Hechos 8 - Biblia Dc en Mixe de Quetzaltepec

¹ Oy ja Saulo tja'awëy ko ja Esteban tyaj'o'ktë. Jä'ä xëëw yajpajëtijtaktë ja mëpëjkpëtëjkëty, mëti'ipë ja Jesús myëpëjktëpën jampë tsyëënëtën Jerusalén. Ni'ëmukë, yi'iyë ja Jesús ja y'ijxpëjkpëtëjkëty ojts ka'ap yajpaatë, jä'ä ko ojts ënätyë ye'eywya'kxta'atë, ets nyëjkxtaaytyë maajaty ja Judea ets Samaria y'itjotmën.

Ko ja Saulo tpajëtijtä'äky ja mëpëjkpëtëjk

² Tam jënaakën mëti'ipë ja Dios myëpëjktëpën, yë'ë yajnaaxtëjkëtyë ja Esteban ets tnijëëy tniyaxtë.

³ Tääts ja Saulo tpajëtijtäky ja mëpëjkpëtëjk winjëën wintëjk ets atsip tyajpëtsëëmy tyëkoty, wä'än ye'etyëjk to'oxytyëjkëty ets pujxn tëkoty tpëjktaktaaytyë.

Ko ja Kristë ja y'aaw y'ayuk yajkajpxwä'kxy jam Samaria

⁴ Ja mëpëjkpëtëjk mëti'ipë pëtsëëmtën jam Jerusalén, jä'ä ojts tnikäjpxy tnimëtya'aktë ja Dios ja y'aaw y'ayuk maajëty nyëjkxtën.

⁵ Ja Felipe, ojts kyëtä'äky jam Samaria kajpnjotm. Ënet ja Kristë ja y'aaw y'ayuk ojts tkajpxwa'kxë.

⁶ Nimay ja ja'ay myiintë ets t'amëtoow'ijtë ja aaw ayuk mëti'ipë ja Felipe kyäjpxypën ets t'ijxtë ja mëj'ajtën mëti'ipë tyuunën.

⁷ May ja ku'oypyë t'ixkejxy ja Felipe. Ayaxp ajojkp pyëtsëëmtaaytyë ma ja ja'ayëtyën. Näy tsoktaaytyë ja kë'ëxujxpë tekyxyujxpë ets ja ja'ay tekymya'atëtypë.

⁸ Paaty ja ja'ay jam xyoontaktë ma tääpë kajpnën.

⁹ Näy jam Samaria ijty tu'uk ja ye'etyëjk mëti'ipë xyëëwajtypyën Simón, mëti'ipë xëëwmääpyën. Mëj ijty kë'ëm nyäpyëjktä'äkyë ets ja ja'ay tukmëpëky mëti'ipë tyuunpyën.

¹⁰ Ni'ëmukë mëj mutsk t'amëtoow'ijtë ja ja'ay wi'ix ja Simón y'ënä'änyën. Jëtu'un y'ënantë ko ja Simón tmëëtëty ja Dios ja myëk'ajtën.

¹¹ Yë'ëts ja xëëwmääpyë ja jyä'ä pyatuunëtëp, jä'ä ko tëë ënety kanaak jëmëjt wyin'ëënëtë.

¹² Ko ja Felipe ojts nimëtyä'äky ja aaw ayuk oypyë mëti'ipë ja Dios kyutujkën'ajtypyën ets näjyëtu'un nimëtyäky ja Jesús ja jyä'ä, tääts tmëpëjktë mëti'ipë ja Felipe kyäjpxypën ets nyëëpäjtë ye'etyëjk to'oxytyëjk.

¹³ Näyjyëtu'un ja Simón ojts myëpëjknë ets nyëëpejty ets ja Felipe ojts tmëjwa'kpety ko t'ijxy ja ijxpät ets ja mëj'ajtën mëti'ipë ja Felipe tyuunpyën.

¹⁴ Ko ja ijxpëjkpëtëjk tnija'awëtyë, mëti'ipë jam jaakwë'ëmtën Jerusalén, ko tam ja Samaria mëti'ipë myëpëjktëpën ja Dios ja y'aaw y'ayuk, tää ja Pedro yajkäjxtë mëët ja Juan.

¹⁵ Ko jam jyajtë, ënät tuknija'amyäjtsëtë ja samaariëtë ja'ayëty ja Dios ets t'ëxajëtëty ja Kënu'kxymyëkajtën.

¹⁶ Jä'ä ko ka'anëm ënety ja Kënu'kxymyëkajtën tyukmin tyukja'tëtë ja samaariëtë ja'ayëty, je'eyë ënety të nyëëpätë Wintsën Jesús xyëëwkyëjxm.

¹⁷ Tääts ja Pedro ets ja Juan ja ja'ay ojts tkë'ënixajtë, ets ja Kënu'kxymyëkajtën ojts t'ëxajëtë.

¹⁸ Ko ja Simón t'ijxy ko ja ja'ay t'ëxajëtë ja Kënu'kxymyëkajtën ko ja ijxpëjkpëtëjk kyë'ënixajëtë, ënät ja meeny ojts t'ëwaanë,

¹⁹ ets y'ënëmaayëtë: Mooykyës näjyëtu'un yë mëk'ajtën mëti'ipë mmëët'ajtypyën ets näjyëtu'un tpaatëty ja Dios ja myëjaaw myëk'ajtën koos pën nkë'ënixäjëty.

²⁰ Tääts ja Pedro y'ëtsoowë: Poky mijts m'itëty mëët yë mmeeny ëyoowtaknjoty, jä'ä ko xywyinmay xyjyuyä'äny mëti'ipë ja Dios nyayäjkpyën.

