Isaías 1 - Biblia Dc en Mixe de Quetzaltepec

Yë Judá ets Jerusalén, nimäjtsk pokytyuunpë kajpn

¹ Mëti'ipë yë Jeséas y'ijxën myëtoowën, Amós yë myaank, ma ja Jerusalén yajnikäjpxyën ets Judá, ma ënety yajkutukyën yë Uzías, Jotam, Acaz ets Ezequías, mëti'ipë jam Judá ënä'ämtën.

² Mëtoow'it mijts tsajp, mijts naax, ko ja Wintsën y'ënä'äny: Tëës nyaj'u'unkyeeky ets koonëm të yä'ktakta'atë, je'eyëp ko yë'ëjëty, je'eyës të xykyäjpxy kumëtoownaxtë.

³ Yë tsajpkaa y'ixyp pën wyintsën'ajtypyën, ets krukts nyija'ap ma jyë'kxtakn yë wyintsën të myo'oyën; e yë Israel ja'ayëty mëti'ipës nnaax'ajtyp nkajpn'ajtypyën ka'ap y'ijxkäpy ets ka'ap jyä'äkyukë.

⁴ Mëkës njajantyjyawë ko je'eyë nëë poky tuntë tkajpxtë, ja naax kajpn mëti'ipë je'eyë ëxëëkpë myë'ijtypyën, ets ja ja'ay mëti'ipë je'eyë jyot wyinma'any yajtëkooytyëpën; ja u'unk ëna'k ka'apë nijënu'un jyä'äkyukëtën. Tëë ja Wintsën tmëjëkämkäknëtë, tëë tpuwa'ktutnëtë ja Dios mëti'ipë wa'ats yajpatpën jam ma Israel ja'ayëtyën, tëë yajxon t'ëxmajtsnëtë.

⁵ Yi'iyë miitsëty mmëmaay mmëtajtëp wi'ix mkäjpxykyumëtoownaxtëtyën, ma mjot mnini'kxëtyën ka'ap t'ëkjëkyäjpnë ma myajwoptëty. Aak tsëtyut ja mni'kx mkopkëty, tëë mmëjaawkëjxnëtë.

⁶ Ma mtekyjyëjpën ets jampaat ma mkëpajkën aak pëjkp atoonëp, aak tsëtyut, aak tuk'ookë, aak putsp yaj'ijxnë; ni pën tkayajtsooypyetsy, ni pën tkakupä'änë ets ni pën tkapujy.

⁷ Anë'ëk tëëtsë'ëk ja mnaax mkajpn të wyë'ëmnë, aak tooy aak jäämnëp je'eyë ja naax kajpn. Ma mjëën mtëjkëtyën ja mmëtsip jap winë jyë'kxtëp mëti'ipë miitsëty të xynyitunëtën.

⁸ Yi'iyë yë Sión të jyaak wë'ëmy jëtu'un tä tu'uk kamtëjkën, nätyu'uk jyaak yajpaaty ma tsatym kyamën. Tä tu'uk këtseytyëjkën ma melón kamën, Tä tu'uk kajpnën tëëpë myëtsip yajnatukyën.

⁹ Kooxyëp yë Wintsën, mëti'ipë maaytyääyëpën winë ka'ap ni pën të tyajwë'ëmy juuky ma ëëtsajtëmën, jëtu'un jeexyë të njajtëm tä yë Sodomë kajpnën ets Gomorra kajpnën.

Wi'ix mëtëy ja Wintsën yaj'ëwtatëtyën.

¹⁰ Miitsëty wintsëntëjkëty, Sodomë ja'ayëty, mëtoow'itë ya'atë aaw ayuk mëti'ipë ja Wintsën kyajpxäämpyën. Miitsëty, Gomorra ja'ayëty mëtoowkukëtë wi'ix ja Wintsën ja y'ënä'ämën y'ënä'änyën.

¹¹ Jëtu'un yë Wintsën y'ënä'äny: ¿Tiijës nyajwa'anëty yë wintsë'kën oy jënu'un may xyajmintë? Tëës xynyatsijpnë ja wintsë'kën nino'okpyë xyaktën, tä yë kupixynyën, tsajpkaajën ets tsajppaxën, ëxëëkës n'ixy yë jëyujk ne'pny.

¹² Miitsëty janty jëtu'un nyätyijyë mmintë maas ëjtsën, yë'ëjës yam nyajtëwäämpy: ¿Pën të m'ënë'ëmxëtë ets jotkujk mnaxtëty mtëkëtëty maas yë mtsajptëjk yë nyitëja'awën?

¹³ Këtiis nitii wintsë'kën xy'ëktuknimiinëtëty ka'apë tsyowpaatyën, yë nyijok ka'apës n'ëktsojknë. Ma ja po'o xynyixëëwtuntën, ma ja po'kxënxëëw xypyo'kxtën ets ma ja ja'ay xyajtu'ukmuktën ets ëxëëk y'ëtë'ëtstë y'ëna'antë.

¹⁴ Ëxëëkës n'ixy ko xynyixëëwtuntë ko ja po'o pyi'k'aty ets ko mmuktë mxu'umtë, je'eyës të xyajjoot'anpëktë, nkatimy'ixantëp miitsëty.

