkutëkooyäämpy tu'kë'ëyë naax kajpn.

²³ Ja'aykyukëtë ets mëtoow'itë mëti'ipës yam nikajpxäämpyën, yajxon ja'akyukëtë ja n'aaw n'ayukës.

²⁴ Ko tu'uk yë naaxtuunpë ja'ay nyipa'any, ka'ap xëmëkyëjxm tyimnaaxtajy ets ka'ap xëmëkyëjxm tyim yu'uy.

²⁵ Ko ja nyaax tëë yajxon t'oytyuunta'ay, yë'ë jëyëjp nyipy yë eneldo ëkë cominë, tääts tni'ipy ok yë tsajpmok, ëpëky tnitajë, e jam kampë'am tukpa'aniipë yë cebadë ets centeno.

²⁶ Yë Dios yë'ë tukni''ijxëyëp wi'ix tii tunëtyën:

²⁷ Jä'ä ko yë eneldo ka'ap yajwinteeny, ets cominë ka'ap tjëkyepy yajwintäänëty mëët yë kepy wintëkäämpë; yë eneldo, kepy mëët yajwinwopy; yë cominë mats mëët yajwinwopy.

²⁸ Yë tsajpmok yajwintä'änp yë'ë, ets ka'ap yaj'ëxmatsy, yë'ë mëët yë kepy wintëkäämpë yajwinteeny ets pyajk ëpëky yajpëjktä'äky ka'ap yajtä'änakë.

²⁹ Näyjyëtu'un të tuknipëjktaakë yë Wintsën mëti'ipë maaytyääyëpën winë. Yë'ë janty oyëty winë të tuknipëjktakëtyä'äy ets tyuunpy mëti'ipë të tuknipëjktaakën.