Isaías 14 - Biblia Dc en Mixe de Quetzaltepec

Ma ja ja'ay wyimpitën mëti'ipë të yajmënëjkxtën tsum matsy wiink naax wiink kajpn.

¹ Ja Wintsën nëjkxëp jatëkok nijootwinpity ja Jacob ja y'u'unk y'ok ets nëjkx jatëkok t'u'unkniwa'any. Ja Israel ja'ayëty nëjkxëp jatëkok jam tsyënaaytyaknpëktë ma ja nyaax kyajpnëtyën. Ja jaaypyaat jaaypyo'kxy nëjkxëp nyimin nyija'tëtë ets nëjkx jam tsyëënëtë ma yë'ëjëtyën.

² May nëjkx ja ja'ay tpatsoontë ja Israel ja'ayëty ets nëjkx najtswowëtë ma nyaax kyajpnëtyën; ja Israel ja'ayëty wyoownëjkxantëp ja ja'ay mëti'ipë mëtuunëtëpën jam ma ja Wintsën ja it nyaaxwiinyëtë të myo'ojëtën. Ja Israel ja'ayëty tsumy matsy nëjkx tyajnëjkxtë ja ja'ay mëti'ipë ënety të tsyum të myatsëtën, nëjkxëp ëxëëk tuntë mëti'ipë ënety ëxëëk të tyunëtën.

³ Mijts Israel kajpn, ko ënety ja m'ëyo'on mjotmay të kyixy të nyäxy, ko ënety ka'ap o'ktëy m'ëk yajpatnë ets ko ënety ka'ap m'ëk mëtuun m'ëk kupëjknë,

⁴ ya'atë nëjkx xy'ixy ets jëtu'un xynyëxi'ik xytyukxi'ikëty ja Babilonyë ja'ay mëti'ipë ënä'ämp yajkutujkpën: Ixtë wi'ix o'ktëy ja ënä'ämpë yajkutujkpë jyäty kyëpetyën. Ix wi'ix të jyajnë ja mëti'ipë ijty nämyëjja'aw näjyääntyjya'awëyëpën.

⁵ Tëë ja Wintsën tyajnaxy tyajkëxy ja kuttujkën, ka'apë myëtëyëtyën, piw nuuk të tuunta'ay ja yajkutujkpë ja y'ënä'ämën,

⁶ mëti'ipë ënety tyiytyuunpyën ja naax kajpn mëët ja tsip äkë ets twopy tka'atsy ja ja'ay; mëti'ipë ja naax kajpn y'ate'empy tyukte'empyën mëët ja joot'an ets t'ixjëtity tpajëtity ja myëku'uk oy maa timpyaja'ty, ka'ap tmëët'aty ja pa'ëyo'owën najts'ëyo'owën.

⁷ Jotkujk ets xoontä'äky ja naaxwiinyëtë ja'ay yajpaatë, jotkujk xyi'iktë y'ëwë'ëktë mëët ko oy nyäyjyawëtë.

⁸ Yë'ëpaat ja aay kepy, aay ujts jampë yajpaatën Líbano tukxoonta'aktë ko o'ktëy mjajnë mkëpäjnë, ets y'ëna'antë: Maju'unëm mijts mkuka'anaxyën, ni pën ëëts xykyanimintë ets të xypyux të xykya'atstës.

⁹ Jap naaxpa'tkë'p, ma o'kpë yajpaatën, janty'ëtëtsp janty ënantëp jap o'kpëty, mijts myaj'ëwxijtp. Jëtu'un ja o'kpë jap yaj'ixtë ma'aywyijtëp yowë, ja mëti'ipë të y'ëne'emy të kyutukyën, jä'ä jap mnitso'onëp ets m'ëxajëja'anyë; tëkokyë ja yajkutujkpëtëjk tëë wyä'ätsë'kta'atë ma ja y'ënyääytyaknëtyën.