²¹ Ka'ap ya'atë tuunk mpaatyë, jä'ä ko ka'ap yë m'aaw mjot y'oyëty ma Tiosën.

²² Jootwinpit ets ya'atë ëxëëk winma'any xy'ëxmatsëty. Ja'amyäts ja Wintsën ets mpoky yajnimä'kxëty mëti'ipë m'aaw'ajtyp mjot'ajtypyën.

²³ Jëtu'unës n'ixy ko yowë näjyënaxë xyjyawë ko ja poky myaj'ityë tsumy matsy.

²⁴ Tääts ja Simón y'ëtsooy: Tuknija'amyäjtsëtëkës ja Wintsën etsës ka'ap jëtu'un njatëty ijxtëm mijts të m'ëna'antën.

²⁵ Ko ja Pedro ets ja Juan tnimëtyaktaaytyë ja Wintsën ja y'aaw y'ayuk, ënät wyimpijnëtë ets nyëjkxnëtë jam Jerusalén, tkajpxwa'kxtë ja Dios ja y'aaw y'ayuk maajëty ja kajpn ënety tuknaxtën jam Samaria y'itjotm.

Ko ja Felipe mëët nyäpyäätyë ja Etiopíë ja'ay

²⁶ Tääts ja Felipe ojts tu'uk ja Wintsën ja y'anklës nyë'ëmxëty: Nëjkx ëpa'tkë'ëmtsow, ma të'ëts'itjotmën, mëti'ipë tu'u najxpën jam Jerusalén ets nyijkx Gaza.

²⁷ Tääts tsyo'ony ets jam tu'u'am tpaty tu'uk ja Etiopíë ja'ay mëti'ipë ënety ja Dios ojts të t'ëwtatyën jam Jerusalén. Ya'atë ja'ay mëj tuunk ënety nyëkëjxm'ajtyp, yë'ë tyuunk'ajtyp ja meenykyoonë'k ma ja yajkutujkpën, ja to'oxytyëjk jampë y'ën'emyën Etiopíë.

²⁸ Kyajpnjotm ënety ja ja'ay nyëjkxnë kepywyintëkäämjoty ets jap tkäjpxy ja noky mëti'ipë ja Dios ja kyäjpxynyajxpë Jeséas jyääyën.

²⁹ Ënet ja Kënu'kxymyëkajtën ja Felipe y'ënëmaayë: Ninëjkx ya'atë kepy wintëkäämpë winkon.

³⁰ Ko ojts tninëjkxy ets tmëtooy ko ja noky tkäjpxy mëti'ipë ja käjpxynyajxpë Jeséas jyääyën. Ënet tyajtëëy: ¿Mwinja'ap tääpë xykyäjpxyënë?

³¹ Tää y'ëtsooy ja noky kyajpxpë: ¿Wi'ixës nwinjawëty? ka'apës pën xytyukwinkumëtyaakë wi'ix nyiwijyën. Ënet ja Felipe t'ënëmaay ets yajpätëtëty pujxnwintëkäämpë këjxm ma ënety jam y'u'unyën.

³² Yë'ë ënety kyäjpxyp ma ja Dios ja y'aaw y'ayuk y'ënä'änyën: Jëtu'un jä'ä ijxtëm ja kupixyny yajmënejkxyën ma y'o'ktaknën; ets ijxtëm ja kupixyny u'unk amonyë tkupëkyën ko yajknikeepy, ni tuk'aaw ojts kyakäjpxy.

³³ Jëtu'un ja ja'ay yaj'amutsk'ajtë ets kä'äp ojts oy yajpaye'ey; ¿Pën jëtää nikajpxëtëp ko jam ja y'u'unk y'ok?, jä'ä ko ojts ja ja'ay yaj'ookyë yaa naaxwiiny.

³⁴ Tääts ja Felipe ja etiopiiyëtë ja'ay yajtëëwë: Tun yë mëyajtën, nikajpx, ¿tii nyimëtyäkpy, kë'ëm nyätyijyë, ëkë wiinkpë nyimëtyäkpyë?

³⁵ Tääts ja Felipe tuk'ijxpëjktso'ony mëti'ipë ënety ja ja'ay kyäjpxypën ets tukmëmëtyäky ja oy aaw oy ayuk, ja Jesús ja jyä'ä.

³⁶ Jëtu'un tyu'uye'eytyë, ënät ja nëë tpatë ets ja Etiopíë ja'ay y'ënäny: Tyaa nëë, ¿ka'ap jëtää y'oyëty koos nnëëpätëtyë?

³⁷ Tää ja Felipe y'ëtsooy: Pën mmëpëjkpy yë Jesús ëmuumtu'ukjot, oy mnëëpätëty. Tää y'ëtsoowinpijty: Nmëpëjkpës ko Jesús Dios y'u'unk'atyë.

³⁸ Ko jëtu'un y'ënäny, tää ja kepy wintëkäämpë tyajwa'ak'o'oyëtë ets nimäjtsk ojts nyëjkxtë nëëjotm. Jamts nyëëpejty ja Etiopíë ja'ay.

³⁹ Ko pyëtsëëmtë nëëjoty, ënät ja Felipe ja Wintsën ja Jya'awën wiinktsow yajnëjkxë; ni kä'äp ja Etiopíë ja'ay t'ijxy maa ojts ja Felipe nyijkxy e yë'ë akujk jotkujk ojts jatëkok tyu'utëkë.

⁴⁰ Jam ja Felipe ojts yaj'ixy ma ja kajpn txëëwatyën Azoto. Kajpnkajpn ijty tkajpxwä'kxy ja aaw ayuk oypyë koonëm jyä'äjty jam Cesarea.