Hechos 9 - Biblia Dc en Mixe de Quetzaltepec

Ko Saulo jyotwinpity

¹ Ja Saulo tyim yaj'ookäämpy ënety ja mëpëjkpëtëjk, paaty ojts tninëjkxy ja teety wintsën,

² ets ja noky tu'uk t'amëtooy ta'tspëky ets tmënëjkxa'any ets tuk'ixa'any ja ja'ay mëti'ipë ye'eymyujktëpën ma ja tsajptëjkën jam Damaskë ets t'ixta'aja'any mëti'ipë pyanëjkxtëpën ja Jempyë Në'ë Tu'u ets tyajnëjkxa'any kë'ëtsumy tekytsyumy jam Jerusalén, wä'än ye'etyëjk to'oxytyëjkëty.

³ Ko ënety jam jya'tanë Damaskë, ënät ojts ajotkumonë t'ijxpaaty tu'uk ja jëën mëk y'ajajy y'atë'kxy wyintuuy pyë'aay mëti'ipë tso'onpën tsajpjotm.

⁴ Tääts kyëtääy ets tmëtooy tu'uk ja ja'ay kyäjpxy ets y'ënä'äny: Saulo, Saulo, ¿tii koos xy'ixjëtity xypyajëtiy?

⁵ Tääts ja Saulo tyajtëëy: ¿Mpën mijts, Wintsën? Ets y'ëtsooy: Jesusës ëjts, mëti'ipë m'ixjëtijtyp mpajëtijtypyën.

⁶ Ets ja Saulo tsyëyuuypyijky ets y'ënäny: ¿Tii mtsojkpy etsës ntunëty? Ënet ja Wintsën y'ënëmaayë: Pëtë'ëk ets nëjkx kajpnjotm. Jamts myajtuk'ëwaanëty mëti'ipë mtunëpën.

⁷ Tääts ja Saulo ja jyämyëët näjyëtu'un tsyë'këtyäky ko ja ayuk tmëtoowtë, je'eyëp ko ka'ap t'ijxtë pën kajpxp.

⁸ Ënet ja Saulo pyëti'ky ets ojts jya'ijxwa'kxa'any, ka'ap tii t'ixy. Tääts ja Saulo ja jyämyëët wyijtstso'onë ets yajmënëjkxnë jam Damaskë.

⁹ Jamts y'ijty tëkëëk xëëw wiints, ni kyakay ni kya'uuky.

¹⁰ Näy jam Damaskë tu'uk ja ye'etyëjk mëti'ipë ja Jesús myëpëjkpyën, Ananías xyëëwajtyp. Ënet ja Wintsën ojts tyuk'a'ijxnaxyë ja Ananías ets y'ënëmaayë: Ananías. Tää ja Ananías y'ëtsooy: Tyamës, Wintsën.

¹¹ Tääts y'ënëmaayë: Nëjkx ma ja tu'u txëëwatyën Tëytyu'u. Ko mja'tëty ma ja Judas ja tyëjkën, jam xyajnitëwëty ja Tarsëtë ja'ay mëti'ipë xyëëwajtypyën Saulo. Yë'ë tam ja Dios tja'amyetsy.

¹² Näy tëë yajktuk'a'ijxnaxy ko mijts mnëjkxa'any, ets xykyë'ënixajëty ets y'ijxpëkëty.

¹³ Ko ja Ananías jëtu'un tmëtooy, tää y'ënäny: Wintsën, may yë ja'ay të xytyuk'ëwaanës ko tääpë ja'ay ëxëëk të y'ëti'itsy ets ëxëëk të tuny ja mnaax mkajn jam Jerusalén.

¹⁴ Ets të tmëja'ty ja noky kutujkënmëëtpë mëti'ipë ja teety wintsënëty të mye'eyën ets tmajtsta'ajëty mëti'ipë mxëëw y'ëwtajtëpën.

¹⁵ Tää ja Wintsën y'ënäny: Nëjkx, tëëjës ntuknipëky. Nyajtunäämpyës yë'ë ets nyëjkxëty ma ja ja'ay mëti'ipë ka'ap jyutiisëty. Jamts tnikäjpxy tnimëtya'akëty ja n'aaw n'ayukës ma ja mëti'ipë tsënaaytyëpën wiink it wiink naax ets ja yajkutujkpë mëti'ipë ënä'ämtëpën, näjyëtu'un ja Israel ja'ayëty.

