Isaías 17 - Biblia Dc en Mixe de Quetzaltepec

Ma yajnikäjpxyën wi'ix Damaskë ja'ayëty jyata'antën

¹ Jëtu'un ja Wintsën y'ënä'äny: Nëjkxëp ja Damaskë kajpn jëna'a kyutëkoy; xit ko'ow jyata'any.

² Mon tuk nëjkx wyi'imy, mëëyjot y'awinpita'any; jëyujk tënaaytyakn nëjkx y'awinpity.

³ Efraín, mëti'ipë Israel ja'ayëty tyukmëjnajxtëpën, ka'ap t'ëkmëët'atanëtë ja nyaax kyajpn ma nyäkyuwa'anëtëtyën; nän timjëtu'un yë Damaskë kajpn jyata'any mëti'ipë jam Sirië jaakwë'ëmpën, kutëkoyaanp ja kutujktakn.

⁴ Jä'ä xëëw ja Samaria nëjkx myëjaawkukëxë ma ënety ja Jacob ja jyotkujk'ajtën të tpaatyën, ja jyotkujk'ajtën jëtu'unyë nëjkx kyixy nyäxy.

⁵ Jëtu'un nëjkx jyäty tä tu'uk naaxtuunpë ja'ay tyajpëtë'ëkyën yë tsajpmok ets tpëjkmuky kë'ë'am ja ajkts, ma të myukyën yë tsajpmokpajk jam joyjyotm ma txëëwatyën Refaim;

⁶ je'eyë jyaak yaja'amyetsy; jëtu'unyë jyaak yaj'ixy je'eyë tä tu'uk mäjtsk jyaakwë'ëmyën muum ujtstëëm ko yajwinxity, ëkë taxk mëkoxk je'eyë muum jyaakkëxë'ëky kepykyëjxm. Jëtu'un y'ënä'äny ja Israel ja Wyintsën Dios.

⁷ Jä'ä xëëw ja ja'ay nëjkx tja'amyetsy ja Wa'ats Dios mëti'ipë Israel y'ëwtajtypyën, ja Dios mëti'ipë të yyajkojyën.

⁸ Ka'ap nëjkx jää y'ëkyajtuunë këwentë ja wintsë'këntyakn ets ja awinax mëti'ipë ja'ay kë'ëm yajkojtëpën. Ka'ap nëjkx pën y'ëk'ijxpatënë ja kepy kyopk mëti'ipë ja'ay yaj'ëmaay'ijtëpën ets yë'ëpaat ja wintsë'këntyakn ma ja tyiosëty tukwintoytyën ja poom.

⁹ Jä'ä xëëw tso'onta'ajantëp ja ja'ayëty jam ma ënety ja naax kajpn këwent'aty y'ityën, ma ja Heve ja'ayëtyën ets Amor ja'ayëtyën. Anë'ëk tëëtsë'ëk nëjkx yajpatnë.

¹⁰ Jä'ä ko të xyjyä'äytyëkoy yë Wintsën mëti'ipë të myajtso'okyën, ka'ap të xyjyä'äymyetsy ko yë'ë tsoktakn'ajtp, jëtu'un tä tu'uk tsaakopkën. Mijts janty'oy ja mkam mtu'u xy'oytyuny, ets ja pëjy oyjätyëty jam xynyi'ipy xykyojy, yë'ë mtukwintsë'ëkëjäämpy mëti'ipë wiink naax wiink kajpn y'ëwtajtëpën,

¹¹ yajxon xykyëwent'aty ko xypyeny xykyojy, jëtu'un xy'a'ijx xyjyëjp'ijxnë jëna'a pyëjja'any. E jääts ko ënety ja nyipa'am jyä'ty, wa'ats pyutstëkooytya'aja'any.

¹² Mëtoow'itë wi'ix ya'axtën jyoktën yë mayjyä'äy, jëtu'un tä y'iitsy kyomyën yë mëjmejy. Jëtu'un ja naax kajpn myu'utë nyiitstë tä mëj komnëë y'amu'uyën.

¹³ Ko ja Wintsën y'ojëtë, ënätyë kyääkjoktë ets jëkäm nyëjkxtë, jëtu'un tä pu'uxm wyimpapojyën tunkëjxm, jëtu'un tä äpnytyë'ëts pyojë'ëkyën ko mëktuupoj myiny.

¹⁴ Ko jyopy'äty janty'oy yaj'ixy y'ujts'aty, e ko tsyu'ujënyë tëë nyaxo'tstaaynyë. Jëtu'un jyatë ja ja'ayëty mëti'ipë je'eyë një'kxy'ajtëmë myëkäk myëpujtëpën, jëtu'un jyatë ja ja'ayëty mëti'ipë xit ko'ow të xyajwë'ëmëmën.