¹⁰ Aak kajpxtëp ets myaj'ënëëmë: Mijts nän tëë ja mëk'ajtën tyëkooynyë, nän timjëtu'un tyam të m'awinpity tä ëëtsëtyën.

¹¹ Yaa ja mmëjajtën mkëjxm'ajtën jyëjpkukëxë ets ja m'ëëpëty myaxpëty. Ja maapäjn tëë pyutstëkooynyë, ja mwit mëti'ipë mtukwinyä'pëpën ja maapäjn, tëë tyënë'këtyääynyë.

¹² Wi'ixën jam tsajpjotm të mkuka'anajxpë, mëj ijty mtë'kxy mjajy jopyëp. Jëtu'unyë naaxkëjxy të myajnajtsjëpipë, mijts mëti'ipë ijty ëxëëk ja naax kajpn mtuunpyën.

¹³ Mijts, ojts jëtää mjamay mjatajy: Ëjts koonëmës nja'ta'any tsajpkëjxm; etsës jam npëjkta'aka'any yë nkutujktakn ma Wintsën tyaj'ityën myëtsa'a; jam anëkëjxmtsow jamës ntsëënëja'any, jam ma y'itën yë wintsëntëjkëty mëti'ipë ja'ay y'ëwtajtëpën.

¹⁴ Nwinaxäämpyës ja yoots këjxmëtypë; wäänë këjxmës nja'ta'any jëtu'un tä ja Ni'ik Këjxmëpën.

¹⁵ Mijts ni'ikyë të mnäyajjënäkyë o'këntujp ko të mmay të mtajy wäänë këjxm mja'ta'any, jaakni'ik këk të mjëjptä'äky.

¹⁶ Ko ja'ay m'ixyë je'eyë mnimony mnitukyë, tu'ukyë mwintë'kxyë ets y'ëna'antë: Ya'atën jä'ä mëti'ipë ijty ëxëëk ja naax kajpn tsyë'ëkëtyën, mëti'ipë kanaak ja naax kajpn të tyajkutëkoyën,

¹⁷ mëti'ipë ja naax kajpn ijty tyuktsëëmtutypyën, mëti'ipë ja naax kajpn ijty yajkutëkoopyën, ets mëti'ipë ijty ka'ap nitu'uk ja'ay juuky y'ëxmajtsypyën.

¹⁸ Tëkokyë ja yajkutujkpë aak jotkujk yaj'ixtë pyo'kxtë pyëktë ma y'o'kpëjutëtyën;

¹⁹ e mijts, ni pën mkanitajëty ets jeexyë oy mnaaxtëkë, ëxëëkëm ja'ay m'ixyë. Mëti'ipë të yajkupuxtën, mëti'ipë jutjoty të kya'atën, jä'ä mëët të m'a'o'kmuky, je'eyë të myaj'ateeny të myajtukteeny.

²⁰ Mijts ka'ap nëjkx mnaaxtëkë tä wiinkëtypë yajkutujkpë të nyaaxtëkëtën, jä'ä ko mijts xit ko'ow ojts mnaax mkajpn xytyuny, je'eyë mmëkunaax mmëkukajpn të xyaj'ooky të xyajtëkoy. Ja y'u'unk y'ok ja ja'ay mëti'ipë ëxëëk të y'ëti'itsy të y'ënä'änyën ka'ap nëjkx jeky jyuuky'äty.

²¹ Nipëjktaakëtë ets xyaj'ooktëty ja y'u'unk y'ëna'këty ja ja'ay mëti'ipë ja tyeety tyaak të yajja'ay'ooktën, këtiipë y'ëkjää'ajtnëty mëti'ipë je'eyë myëmay myëtajëpën wi'ix ja naax kajpn o'ktëy tuntëty ets je'eyë xii yaa muum ja kajpn tyaj'ixta'aka'anëty.