¹⁶ Ntuk'ix ntuknijawëpës wi'ixës xykyu'ëyowëtyën.

¹⁷ Tääts ja Ananías ojts tninëjkxy ja Saulo. Ko tëkoty tyëjkëy, tää ojts tkë'ënixajy ets t'ënëmaay: Mëku'uk Saulo, Wintsën Jesúsës të xykyexy, mëti'ipë ojts xy'ixyën tu'ujotm. Të xykyexyës ets mijts jatëkok m'ijxpëkëty ets ja Kënu'kxymyëkajtën xy'ëxajëty.

¹⁸ Ënet ajotkumonë wyiinjoty t'ijxy tsay tsi'kxpiikën ets y'ijxpëjky jatëkok tääts pyëti'ky ets nyëëpejty.

¹⁹ Ko kyääyi'ky y'uukë'ky, ënät ja myëjaaw tpëjky ets ojts wäänë jyaak wë'ëmy mëët ja mëpëjkpëtëjk jam Damaskë.

Ko ja Saulo ja Tios ja y'aaw y'ayuk tnikäjpxy tnimëtyakë jam Damaskë

²⁰ Tääts ënätyë ja Saulo tkajpxtso'ontäky ja Dios ja y'aaw y'ayuk jam tsajptëkotm ets y'ënäny ko ja Jesús yë'ë ja Dios ja Y'u'unk.

²¹ Ets ja ja'ayëty mëjmëtoy ojts tjawëtë mëti'ipë jam myëtoow'ijtëpën ets xim yam nyäy'ënanëtë: ¿Këtii yë'ëjëty ya'atë ja'ay mëti'ipë ijty y'ëxëëk'ijxypyën ja Jesús ja myëpëjkpëtëjk jampë Jerusalén kyukajpnëtyënë? ¿Këtii yë'ëjëty yaa të tniminy ets tmajtsmujkta'aja'any mëti'ipë ja Jesús ja xyëëw yajmëjnajxëtëpën ets tkë'ëtsuma'any tekytsyuma'any tääts tkë'ëyaka'any ma ja teety wintsëntëjkëtyënë?

²² Ënet ja Saulo ni'ikyë amëk jotmëk kyajpx'ëtëtsy, wa'ats ja ja'ay tuknija'awëy ko Jesús, yë'ë janty Kristë. Ja jutiis ja'ayëty jëtu'unyë myoonkëtak tyujkëtaktë mëti'ipë ënety tsënaaytyëpën jam Damaskë.

Ko Saulo tkuke'eky ja jutiis ja'ayëty

²³ Komjekynyëm ja jutiis ja'ayëty ojts tkäjpxy'atë ko ja Saulo tyaj'ooka'antë,

²⁴ je'eyëp ko ja Saulo ojts tnijawë. Xëënaxy tsunaxy ja myëtsip ojts tkëwent'atë ja naax kajpn ma yajnitëkën ets ma yajnipëtsëmyën ets yaj'ooka'anyë,

²⁵ ja mëpëjkpëtëjkëty jap pyëjktakë katsyjoty, ets jam potsyjëxkë'p koots kyutëëynyajxë.

Ko ja Saulo jyä'ty jam Jerusalén

²⁶ Ko ja Saulo jyä'äjty jam Jerusalén ojts ja mëpëjkpëtëjk mëët jyaye'eymyuka'any, je'eyëp ko tsyë'këtëp ja Saulo, jëtu'un tjëjp'ixtë ko nëkoo yowë ja Saulo y'ënä'äny ko ja Jesús tmëpëky.

²⁷ Ënet ja Bernabé ojts twoownëjkxy ja Saulo jam, ets tukwinkuwo'owëy ja ijxpëjkpëtëjk. Tääts ja Bernabé tnimëtyäky wi'ix ënety ja Saulo të t'ixyën ja Wintsën tu'ujotm ets wi'ix myëkajpxën ja Wintsën ets näjyëtu'un wi'ix ënety amëk jotmëk të tnikäjpxy të tnimëtyä'äkyën ja Jesús jam Damaskë.

²⁸ Tääts ja Saulo ojts jam wyi'im Jerusalén mëët ja ijxpëjkpëtëjk ets yë'ë mëët jyëtijnëtë. Amëk jotmëk ja Dios ja y'aaw y'ayuk tnikäjpxy tnimëtyakëtë,

²⁹ ets kyäjpxy myëtyäky mëët ja jutiis ja'ayëty mëti'ipë griego ayuk kyajpxtëpën; e yë'ëjëty yaj'ookantëp ënety ja Saulo.

