Isaías 22 - Biblia Dc en Mixe de Quetzaltepec

Ma yajnikäjpxyën wi'ix Jerusalén kajpn jyata'any kyëpäta'anyën

¹ Ma yaj'akäjpxyën wi'ix jyata'any kyëpäta'anyën ja mëj joyjyot ma yajwinkëma'ayën winë: ¿Tiitën tuunëp jajtëp, wi'ix ko ja'ay aak tëjkëjxy pyäjta'atë?

² Ma ja kajpnën, ma ja'ay y'akujk'at jyotkujk'atën, ma ja ja'ay y'ëyë'ëktën kyëyätën. Ja mja'ay mëti'ipë të y'ooktën ka'ap jyamëty të y'ooktë tsipjotm ets ka'ap jyä'äyëty të yo'kpuxëtë;

³ ja mwintsëntëjk mëti'ipë ja tsip ijty nyikopk'ajtëpën, ni'ikyë ojts kyäknëtë pyujnëtë; ko të kyä'äktë ni'ikyë të twinkukääkëtë ja myëtsipëty ets yajtsuum yajmajtstë. Ja mjotmëktëjk oy nëkooyë jyakäk jyapujtë je'eyëm ojts yajmatstë ets yajtsuumtë.

⁴ Paatyës të n'ëna'any: Jëwa'aktë, nikë minës je'eyë n'ëkyä'äxy; këtiipë pën y'ëna'anëty wä'änës nyaxmony, ets këtiipë pën y'ëna'anëty etsës njotkujkëty maas ja nnax nkajpn ja ëyo'on tpaatyën.

⁵ Jä'ä ko yë Wintsën mëti'ipë maaytyääyëpën winë, tëë tuknipëjktaakë ko tyajmina'any yë ëyo'on, ma y'ooka'an tyëkoya'antën yë ja'ayëty ets ma mon tuk ja xëëw po'o yajpaata'anyën jam mëj joyjyotm ma yajwinkëma'ayën winë. Tëë ja mëjpotsy tjitë mëti'ipë kajpn nyapots'ajtypyën, jampaat kopkëjxm yajmëtoownë ko ja'ay jyë'ëtë ya'axtë.

⁶ Yë Elám ja'ayëty jëjp'ixy jam yajpatnëtë ets tsyiptuna'antë; tëë ja kyepy wintëkäämpë ets ja kyëwaayëty tukwä'tspäjnëtë; yë Quir ja'ayëty tëë ja tkëëyë'ktaaynyëtë ja pujxn mëti'ipë nätyukuwanëtëpën.

⁷ Tëë ja mjoyjyot y'ujtsta'ay mëët ja kepy wintëkäämpë ets mëët ja mëtsip mëti'ipë kwaay tyuk'u'unyääytyëpën yë'ë jam najxtëp tëjkëtyëp mkajpnjotm.

⁸ Mëti'ipë ijty ja Judá ja'ayëty nätyukuwanëtëpën, tëë ja mya'ta'ay. Ënet ojts xyjyä'ämyätstë ko tam xymyëët'atë yë pujxn mëti'ipë yajmëtsiptuunpën jam yuukjotm,

⁹ ets xy'ijxpatë ko jam ma ja David ja kyajpnën ko tam ja patu'u jyätyë ets jam ojts xyu'utstë ja mnëëjëty;

¹⁰ ojts xy'ixtë mëti'ipë ënety oyëjaanpën ets ojts xyajta'tspëktën mëti'ipë ënety ta'tspëkaanpën.

¹¹ Poty itkujky ojts xypyotstë ja nëë apëjkën ma xyajnipäta'antën ja nëë, je'eyëp ko ka'ap ojts xynyijawëtë pën ënety jëtu'un tëëyëp të tuknipëjktaakë.

¹² Jä'ä xëëw yë Wintsën mëti'ipë maaytyääyëpën winë, m'ënëmaayëtë ets mjë'ëtëty mya'axtëty, ets mwaay xykyääptëty ets xytyuktëkëtëty ja wit mëti'ipë kuumpën u'kxpën.

