Isaías 16 - Biblia Dc en Mixe de Quetzaltepec

Jam ma Judá ja'ayëtyën jam ja Moab ja'ayëty kyäktso'oktë

¹ Jampaat Selá tsyoontë ja ja'ayëty mëti'ipë myëmiintëpën ja kupixyny ayääkë ets jam Sión ja wintsë'kën tyaka'antë.

² Yë Moab ja'ayëty jëtu'un yaj'ixtë kyä'äktë ko jam Arnón nyaxtë tä joonën mëti'ipë nyitso'ontutypyën yë pyä'än ko tii jëyujk y'ëtsë'ëkëty.

³ Ets tja'ënëëmëtë ja Sión ja'ayëty: Tun mëyajtën, putëjkëtëkës ets Këwent'ajtëkës. Niwaantutëk ëëtsëty ets këtiis xykyë'ëyaktëty, yu'tstëk këëytyëkës jëtu'un tä jeexyë kyoots'atyën ko kyujkyxyëëwatëty; putëkë ja'ay mëti'ipë käkpën pujtpën ets këtii xynyikajpxëty mëti'ipë kukäkëpën mkajpnjoty.

⁴ Wä'än jam ma mnaax mkajpnën tkäktso'oktë yë ja'ayëty mëti'ipë käkpëtsëëmtëpën jam Moab. Mijts jëtu'un näpyëjkta'akët yu'tstaknën ma ja'ayëtyën mëti'ipë yajpapooytyëpën.

⁵ Yë David yë y'u'unk y'ok yë'ë nëjkx tpaaty ja kutujktakn, mëti'ipë yajkutukaanpën mëët ja tëyajtën. Mëtëy nëjkx winë tnipaye'ey, jëtu'un tä y'ixëtyën ja poky ets mëtëy tyaj'ita'any ja ënä'ämën tëyajtën.

⁶ Wa'ats yajnijawë wi'ix yë Moab jyä'äy'ätyën, mëj këjää të nyäyajnaxyën amëj akëjxm të jyä'äy'äty, je'eyë të tyäty myëtyä'äky, nitii oy të tkatuny.

⁷ Paatykyëjxm ja Moab ja'ayëty mëj këjää tnijë'ëja'an tniya'axa'antë ja nyaax kyajpnëty; je'eyë nëjkx tnimon tnituktë wi'ix ënety o'ktëy jyajnëtën kyëpäjnëtën yë Quir-haréset ja'ayëty.

⁸ Tëë tyëtsta'ay wyintëkooytyä'äy ja tsatsymkyam jam Hesbón ets jam Sibmá, mëët ko ja kutujkëntëjk të twojpjëtijta'ajëtë. Jampaat ijty muum ja y'aats jyä'ty Jazer, ets jampaat të'ëts'itum ets ma mëjmejyën.

⁹ Paaty tyam je'eyë njaakniyä'äxyës ja tsatsymkyam jampë të y'ityën Sibmá, näjyëtu'un yë jampë yajpaatyën Jazer, nijëëpy niyäxypyës mëti'ipë jam Hesbón ets Elalé, jä'ä ko jam yë tsip të tyunyë.

¹⁰ Ja xoontakën ets ja xikën ëwë'kën jam jyëjpkëxa'any kamjotm tu'ujotm; ka'ap ja jotkujk'ajtën y'ëkyajpaatanë kamjotm tu'ujotm tä të y'ityën, ka'ap ja tsatym y'ëkyajpëkanë tä të pya'tkë'p'atyën. Ja yaxën jojkën nëjkxëp jyëjpkëjxnë.

¹¹ Jëtu'unës yë njot nwinma'any tsyëtyuy tä tu'uk yë kow y'ënaankëtä'äkyën mëët ko ja Moab ets ja Quir-haréset o'ktëy jyatë kyëpätë.

¹² Oy jënu'un yë Moab jyajëëytya'ak jyanu'kxta'akëty jam tunkëjxm kopkëjxm, oy jënu'un jyakajpxta'akëty jam tsajptëkotm, ka'ap tpaata'any mëti'ipë y'ixtääpyën.

¹³ Ya'atë ojts tkäjpxy yë Wintsën tëëyëp ma ojts t'akäjpxyën wi'ix ja Moab jyata'anyën.

¹⁴ Jëtu'un ja Wintsën y'ënä'äny: Tëkëëk jëmëjt yajmëtyowa'any, tä tu'uk yë mëtuunpë tmëtyoyën yë xyëëw jëna'a yajmëjuyä'änyën, pyatäämpy ja xëëw po'o ma ja ja'ay ka'ap t'oy'ixtëtyën ja Moab ja kyutujkën, tyam oy jënu'un jyayaj'ixy mayjyä'äy yowë myëët'ajtyp pyatäämpy ja xëëw jëmëjt ma wäänë jyä'äy wyë'ëma'anyën ets nitii nëjkx tkatuny.