Isaías 20 - Biblia Dc en Mixe de Quetzaltepec

Asiria yë'ë nëjkx tniwä'äky Egiptë ets Etiopíë

¹ Tëkok ojts tu'uk yë yajkutujkpë mëti'ipë xyëëwajtypyën Sargón, Asiria ja'ay, tkexy tu'uk yë tyuunpë jam Asdod, tääpë ja'ay ojts tnitëkë tu'uk yë kajpn ets ojts tniwä'äky ko myëtäky.

² Jä'ä jëmëjt ojts yë Wintsën tmëkäjpxy yë Jeséas, Amós yë myaank ets t'ënëmaay: Jän tääpë wit mëti'ipë kuumpën u'kxpën, jän näjyëtu'un yë mkë'ëk. Ënet yë Jeséas tjantyjyeeny yë wyit ets nyätyuktekyjyääntutë yë kyë'ëk.

³ Tä ja Wintsën y'ënäny: Yë ntuunpës Jeséas niwa'ats tekywya'ats të yajpaaty tëkëëk jëmëjt, jëtyu'uxp të y'ity, jä'ä ko ja Egiptë ets Etiopíë o'ktëy jyata'antë.

⁴ Näyjyëtu'un yë yajkutujkpë mëti'ipë Asiria ja'ayën myënëjkxäämpy tsumy matsy ja ëna'ktëjk Egiptë ja'ayëty ets Etiope ja'ayëty, wä'än tmëjëty tmutskëty niwa'ats tekywya'ats.

⁵ Ja ja'ayëty ko nëjkx jëtu'un t'ixtë je'eyë nëjkx tsyë'ëkëtë ets tsyëtyuntë, jä'ä ko jëtu'un ënety yë Etiopíë kajpn të tjawëtë tä tu'uk mëk kajpnën ets Egiptë kajpn mëti'ipë mëj'äämpy ijtpën.

⁶ Tääts nëjkx y'ëna'antë ja'ayëty mëti'ipë mejy winkon tsënaaytyëpën: Ix ja jyajnë ja kajpn mëti'ipës të ntuk'ijxpäjtëmën, mëti'ipë ënety xëmë nmëye'eyëmën ets xynyiwaantutmëty ma ja Asiria ja'ayëtyën. ¿Tyam wi'ix ënät nnäkyuwa'anëmëty ets nnäyajtsokëmëty?