Isaías 19 - Biblia Dc en Mixe de Quetzaltepec

Ma yanikäjpxyën wi'ix nëjkx jyäty kyëpetyën Egiptë ja'ayëty

¹ Ixtë wi'ix ja Wintsën tniminyën ja Egiptë ja'ayëty yootsjoty. Ja awinax jëtu'unyë tsyëtyuupyëjkta'atë ko t'ixtë myiny ja Wintsën, ja Egiptë ja'ayëty nän yajxon tsyë'kënëtë.

² Tääts ja Wintsën y'ënä'äny: Nyajwa'kxäämpyës yam Egiptë kajpn ets aakyë'ë tsyiptuntëty, nëjkxëp nyämyëtsiptsoonyë ja ja'ay mëët ja myëku'uk, ja kajpn mëët ja myënaax myëtsëpa'an, ja yajkutujkpë mëët ja myëku'uk mëti'ipë näjyëtu'un yajkutujkpën.

³ Jëtu'unës nëjkx nyaj'akumon nyajjotkumonëtë, ka'ap nëjkx jëtu'un tyunyë jyätyë ijxtëm ënety të tjatuknipëjktaakëtën. Ënet nëjkx jam winë tyajtëwtë ma y'awinaxëtyën, ma ja nasja'apëtyën, ma ja o'kpë anëmën ets ma ja patooy panajxpëtyën.

⁴ E ëjts jamës yë Egiptë ja'ayëty nyajnëjkxa'any ma tu'uk ja yajkutujkpën mëti'ipë ka'ap nijënu'un kyäjpxyjyä'äkyukën, mëti'ipë ka'ap pën tpa'ëyoyën. Jëtu'un ja Wintsën y'ënä'äny mëti'ipë maaytyääyëpën winë.

⁵ Ja Nilë mëjnëë nëjkxëp tyëtsnë, ja mëjnëë jot ka'ap nëjkx nëë t'ëkmëët'ajnë.

⁶ Ja nëë wok ëxëëkëm xyuukanë. Ja mëjnëë jot mëti'ipë japën Egiptë ëtyä'äkyë'äämpy nëjkx tyëtsnë, ja tsajpkäpny jot ets ja nëëwäkjot jëtu'unyë nëjkx xyo'tstaaynyë;

⁷ ja nëëwäkjot mëti'ipë Nilë nëëpë'aay yajpatëpën, ets ja pëjktä'äky mëti'ipë nëëpë'aayën, wa'ats tyëtsta'aja'any ets nëjkx kyutëkooytyä'äy.

⁸ Ja ja'ay mëti'ipë nëë jëyujk majtstëpën jam ma ja Nilë mëjnëëjën, je'eyë nëjkx jyaak mon jyaak tuktë; mëti'ipë ja kujëpipantëpën, je'eyë nëjkx jyaak mëkxäj jyaak o'kxäjtë;

⁹ Mëti'ipë witkojtëpën, ka'ap nëjkx t'ëktukxoontaknëtë tyuunk; mëti'ipë tsëmy yajye'eytyëpën ets mëti'ipë jo'ktëpën, ëmaay paki'ix nëjkx nyäyjyawëtë;

¹⁰ mëti'ipë wit yajkojtëpën, ka'ap nëjkx y'ëkjotkujk'ajnëtë, mëti'ipë taktëpën, je'eyë nëjkx jyaak kumon jyaak kutukëtë.

¹¹ M'ëxëëk winma'anytyuk miitsëty kopktëjkëty mëti'ipë jam Soan yajpatëpën, mëti'ipë najts'ëëp najtskajpxëtëpën jap Egiptë, aakjä'ä mnikajpxtëp ka'apë tyuunëtyën.

¹² ¿Ma ënät ja m'ijxpëky ja'ayëty, mijts faraón ets myaj'ijxpëkëtëty ets mtuk'ëwaanëtëty mëti'ipë yë Wintsën të tuknipëjktaakën ma mijtsën Egiptë?

¹³ Yë kopktëjkëty mëti'ipë jam Soan yajpatëpën, winma'anytyuk yë'ëjëty, yë kopktëjkëty mëti'ipë jamëtyën Menfis tëë yajwin'ëëntë, yë kopktëjkëty mëti'ipë mutsk kajpntum tso'ontëpën, wiink në'ë wiink tu'u yë Egiptë kajpn të tukpanëjkxtë.