²² Jëtu'un ja Wintsën mëti'ipë maaytyääyëpën winë y'ënä'äny: Tsiptunaanpës yam mëët yë'ëjëty, ja Babilonyë ja xyëëw ka'ap nijëna'a y'ëkyajja'amyäjtsnëty, yë'ëpaat ja ja'ayëty ets ja y'u'unk y'ëna'këty ka'ap nëjkx nimaa y'ëkyajnija'awënëtë.

²³ Nëë mo'ontsjot nyaj'awinpita'anyës, ju'k, wääk'oo, nëjkx jam tsyëënëtë. Jëtu'unës nyajkutëkoyä'äny tä ja'ay pyätë'ëkyën. Yë Wintsën mëti'ipë maaytyääyëpën winë, yë'ë kë'ëm jëtu'un ënaanp.

Wi'ix ja Asiria ja'ayëty nëjkx kyutëkoytyën

²⁴ Yë Wintsën mëti'ipë maaytyääyëpën winë, jëtu'un y'ënä'äny: Jëtu'un ijxtëmës të ntuknipëjktaakën, jëtu'un tyuna'any jyata'anyë; jëtu'un tääjës të nyaj'oyën, jëtu'un y'atëwa'any.

²⁵ Nyajkutëkoyäämpyës yë Asiria ja'ay maas ja nnaax nkajpnën ets maas yë ntun nkopkën; jëtu'unyës n'atääna'any ntuktääna'any. Yë y'ënä'ämën kyutujkën ka'ap tjëkyepy o'ktëy tunëty yë nnaax nkajpnës, yë myëk'ajtën ka'ap tjëkyepy ëxëëk tmë''ëtë'ëtsëty.

²⁶ Ya'atës të ntuknipëjktaakë ma tëkokyë yë naaxwiinyëtën. Ja nkë'ë n'aawës ëxëëkës jam nyaj'ëtë'ëtsa'any ma ja naax kajpnën.

²⁷ Yë Wintsën mëti'ipë maaytyääyëpën winë, tëë tuknipëjktaakë, ni pën tkajëkyepy y'ëtukëtëty. Yë ëyo'on mëti'ipë yajkëta'akäämpyën, ka'ap tjëkyepy pën t'akajpxtukëty.

Ma yaj'akäjpxyën wi'ix ja filistejë ja'ay jyata'antë

²⁸ Jä'ä xëëw ma ja Ahaz y'ookyën, jää ojts yë Jeséas ya'atë aaw ayuk tkäjpxy:

²⁹ Këtii nëkoo mjotkujk'aty mijts filistejë kajpn, ko ja kepy të tyijy mëti'ipë myajtukwojpën; jä'ä ko tsa'any tu'uk pëtsëmaanp ma ja tsa'anytyaak y'ityën, tääpë tsa'any kääkë'ëkaanp yë'ë.

³⁰ Yë ëyoopëja'aytyëjk jam yë kyupixyny tyaj'oka'antë maas yë nkamën, ja ja'ayëty mëti'ipë ka'ap wit meeny tmëëtëtyën jotkujk nëjkx jyuuky'atë. E mijts ni'ikyë ja mja'ay nëjkx nyajyuu'ookyës ets mëti'ipë juuky jaakwë'ëmtëpën, nëjkxëpës ni'ikyë njaakyaj'ooktë.

³¹ Jë'ëtë ya'axtë miitsëty filistejë ja'ayëty, më''ëna'antë yë mpëjk m'ato'onënëty, tsëtyuytyë mëët mëktsë'ëkë, jä'ä ko tam anëkëjxmtsow ja mmëtsip mniminyë tä yoots nëma'ajën, tä naaxwayën mëti'ipë myajkutëkoyanëpën ets ni pën kyajëjpkuwa'akëja'anyë.

³² ¿Wi'ix tääpë naax kajpn y'ëkyaj'ëtsoowinpitëty? Yë Wintsën tëë ja nyaax kyajpn ja jotkujk'ajtën tmo'oy jam Sión, aakjam ja ja'ay nyëjkxta'aja'antë mëti'ipë jëëytyëp yaxtëpën ets jam tsyo'oktëty.