³⁰ Ko ja mëpëjkpëtëjk tnija'awëtyë ko ja Saulo ja ja'ay yaj'ooka'anyë, tää ojts twoownëjkxtë jam Cesarea, jam ojts tsyoony ets tkäjxtë Tarso.

³¹ Jotkujk ja mëpëjkpëtëjk yajpaatë mëti'ipë tsënaaytyëpën jam Judea y'itjotm, Galilea ets Samaria. Wimpäjt'ëtëtstëp ja myëpëjkën, xëmë ja Wintsën twintsë'ëkëtë ets nyimayë'ëtë'ëtstë, näjyëtu'un ja Kënu'kxymyëkajtën ojts yajjotkujk'ätëtë.

Ko ja Eneas tsyo'oky

³² Ja Pedro, jëtu'un ijty t'aye'ey t'anaxy ja mëpëjkpëtëjk maajëty tsyëënëtën. Ojts näjyëtu'un tku'ixë ja mëpëjkpëtëjk mëti'ipë jam tsënaaytyëpën ma ja Lida kajpnën.

³³ Jam tu'uk tpaty ja ye'etyëjk mëti'ipë xyëëwajtypyën Eneas, xuxyë pa'am myëët'ajtyp, tëë ënety tyuktujkjëmëjtpäjnë ma ja pa'am pyaatëtën.

³⁴ Tääts ja Pedro t'ënëmaay ja Eneas: Eneas, Jesukristë yam myajtsokëp. Pëtë'ëk, yajpëtë'ëk mmaapäjn. Tääts ja Eneas ënätyë pyëti'ky.

³⁵ Ko tnija'awëtyë ni'ëmukë ja ja'ayëty mëti'ipë kukajpnajtëpën jam Lida ets Sarón, ënät ja y'ëxëëk winma'any t'ëxmajtstë, ets tmëpëjktë ja Wintsën.

Ko Dorcas jyuukpyiky

³⁶ Jam ma ja Jope kajpnën, jam ijty tu'uk ja to'oxytyëjk mëpëjkpë tsyëënë, Tabita''ajtp. Dorcas yajtijy griego ayuk. Ya'atë to'oxytyëjk xëmë ijty tuny mëti'ipë oy ets pyutëjkëp ja ëyoopëja'ay.

³⁷ Ënet ja pa'am pyätë ets y'o'ky; ko y'o'ky ojts ja nyi'kx kyopk yajpujy, tää ojts tpëjkta'aktë jap tëjkëjxy.

³⁸ Winkon ja Lida kajpn ënety wyi'im. Ko ja mëpëjkpëtëjk tnija'awëtyë ko ja Pedro jam Lida, ënät nimäjtsk ja kukäjpxy tkäjxtë ets ja Pedro tuk'ëwa'anëtyë ets myinëty jotëkoy ma ja Dorcas të y'ookyën.

³⁹ Tääts ja Pedro tpatso'ony. Ko jam jyä'äjty ets ojts yajwoownëjkxy ma ja o'kpën. Ënet ja Pedro ja ku'ooktyo'oxy tyukye'eymyujkëtë ets tyuk'ijxëtë ja wit mëti'ipë ënety ja Dorcas të txuyën ko ënety mëët të jyaak juuky'atë.

⁴⁰ Tääts ja Pedro tkäjxpëtsëëmtaay ja ja'ayëty ets nyäkyoxtënaaytyakë ets ja Dios ojts tmëkäjpxy ets ja o'kpë tniwa'akwinpijty ets y'ënäny: Tabitá, pëtë'ëk. Ënet ja o'kpë ojts y'ijxwä'kxy ets ja Pedro yajwintë'kxy ets wyä'tskujkëy.

⁴¹ Tä ja Pedro tmajtsy ma kyë'ëjën ets tyajtënaaykyujkëy; tä tkumëkajpxëy ja mëpëjkpëtëjk ets tuk'ijxy ko ënety tëë ja Dorcas jyuukpyiky.

⁴² Ni'ëmukë tnija'awëtyë ja ja'ay mëti'ipë tsënaaytyëpën jam Jope. Jëtu'un ja Wintsën nimay tmëpëjktë.

⁴³ Kanaak xëëw ja Pedro jam pyoxy ma ja Simón yajpo'otëtspë tyëjkën.