¹³ Tyam xoontaktëp ja ja'ayëty ets äjtstëp pujtëp, janaam jatsojk tjantyaj'ooktë tsajpkaa ets kupixyny, kyäytyë jyë'kxtë ënät ets y'uuktë pyëktë.

¹⁴ Yë Wintsën mëti'ipë maaytyääyëpën winë, tëëjës xy'ënëëmë: Ëjts ka'apës tääpë ja'ayëty npokymyä'kxa'any; miits jëyëjp m'ookantëp ok yë'ëjëty. Jëtu'un y'ënä'äny ja Wintsën mëti'ipë maaytyääyëpën winë.

Wi'ix ja Wintsën tëytyuna'anyën ja ja'ay mëti'ipë ja akujktëjk kyëwent'ajtypyën

¹⁵ Jëtu'unës të xy'ënëëmë yë Wintsën mëti'ipë maaytyääyëpën winë: Nëjkx ix yë Sebná, mëti'ipë kyëwent'ajtypyën yë akujktëjk ets xy'ënëëmëty:

¹⁶ ¿Mijts tii jotmayën yaa mjatyimjëkyejpy, ëkë pën të nmo'oy kuttujkën ets xy'oytyunëty yaa yë m'o'kpë jut, ets xytyajëty ja m'o'kpë jut jam kopkëjxm, ets jam tsaakëjxm mnanyi''ixëtëty ma mnaaxtëkëtyën?

¹⁷ Jëkäm yë Wintsën mnajtsjëpipëja'anyë, jëtu'un tä tu'uk mëkja'ay t'ixjëpipyën yë myëku'uk. Amëjaaw matsa'anyë ets mwinxita'anyë, jëtu'un tä ja'ay wit twinxityën mëti'ipë pixk mëëtën.

¹⁸ Jëtu'un myajwinkëpipa'anyë tä ja'ay piikë tyajkëpipyën, jëkäm myajka'aja'anyë, ma naaxwiinyëtë jyëjpkëxyën. Jam nëjkx m'ooky ets jam nëjkx wya'ak'o'oyëtya'atë yë kepy wintëkäämpë mëti'ipë ijty ja mëj'ajt oyajtën mtukpatëpën, je'eyë nëjkx myajtsëtyuunë jam ma ja mwintsën ja kyëmoontëjkën.

¹⁹ Njëwowäämpy jam ma të myajpëjktä'äkyën, npëjkëjäämpy yë mtuunk.

²⁰ Jä'ä xëëw nmëkajpxa'anyës yë ntuunpës, yë Eliaquim, yë Hilquías yë myaank

²¹ ets ntukxoxa'anyës yë mwit, yë'ë nmo'ojäämpyës ja mwëën ets nëjkx nmo'oyës ja mkutujkën. Jëtu'un nëjkx nyäxy tä tu'uk teetyën jam ma Jerusalén ja'ayëtyën ets ma Judá ja'ayëtyën.

²² Ma kyejkyën nëjkx npëjktä'äkyës ja ëwatsn mëti'ipë nyi'ëwatsn'ajtypyën ja David ja tyëjk. Ni pën tkajëkyepy tyaj'ëwa'atsëty mëti'ipë yë'ë yaj'ëtujkpyën, ets ni pën tkajëkyepy tyaj'ëtukëty mëti'ipë yë'ë yaj'ëwatsypyën.

²³ Mëj'äämpy nëjkx y'ity ma jyëën tyëjkën. Ëjts të ntuknipëjktaakë ko yë'ë ta'tspëky xëmë yajpaatëty ma y'ityën, jëtu'un tä tu'uk yë pujxn kuwopy y'ityën.

²⁴ Jam nëjkx ja'ay may oyajtën tpaaty ma yë'ëjën.

²⁵ Wäänë y'ita'any tääts nëjkx kyuka'anaxy, ka'ap nëjkx mëj'äämpy y'ëk'ijnë, ets ka'ap nëjkx ja'ay jam tii t'ëkpatnë. Jëtu'un ja Wintsën të tnikäjpxy, mëti'ipë maaytyääyëpën winë.