¹⁵ Ko mkë'ë xyajjë'ëktë ets mkajpxta'aktë, ëjts jëkämës nnas'ixë; oy jënu'un mkajpxta'aktëty kanaak ok, ëjts ka'apës nmëtoy; jä'ä ko miitsëty ujts ja mkë'ë m'aawëty mëët ja jot ne'pyny.

¹⁶ Näypyuj näjyä'ätsëtë, näyajwa'atsëtë. Ka'apës n'ëk'ixanë ja mpokyëty. Ja ëxëëk tu'u jä'ä m'ëxmatstëp.

¹⁷ Jatë wi'ix ja oypyë xytyuntëtyën, ja mëtëypyë jä'ä mtuntëp, putëkëtë mëti'ipë ëxëëk yajtuuntëpën, nipaye'eytyë ja ku'ooky u'unk, pa'ëyow najts'ëyowëtë ja ku'ookpyë to'oxytyëjk.

¹⁸ Jëtu'un yë Wintsën y'ënä'äny: mintë, tsojk ja amay jotmay nyaj'o'oyëmë. Oyxyëp ënety ja mpokyëty jëtu'un tä jëënpajkën mëti'ipë toopy jäämpën, ëjts poopës nyaj'awinpita'any tä tip kyä'äyën; oy ënety jëtu'un kyëxë'knë uky witën, ëjts jëtu'unës nëjkx nyaj'awinpity poop witën, tä pixyny witën.

¹⁹ Ko miitsëty xykyupëktëty ko mmëtowantëp, nëjkxëp mka'ayën m'ukën xypyaatë oyëtypë;

²⁰ e ko miitsëty je'eyëm nkäjpxykyumëtoownaxtëty, tsipjoty nëjkx m'ooktë, ets ka'ap mtso'oka'antë. Yë Wintsën jëtu'un kë'ëm të y'ënä'äny.

Yë Wintsën kë'ëm yajwa'atsäämpy ja Jerusalén kajpn.

²¹ Mijts Jerusalén kajpn mëti'ipë wa'ats kajpn yajtijpën, jëtu'un të m'awinpity tä tu'uk to'oxytyëjkën mëti'ipë xim yam ye'etyëjk yeempyën ets myëët'atëtëty. Tëëyëp aak'oy ijty ja'ay jyuuky'atë ets aak mëtëy winë tuntë, e tyam aak yajja'ay'o'knëtëp.

²² Jëtu'un ijty mijts tä poop pujxnën, tyam pu'uxmën të m'awinpijnë; jëtu'un ijty mijts tä oypyë tsatym nyëëjën, tyam ëxëëk nëë të m'awinpijnë.

²³ Yë mkutujkpëtëjk je'eyë kyäjpxykyumëtoownaxtë, jä'ä pyutëjkëtyëp mëti'ipë yaja'ay o'ktëpën. Aak meeny je'eyë myëmaay myëtajtëp ets jëtu'un winë tuntë ets yi'iyë pyatijtëp ma tii jëtu'unyë namëyajtën tpaatëty. Ka'ap ja ku'ooky u'unk nipaye'eytyë, ka'ap tja'amyätstë mëti'ipë ja ku'ookpyë to'oxytyëjk patëpën.

²⁴ Paaty y'ënä'äny yë Wintsën mëti'ipë maaytyääyëpën winë: Ja kutujkënmëëtpë yajpaatyën jam Israel, jëtu'un tnikäjpxy: Wä'än jäpaat jëtu'un tuunkojy tjajtkojyë. Ëjts ntukumëtowäämpyës yë nmëtsipës. Ëxëëkës yam ntuna'any.

²⁵ Nnixajë'ëkäämpy yam jatëkok etsës nino'kta'aja'any ja mpu'uxm; nyajwa'atsäämpyës ma ëxëëk myajpaatyën.

²⁶ Jä'äjës ntsoky ets jatëkok xymyëët'atëty m'ënä'ämpë mkutujkpë ijxtëm ijty tëëyëpën, xymyëët'atëty jatëkok mëti'ipë mnajts'ëw mnajtskajpxëtëpën. Koos ënety jëtu'un të ntuny tääts nëjkx jatëkok myajtijy Oykyajpn Wa'ats Kajpn.

²⁷ Mëëtës ja ntëyajtën ets ja oypyë ja ntu'unënës nkajpxënës, nyajtso'okäänpyës jatëkok yë Jerusalén ja'ayëty, ets xynyimintëtyës.

²⁸ Apux tukpuxës ntuna'any mëti'ipë käjpxy kyumëtoownajxtëpën, ets mëti'ipës ënety xy'ëxmajtstëpën nëjkxëp y'ooktë.

²⁹ Nëjkxëp xytyuktsëtyuntë tääpë xoj kepy, tääpë pëjykyam mëti'ipë m'oy ijxtëpën, ma xywyintsë'ëkëtën ja tsaa ets kepy ëkë oynatii.

³⁰ Jëtu'un nëjkx mjatë mkëpätë tä xoj kepy wyinka'ayën, tä ujtskamën ka'apë y'ëkxo'knën.

³¹ Ja ja'ay mëti'ipë mëk näjya'awëyëpën, aaykyëta'akën y'awinpita'any; ja tyuunk jëënpixkën jyata'any; nimäjtsk tyoya'antë tu'knax ets ni pën nëjkx kyayajkupi'itsëty.