¹⁴ Yë Wintsën të txëpiintaayë yë Egiptë ja'ay yë jyot wyinma'any ets jëtu'un ja Egiptë kajpn nyë'ëtëkoy tyu'utëkoyëty, jëtu'un jyata'an tä tu'uk ëmu'ukyë ja'ayën mëti'ipë ni'ikyë kumukpëjkëpën ko tyëkë ë'tspë.

¹⁵ Ets ni pën kyamayëtëty ja Egiptë kajpn tyaj'oyëty, oy ja'ay jyaminëty mëti'ipë ixpëkyën mëti'ipë tsuujën, mëti'ipë kumeenyën ëkë mëti'ipë ëyoopën.

¹⁶ Ja Egiptë ja'ayëty wintse'kny nëjkx y'awinpitë, tsyë'kënëtëp oytyiijëty ets tsyë'ëkëjantëp ko ja Wintsën ënety ja kyë'ë t'akojxmuky.

¹⁷ Ëxëëkëm nëjkx yë Egiptë ja'ayëty tsë'ëkëtë yë Israel ja'ayëty, oy je'eyë xyëëw tjakajpxpaatëty, mëët ko ënety të tnijawëtë wi'ix ja Wintsën mëti'ipë maaytyääyëpën winë të tuknipëjktaakën.

¹⁸ Jä'ä xëëw nëjkx nyaaxkëtä'äky mëkoxk yë kajpn mëti'ipë hebreo ayuk kyajpxantëpën ets nëjkx nikajpxtë mëët Dios xyëëwkëjxm ko yë'ë tmëjjawëja'antë yë Wintsën mëti'ipë maaytyääyëpën winë. Tu'uk ja kajpn txëëwata'any, Xëëw Kajpn.

¹⁹ Ets nëjkx tyajkojtë tu'uk ja wintsë'këntyakn jap Egiptë, jam ma ja tsëpa'anën, jam tu'uk tsaakopk tyajpëtë'ëka'antë mëti'ipë Wintsën tyukmëjjawëjantëpën.

²⁰ Yë'ë nëjkx yajtuk'ixy ets ja Wintsën mëti'ipë maaytyääyëpën winë yaja'amyätsëty jap ma Egiptë kajpnën. Ko tmëkajpxtëty ja Wintsën ma t'amëtowtën ja näypyutëkë ko ënety ëxëëk yajtun yaj'ënëëmëtë, yë'ë nëjkx tyuknikäxëtë tu'uk ja yajnitsokpë mëti'ipë nëjkx kyuwa'anëtë ets yajtso'okëtën.

²¹ Nëjkxëp ja Wintsën nyänyikëxë'ëkyë jam ma Egiptë ja'ayëtyën, ets ja Egiptë ja'ayëty nëjkxëp nijawëtë pën Wintsën'ajtpën, nëjkxëp tmo'otë ja wintsë'kën ets ja ayajk ako'onën. Nëjkxëp ja wyaantakën tuntë ets nëjkx tkuuytyuntë.

²² Oy nëjkx ja Wintsën t'ëkyajtsëtyuty ja Egiptë kajpn, nyijootwinpitäämpy jatëkok, pya'ëyoowäämpy ets yajtso'okäämpy.

²³ Nëjkxëp jyää'ajnë najxtakn mëjwiin këjää ma Egiptë ja'ayëty ets Asiria ja'ayëty nyäpyaatëtën. Jyëkyejpy yë Egiptë ja'ayëty jya'tëty Asiria ets Asiria ja'ayëty jam Egiptë. Egiptë ja'ayëty Asiria ja'ayëty tu'ukyë nëjkx ja Wintsën t'ëwtajnëtë.

²⁴ Jä'ä xëëw yë Israel kajpn nëjkx itkujky nyäpyëjktä'äkyë ma Asiria ja'ayëtyën ets Egiptë ja'ayëtyën, kënu'kxy nëjkx nyäxy yaa naaxwiiny naaxkëjxy.

²⁵ Yë Wintsën mëti'ipë maaytyääyëpën winë, nëjkxëp y'ënë'ëmxëtë: Tyam nkënu'kxy mijts Egiptë, mëti'ipës nkajpn'ajtypyën, ets Asiria mëti'ipës ojts nyajkojyën mëëtës yë nkë'ë n'aaw, ets ja Israel mëti'ipës njä'ä'ajtypyën.