Isaías 2 - Biblia Dc en Mixe de Quetzaltepec

Yë Wintsën yë'ë jëna'a yajkutukëp ets jyää'atëty ja jotkujk'ajtën

¹ Ya'atë ojts yë Jeséas t'akäjpxy mëti'ipë yajtuk'ijxën, yë'ë nyikäjpxyp wi'ix jyata'anyën yë Judá kajpn ets Jerusalén kajpn. Yë Jeséas, Amós yë myaank.

² Tsojk yajnijawëja'any jëna'a jotkujk yajpaata'anyën ja Sión kopk, ma ja Wintsën ja tsyajptëjk yajpaatyën. Jää nëjkx myintë may ja ja'ayëty.

³ May ja ja'ay myina'antë ets y'ëna'ana'antë: Mintë, tsojk mpa'tëjkëmë ma ja Wintsën ja tyun kyopkën, ma yajpaatyën yë Dios yë tsyajptëjk, mëti'ipë Jacob y'ëwtajtën ets xytyukni''ijxëmëty ja në'ë'aaw tu'u'aaw mëti'ipë mëpaat nye'eyëmën. Jä'ä ko jam Jerusalén tsyoona'any ja ënä'ämën, jam Sión tsyona'any ja ijxpëjkën.

⁴ Yë'ë nëjkx ja nëë poky tnipaye'ey maajaty ja naax kajpn yajpaatyën, yë'ë nëjkx tyaj'oyë ja jëën tsip ma ja naax kajpn tsyiptuntën. Ja tëypyujxn mëti'ipë tyuktsiptuuntëpën je'eyë nëjkx yajtukyu'uy, ja kyu'umënëty ujts nëjkx yajtuktsujkmuky; nimëti'ipë kajpn nëjkx ja myëku'uk tka'ëknipëtë'knë ka'ap nëjkx y'ëkkopkpëky'ajnë ja'ay tjatëty wi'ix tsyiptunëtyën.

⁵ Miitsëty Jacob yë y'u'unk y'ëna'k, mintë ets ni'ëmukë nye'eymyujk nnajxmujkmëty ma ja Wintsën ja nyëë'aaw tyu'u'aawën.

Ma ja Wintsën tpaye'eyën ja tëko'oyën

⁶ Tëë ja mnaax mkajpn xy'ixmajtsnë ma tsyëënëtën ja Jacob ja jyä'äy, jä'ä ko ujts yajpaaty mëët ja najtsja'apëtëjk ets ja tsuu mëkajpxpë poj mëkajpxpë, jëtu'un tä ja filistejë ja'ayëtyën ma mëët oy nyäyaj'itëtën ja jaaypyo'kxyjyä'äyëty.

⁷ Ujts ja naax kajpn yajpaaty mëët ja pu'ts pujxn, poop pujxn, may ja wit meeny tmëëtëty. Ujts yajpaaty mëët ja kwaay ets may kepy wintëkäämpë.

⁸ May näjyëtu'un tmëët'atë ja awinax, ets ënät twinkoxtänëtë mëti'ipë kë'ëm të tyajkojtën mëët ja kyë'ë y'aawëty.

⁹ Naxym të nyäpyëjkta'akëtë, ni'ik o'ktëy të nyäyajjatëtë. Paaty yam n'ënëëmë këtii xypyokymyä'kxëty.

¹⁰ Tsaajoty nëjkx muum kyukääkëtë; nëjkxëp yu'utsy me'ty jyaak kä'äktë ko ënety ja Wintsën ja tyiytyu'unën tyajnaxy.

¹¹ Ja mëti'ipë ënety amëj akëjxm të nyäjyawëtën, winta'ak naaxkow yajpaata'antë; mëti'ipë mëj'äämpy të y'itën je'eyë nëjkx yaj'atään yajtuktääntë. Yë'ënëm ja Wintsën nëjkx ja myëj'ajtën tyaj'ixyë,

¹² jä'ä xëëw ma ënety winë tunyën yë Wintsën mëti'ipë maaytyääyëpën winë, o'ktëy nëjkx jyatë kyëpätë mëti'ipë nämyëjja'aw näjyääntyja'awëtëpën, ets tëkokyë ja'ay mëti'ipë ënety mëj jaanty të nyäyajnaxëtën, pa'tkë'p nëjkx kyëtakta'atë,

¹³ tu'kë'ëyë ja'ayëty mëti'ipë jëtu'un näjya'awëtëpën tä Líbano kepy tyänëtën, tä Basán xojën.

¹⁴ Ja'ayëty mëti'ipë näjya'awëtëpën tun kopkën ets jëtu'unpë nyäyajnaxëtën tä tun kopkën ayenypë,

¹⁵ tu'kë'ëyë mëti'ipë jëtu'un näjya'awëtëpën mëjpotsyën, këjääpë,

¹⁶ mëti'ipë jëtu'un näjya'awëtëpën tä ja kepy nëëwinye'epyë jampë Tarsis, tä ja kepy nëëwinye'epyë oyjyätyëtypë.

¹⁷ Ja ja'ayëty mëti'ipë nämyëjja'aw näjyääntyja'awëtëpën ets mëti'ipë amëj akëjxm ja'ay'ajtëpën je'eyë nëjkx yaj'atään yajtuktääntë. Yi'iyë yë Wintsën yë myëj'ajtën nëjkx yaj'ixy jä'ä xëëw,

¹⁸ ets nëjkx tyajkutëkooytyä'äy ja awinax.

¹⁹ Ko ënety ja Wintsën tnipëtë'ëky ja naax kajpn ets jyää'aty ja tsë'ëkë jawë naaxwiiny naaxkëjxy, nëjkxëp ja ja'ay tsyaatëkëtë jyutëkëtë ets jap nyäyu'utsëtëty, këtiipë ja Wintsën y'ixëtëty ko ënety ja myëj'ajt y'oyajtën tyaj'ixyë.

²⁰ Ko ënety ja xëëw jëmëjt tpaaty, nëjkxëp ja ja'ay ja y'awinax t'ixjëpijpta'atë ma ja teptsy yunën ets ma ja tëëxy pyä'änën, mëti'ipë ënety të t'oytyuntën mëët ja pu'ts pujxn ets poop pujxn.

²¹ Jap muum tsaajutjoty, tsajpkëkjoty nëjkxëp ja ja'ay nyäy'atijëtë, jap nyäyu'utsëtëty ko ënety ja Wintsën ja ëyo'on tyajminy tyajkëtä'äky naaxwiiny naaxkëjxy.

²² Këtii yë naaxwiinyëtë ja'ay xytyuk'ijxpätëty, nitii tkakëjxmëty, wäänë jyuuky'ajtkojy.