Isaías 11 - Biblia Dc en Mixe de Quetzaltepec

Mëti'ipë nyiwintsën'ajtypyën ja jotkujk'ajtën

¹ Jëtu'un tä tu'uk kepy jyiitsyën, jëtu'un ja Jesé tu'uk ja jyä'äy pyëtsëma'any.

² Tääpë ja'ay nëjkxëp yajpaaty xëmë mëët yë Wintsën ja myëk'ajtën y'oyajtën, mëti'ipë nëjkx myo'oyën nija'awën, wijyajtën, këpetyajtën, mëk'ajtën, ixpëkyajtën ets ma Wintsënën.

³ Tääpë ja'ay ko ënety winë tnipaye'ey ka'ap yë'ë nyätyuk'ënä'äma'anyë kyë'ëm jot kyë'ëm winma'any ets mëti'ipë yë'ë y'oy'ijxyp y'oyjya'apën, nän ka'ap yë'ë nyätyuktsuu'ixa'anyë ja aaw ayuk ëkë ja käjpxy mëtyä'äky.

⁴ Nyipaye'eyäämpy ja ja'ay mëti'ipë yajpatëpën ëmaay paki'ix ets kyuwa'anäämpy ja ëyoopëja'ay ets ja mëti'ipë patëtëpën.

⁵ Tääpë ja'ay yë'ë xëmë kyajpxäämpy myëtya'akäämpy ja oypyë nipaye'eyën ets ja mëtëypyë.

⁶ Ënätnëm nëjkx jyää'aty ja jotkujk'ajtën, yë'ëpaat yë aayjëyujk ujtsjëyujk nëjkx oy nyäyjyawëtë, ja kupixyny mëët ja pa'uk oy nëjkx y'itë, ja kaa mëët ja tsajppax tu'ukyë nëjkx tsyëënëtë, ja tsajpkaa ayääkë tu'ukyë nëjkx jyë'kxmuky mëët yë kuuyxyëpëjy ets ja pi'k ëna'k nëjkx kyëwent'atëtë.

⁷ Nämyäyëtëp ja tsajpkaa mëët ja osë, ja y'u'unk y'ëna'këty tu'ukyë nëjkx jyë'kxtë pyëktë. Ja kaa näjyëtu'un nëjkx ja mëëy tjë'kxy tä tsajpkaajën.

⁸ Oy ja pi'k ëna'k ja kyë'ë tkutijëja'anëty ma tsa'any myä'äy pyo'kxyën, ets oy ja kyë'ë jap tkutijëja'anëty ma tsa'any jutën, ka'ap nëjkx wi'ix tyunyë.

⁹ Maas ja ntun nkopkën ka'ap jam nitii yajpaata'any mëti'ipë ëxëëktunëpën, jam ma naax kajpnën ujts jam yajpaata'any mëët ja Wintsën y'oyajtën myëj'ajtën, jëtu'un tä yë mëjmejyën y'ujtsëtyën mëët yë nëë.

¹⁰ Jä'ä xëëw yë Jesé mëti'ipë jëtu'un tä kepyjyi'tskën, ijxpäjtën nëjkx wyi'imy ma wiinkëtypë naax kajpnën; nëjkxëp nyiminyë wiinkëtypë naax kajpn, ja it naaxwiinyëtë ma tääpë kajpn yajpaatyën, mëj'äämpy nëjkx y'ity.

¹¹ Jä'ä xëëw jä'ä jëmëjt nëjkx ja Wintsën jatëkok tyaj'ixyë ja myëj'ajtën ko tjä'äpëkëty ja nyaax kyajpn ets tyajtsoonëty jam Sirië Egiptë, Patros, Etiopíë, Elam, Sinar, Hamat ets jam ma ja naax kajpnën mëti'ipë mejy itkujkyën.

¹² Tääts tpëjkta'aka'any tu'uk yë ijxpäjtën ma ja naax kajpnën ets tyajtu'ukmujkta'aja'any ja ja'ay mëti'ipë ënety ja myëtsip të yajnëjkxyën wiink naax wiink kajpn tsumy matsy; tyajmujkta'aja'any naaxwiinyëtë apëtsëmy ja Judá ja'ay mëti'ipë xit ko'ow yajpatëpën wiink it wiink naaxwiinyëtë.

¹³ Ka'ap nëjkx ja Efraín ja tsyip y'äkë t'ëkmëët'ajnë, ja Judá nëjkxëp ja jyoot'an xyä'ämnë; Efraín ka'ap nëjkx t'ëktukjoot'anpëjknë yë Judá, e yë Judá ka'ap nëjkx t'ëk'ëxëëk'ijxnë yë Efraín.

¹⁴ Tu'ukmukyë nëjkx nimäjtsk nyäkyuwa'anëtë ma ja filistejë ja'ayëtyën ets ëxëëk nëjkx tuntë ja mëti'ipë jam tsënaaytyëpën maatsow yë xëëw pyëtsimyën; nëjkxëp tukupëktë ets y'ayak y'akonëtëty ja jampë ja'ay tsyëënëtën. Ja myëk'ajtën jampaat nëjkx jyä'ty ma ja Edom kajpnën ets ma ja Moab kajpnën ets nëjkxëp ja Amón ja'ayëty myëtunëtë.

¹⁵ Nëjkxëp yë Wintsën tu'uk yë në'ë tu'u tyaj'ëwa'atsy ma mejy txëëwatyën Tsapts nëëmejy, ets jampaat jya'ta'any ja y'oyajtën ma ja Éufrates mëjnëëjën, tu'uk yë mëkpoj nëjkx tyajnäywyä'kxyë wëxtujkpëky, ets jotkujk nyaxtëty ja ja'ay kë'ëk mëët.

¹⁶ Ko ënety ja Wintsën ja nyaax kyajpn jyajtmujkta'ay ets ko ënety tëë tsyo'ontaaynyëtë jam Asiria, mëjwiin ëwaatsë nëjkx në'ë tu'u tpaatë jëtu'un tä ijty tëëyëpën ko jap Egiptë tsyo'ontë.